الرئيسيةس .و .جبحـثالتسجيلدخول

شاطر | 
 

 ماضاق الوطن بس كِبرت الزنزانة / فى رثاء حميد .

اذهب الى الأسفل 
كاتب الموضوعرسالة
صداح فاروق وراق

avatar


مُساهمةموضوع: ماضاق الوطن بس كِبرت الزنزانة / فى رثاء حميد .   الأربعاء 21 مارس 2012 - 7:23

جرح الوطن ختالنا خط
مامنو نطط
وحميد ختالنا خط مامنو نط
الليلي ياموت يا حيا
خاتي البختار الوسط خاتي البختار الوسط

يافطون
فطن حميد فطمنا غنانا
لاطاطينا لاسبنا الخيول تاطانا
قدمناه امام لاضلا لا ضلانا
ماهاب السجون مافزه من سيطانا
وكت الكور حما ثابت ركز لبطانا
لكن البلاد باعت ايادى بطانا
عالجه بالرحيل مدت وراه لسانا
جربه بالعويل قلبت حديثه رطانا
حنسه بالهديل رخت الحبيبه اضانا
ذى كل الطيور دايما تحن لوطانا
ماضاق الوطن بس كبرت الزنزانا

ويادى البلاد الكل ماطايبتها
فتحت على جرحك جرح
الكل مانقطلها الكلمات عسل
نزلت على خاطرك ملح
لاتاكت ابوابها الانيقه ورحبت
لاليله بجيتك فرح
يادى البلاد
وين نحن هسى فى ياتو ليل
فى يات صباح
كل الشوارع تشتبه فيك
وتشابه بعضها
كل البيوت الواقفه طولها
تستبيح فى عرضها
وانا روحى تشتاق لبلاد
كان طينى من طين ارضها
ديك البلاد اللابتفوت فيك وكت
لايوم بتترك فرضها
يوماتى واصله بالحنين
يوماتى هى الفى النوم
تجيلك برضها

اشتقت ليها الشوق غلب
اشتقته انزع همى
فى عتبات بيوتها الواسعه
وانزع فى ضل عصاريها التعب
غنيتا بادب المديح
سمت غناى قلة ادب
ومشيت وراها ضريح ضريح
فتشت فى كل القبب
دقشت وراء الرزق الشحيح
ما اغنى مالها وماكسب
شغلوها بالنبى والمسيح
واتقاسموها رتب رتب
فى كل حته حصار حصار
فى كل فجه لهب لهب
صمدت امام وابل الرصاص
سقطت امام وابل الخطب
حنيت عليها من الضهب
حنيت على زحمة خطاها
التايه بين رحمه وغضب
حنيت على دمى المشتت
فيها بين زنجى وعرب
حنيتا ياخى بلا سبب
ما دى البلاد الا جلبتها
للمدائن الصاخبه مقطوعة رحم
ولاتركتها فى الفيافى الشاحبه
مجهولة نسب
ولا رفعتها فى الرماح
ولامرقتها للمنافى
الواسعه تزروها الرياح
انا كنت كل ماالليل يفلل بندها
ياصابره حى ياصابره حى
ياصاااابره حى على الفلاح
ياصاااابره حى على الفلاح
ياصابره حى على الليالى
الفاتحه لوش الصباح
ياصابره حى على المدائن
الفاضله والقول المباح
لو كنت اقدر انزعك
من مخالب الخوف وجلجلة السلاح
ماكنت تانى رجعت ليك
خاوى اليدين دامى الخطى
ومكسور جناح

ولاكان نسيتك فى الزحام
تتعاطى مر الزكريات الفاجعه
والخدر الحرام
يادى البلاد الكل ماطايبتها
طاب ليها فى النفق المقام
زوجتها الحلم الجميل
خطبت خفافيش الضلام
وغنيته ما شاء الهديل
رطنت بما شاء الامام
راوضتنى وروضت كل الحواس
وهدهدت فى صحوى
شهوات المنام
ياطفله ابلغ من غناى
واجله عن كل الكلام
فرت ضفايرها ضفتين
والرمش تعريشة غمام
والثغر شخبين من حليب
والصدر برجين للحمام
جلست فما ابهى الجلوس
وقامت فما اسمى القيام
دخلت على الناس المسره
ومرقت على الارض السلام
وياصابره مادام الاسف
اسف على صبرك معاى
اسف على صبرك على
اسف على صبر السنين المره
عام من بعد عام
واسف اذا طال الشتات
فى الغربه او عزا المرام
واسف اذا طرف المدن
فراها اجنحة الخيام
ونزرتي عمرك للنزوح
للجوع واسلمت الطعام
واسف على هذا الكلام
اسف على هذا الكلام
اسف

