- كوثر يوسف عبدالصادق كتب:
والله لاقتنى لكن ما عارفه سيدا منو . بعد تعرفو سلم عليهو [center]
هأنذا اليوم بلحمي وشحمي. أبو البدري
تحياتك ..
تحياتك سلام مشتاق
كتاب تبادلو العشاق
وكلمة ريدة في الأحداق
وهمسة ناس بتروي الريد
وخاتم زكرى فوق الإيد
تحياتك .. كلام يا حلوة بي طفلين
يلمو الرملة فوق الطين
وعينيكي البتملأ العين
كتاب عنوانو مشتاقين
وضحكة زول لطيف وحنين
وجيناتك .. غروب وشروق
ولون الريشة في الغرنوق
وموية الوادي لما تروق
رسالة صغيرة من عاشق
بسلم فيها للمعشوق
وبحلف ليهو بالريدة
يقول مشتاق وحارقو الشوق
بسيماتك .. حياة فنان
مع الموسيقى والألحان
ومنظر لوحة بالألوان
ورحلة بلبل الجنة
البهاجر من مكان لمكان
ومشهد ناس بتتسالم
وضمة ريدة بالأحضان
وطيبة الناس نهار رمضان
ملامح من ضفاف النيل
حضارة نبتة في السودان
نهيداتك .. معابد نوري والبركل
ونجمات عالية بتلالي
وليها الأيدي ما بتوصل
جنادل في منابع النيل
مراكب سايرة تتمهل
حبيبات الندى التنزل
على الأزهار وتتكتل
وهزات فيها موسيقى
مشاعر الناس وكت ترحل
لدار مخضرة بالأزهار
وفيها التل قصاد التل
وخصلاتك .. سبايب الخيل
وناس بتدوبي نص الليل
جداول بين جنان ونخيل
رمال ممتدة جنب النيل
ومقطع غنية في منديل
عويناتك .. غيوم وسحاب
فراشات حايمة حول النور
زهور مزروعة جنب الباب
طيور جنحاتها ما قامت
رسوم الصبية في الكتاب
خطيواتك جناين دابها مسقية
وتعرفي برضو يا بنية
خطاك السايرة في دربي
إيقاع مية في المية
كتبتها في الزمن الجميل وأنا طالب بمدرسة خور طقت الثانوية وألقتها المرحومة طيبة الذكر ليلي المغربي في برنامجها الصباحي نفحات الصباح في عشرينات القرن الماضي