وداعاً اخي صديقي وحبيبي حــــــمــــيــــد

ازهرى محمدعلى
الرجوع الى أعلى الصفحة اذهب الى الأسفل
ودعيسي

avatar


مُساهمةموضوع: رد: ماضاق الوطن بس كِبرت الزنزانة / فى رثاء حميد .   الأربعاء 21 مارس 2012 - 7:52

لله دركم يا أذهري وصداح
الرجوع الى أعلى الصفحة اذهب الى الأسفل
Enas Adawi




مُساهمةموضوع: رد: ماضاق الوطن بس كِبرت الزنزانة / فى رثاء حميد .   الأربعاء 21 مارس 2012 - 15:04

السابا ورحل
الضيق المحل
الفرج القريب
الجا وما وصل
زي الحال دا يوم
لا كان لا حصل
والبال إشتغـل .....
الرجوع الى أعلى الصفحة اذهب الى الأسفل
مبارك محمد عثمان

avatar


مُساهمةموضوع: رد: ماضاق الوطن بس كِبرت الزنزانة / فى رثاء حميد .   الأربعاء 21 مارس 2012 - 17:56

ما طال في بحرك في مي
وتمرك مفرع بالجريد
شدرك أمد حدّ السمي
طينك معتـق بالطمي
نبنيك أكيد .. نبنيك هوى
نبنيك أيوه سوا .. سوا
من أوجديد نبنيك جديـد
****************
يا إيد أبوي على إيد أخـوى
على إيدى أنا
على إيد و إيـد
تجدع بعيد في اللجة
في من راس ميضنة
حيكومة الفقر الدمار
الكضبن و الصهينة
اللي نقاص أيامنا كاس
اليالطيف سوس البحر
نرجم قفاهو حجر حجر
من ها الرصيف
الما قدر قدام
سريحة الموج يقيف
الما انستر
الارزقية وناس مو يا
نسقيها كاس أسقتنا يا
نوريها كيف عشق الحياة
سنانا فوق حجر القصاص
سوانا ناس ارض البحر
جوانا احد من الرصاص
*************
يا ضو حبـيبـين القسا
طول ما انت غرقان في الأسى
تبت يدين ما ترمى ساس
ما تبنى مجدك من جديد
تفتح شبابيك الخلاص
تدخل نسيمات النشيد
بيت القصيد يستقبله مستقبله ..
و الحاضر الماضي التليد
******************
يا بلدي يا فردة جناحي التانى
وكت الناس تطير لي عالمه
وآ وجعة الزول البيجيك
ما يلقى فيك غير الهجير
ناسا تواتى مسالمة
كل البشاشات القبيل
يلقاها ميتة مسممة
والجاته جاته من الأرض
ما جاته من تالا السما
ما أعتي غبنك يا ولد
وأعدل قضيتك وأعظمة
لاترجع السيف الجفير
والدنيا فايره مصادمة
من غير تجيب تار البلد ..
ريح العوارض تهزمة
تطرد مع إبليس الأخير
دعة الضلال من جنتك يا أدمة
تاكل من الشجر الحلال
يغشاك نعاس في ضل رمى
تختاك هضاريب الصعب
كربة ليالي المظلمة
***********
يا نيل قبل خاطرك يطيب
أرضك تفزع باللهيب
تكشح تواريب الغضب ..
صعب المراس ..
نوبة و زنوج و بجة و حلب
رطانة عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
في إيدنا فاس وقلم رصاص
شتلة و كمنجة و مسطرين
و طبنجة في خط التماس
حراسة من كيد البكيد
ضد الرصاص والانتكاس
نبنيك هوى وأشد باس
الرجوع الى أعلى الصفحة اذهب الى الأسفل
احلام عبد الوهاب




مُساهمةموضوع: رد: ماضاق الوطن بس كِبرت الزنزانة / فى رثاء حميد .   الأحد 6 مايو 2012 - 1:41

الاستاذ الرقيق ازهرى محمد على ابكانى مرتين الاولى عندما رثى زوجته والان وهو يرثى وطن بكامل رحم الله الاستاذ حميد ورحم الله زوجة الاستاذ ازهرى واسال الله لك استاذى الجميل ازهرى الصير الجميل
الرجوع الى أعلى الصفحة اذهب الى الأسفل
محمد جعفر فضل

avatar


مُساهمةموضوع: رد: ماضاق الوطن بس كِبرت الزنزانة / فى رثاء حميد .   الأحد 6 مايو 2012 - 3:58

كلمات لها اثرها ...نسال الله الرحمه للفقيد وتسلم يا ازهرى ومشكور كتير ياصداح
الرجوع الى أعلى الصفحة اذهب الى الأسفل
 
ماضاق الوطن بس كِبرت الزنزانة / فى رثاء حميد .
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا الثقافى-
انتقل الى: