الرئيسيةس .و .جبحـثالتسجيلدخول

شاطر | 
 

 ملك درب القطة..مسلسل أذاعى كوميدى.

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
رضا الهجرسى

avatar


مُساهمةموضوع: ملك درب القطة..مسلسل أذاعى كوميدى.   الأحد 16 سبتمبر 2012 - 2:52


ملك درب القطة
تأليف /رضا الهجرسى
...................
الحلقة الأولى

(مسمع 1)
________
نقرعلى باب
المديرة: ادخل
صوت فتح باب
فرغلى : ايوه يا فندم .. حضرتك طلبتينى ..
فى إستهزاء
المديرة : فرغلى باشا.. عبقرى المصلحة..
ايه ده يا افندى..بقى اطلب منك تقرير
عن الصادر و الوارد ..
تقوم تعمل لى تقريرعن اصلاح وتطوير المصلحة .
فى ثقة
فرغلى : ايييوه يا فندم .. الأهم فالمهم..
وطبعا الأهم تطوير المصلحة واصلاحها..
وبعدين نبقى نشوف حكاية الوارد والصادر دى..
فى استكانة
المديرة:أنت يافندى هتعمل فيه ايه تانى.. ضغط ورفعتهولى .. سكر وجبتهولى..لوز نزلتهالى..حتى اللمباجو جالى .. حرام عليك .. والله حرام.. ارحمنى..
انا عندى عيال عايزة اربيهم وملهمش.. غيرى
فى الدنيا..هتيتمهم من بدرى على إيدك ..
فى ثقة وهدوء
فرغلى : حضرتك مش مستوعبة الموقف كويس..
انا افهم سيادتك.. بقى العباقرة اللى زيى أنا ..
واللى ربنا خلقها عشان تؤدى رسالة فى الحياة.
. بيبقى كل همها ازاى تطور الحياة وتعمرها ..
يعلو صوته
فرغلى :وبنبقى شمعة تحترق وتضئ من أجل أن تنير .. الطريق للبشرية المعذبة..
وأنا لما قدمت لسيادتك التقرير العبقرى ده..
كنت بقوم بدورى فى الحياة كصاحب رسالة
فى استهزاء
المديرة :وفى رأيك بقى يا عبقرىزمانك ووحيد عصرك..
يا صاحب الرسالة للبشرية المعذبة..
والشمعة المحترقة التى تنير الطريق للمعذبين ..
علشان المصلحة تتطور يجب التخلص
من كل رؤساء الأقسام لأنهم ذات عقلية متعفنة
ومتخلفة..وأن هما السبب الرئيسى فى تخلف
المصلحة ورجوعها للوراء..
ببقراطيتهم المتعفنة ..والله تلاقيك متعرفش يعنى
أيه بيروقراطية ..
فرغلى : والله يا فندم ده رأيى..
والصراحة فى الأمور اللى ذى دى متزعلش ..
صارخا فى لغة خطابية
فرغلى : والخلاف فى الرأى لا يفسد للود قضية ..
صارخة فى غضب
المديرة :يعنى يا أفندى يا جاهل يا متخلف أنت ..
عايز تفهمنى . . إن عقليتى أنا متعفنة ومتخلفة ..
وإن أنا سبب تخلف المصلحة ..
فى ثقة
فرغلى : يافندم .. الصراحة متزعلكيش ..
وانا بصفتى عبقرى وصاحب رسالة بيأدى رسالته
صارخة بغضب شديد
المديرة:صاحب رسالة يا جاهل .. يا متخلف .. يا ساقط ثانوية ..
فرغلى :تانية جامعة لو سمحتى .. ساقط تانية جامعة..
آه.. المقامات محفوظة برضه
بغيظ شديد
المديرة:أمشى..أطلع برة.. غور من قدامى الساعة دى
قبل ما ارتكب معاك جناية..
هما الكام كتاب اللى قريتهم جننوك ولحسوا عقلك ..
اطلع برة ..
صوت اقدام تبتعد وباب يفتح ويغلق..
صوت درج مكتب يفتح
المديرة :فين حباية الضغط ..أهى ..
صوتها وهى تشرب مياة
المديرة :وآدى حباية السكر.. لا مش كفاية.. آه..
فاضل أيه كمان..آه.. حباية الأعصاب آهه..
آه يا نفوخى ..هيموتنى.. هيخلص علية..آه ..
مخى هيتفرتك ..

(موسيقى)
مسمع 2
________
صوت باب يفتح ..صوت امرأة تخطت الثلاثين..
زوبة :مالك يا أستاذ فرغلى..عملت فيك أيه الولية المفترية دى
فرغلى:ست متعفنة..متخلفة.. ماهو أنا اللى غلطان برضه
تقرير عبقرى زى ده كان لازم أبعته للوزير مباشرة أو
حتى رئيس الوزرا..
زوبة :أيوه طبعا ..أبعته يا خويا لرئيس الوزرا ..
فرغلى:عارفة يا مدام زوبة يا أروبة ..
زوبة: آنسة ياخويا ..آنسة ..أنت دايما تنسى كده ..
ومتقليش يا أروبة ..أنت هتعمل زى نسوان المصلحة اللى
غيرانين منى ومن جمالى ودلالى ..
فرغلى :جمالك ودلالاك..ما علينا ..عارفة يا ست أروبة غلطتى أيه
زوبة :برضة أروبة ..ما علينا ..قول يا خويا غلطتك أيه بقى ..
فرغلى :أنا وقعت فى نفس الغلطة يوم ما قدمت تقريرى العبقرى
لتطوير التعليم الجامعى لعميد الكلية.. وكان لازم أبعته
لوزير التعليم العالى على طول.. ومن بعدها أضطهدنى
وفضل يسقطنى لما اترفدت وضاع مستقبلى العلمى ..
يبقى العبقرية تقول أيه ..
زوبة :أيه ..
فرغلى: نبعته للوزير..والأحسن نبعته لرئيس الوزرا على طول..
آدى الورق.. وآدى القلم.. وآدى العبقرى صاحب الرسالة..
أكتبى يا ست زوبة يا أروبة ..والمؤمنة الوحيدة بعبقريتى
ورسالتى .. فى وسط السطر..بسم الله الرحمن الرحيم..
من فرغلى اللمونى عبقرى و صاحب رسالة.. إلى السيد
المبجل رئيس ال ..
نقر على الباب
صوت باب يفتح
توكل : السلام عليكم..
فرغلى : سلام يا سيدى ..
توكل : سيادتك الأستاذ المبجل.. فرغلى اللمونى ..
فرغلى : ايوه يا سيدى.. أنا الأستاذ المبجل فرغلى اللمونى .. أى خدمة ..
صارخا فى فرحة
توكل :العفو يا ملك..أنا اللى خدامك وطوع يمينك..
ورهن أشارتة من صباعك الصغير ..
بغضب
فرغلى : نعم يا خويا .. ملك حتة واحدة ..
بتفاخر
توكل : أيييوه ملك .. وسيد الملوك كمان ..
فرغلى : ملك ايه ..وبتاع أيه.. انت مين يا جدع أنت..
وعايز أيه ..
توكل : أنا بشير السعد والهنا يا ملك..
وواحد من رعاياك المخلصين ..
فرغلى :أنت شارب حاجة يا جدع أنت..أختصر وقول عايز أيه
أنا وقتى ثمين ..
توكل : محسوبك توكل القرندلى المحامى بمملكة درب القطة
زوبة : درب البسة ..
توكل : القطة يا هانم .. درب القطة ..
زوبة : هانم الله يستر أصلك يا خويا ..
فى بكاء مصطنع
توكل :يؤسفنى ويمزق حشايا قلبى..ومعاميع فشتى ..
أن أبلغكم نبأ وفاة عمكم المبجل.. الله يرحمه ..
فرغلى :عمى أنا .. أنا عمرى ما كان لى أعمام..النمرة غلط
يا عم توكل ..
زوبة : أفتكر يا خويا..يمكن كان ليك واحد وتهتوا عن بعض
توكل : لأ يا ملك النمرة صح ..أصل دى حكاية قديمة ..
وخلاف فرق بين الأخين..أنت كنت لسه صغير لما
أبوك الله يرحمه خدك وطفش من درب القطة ..
وساب كل حاجة لعمك..عشان كان خايف عليك وعلى
مستقبلك ..
زوبة : أيوه ..زىما حصل فى الفيلم الهندى بالظبط ..كان له
عم ..وتاه منه ..
فرغلى : أفصلى شوية..يعنى انت عاوز تفهمنى .. أن عمى
أخو أبويا .. مات وأنا ورثته..
توكل : ورث كبير ..مملكة كبيرة .. ومستنية الملك ..
فى فرحة
فرغلى :يعنى أنا ورثت مملكة وبقيت ملك ..
صوت زغرودة من زوبة
توكل : تمام يا ملك..ملك مملكة درب القطة ..
زوبة : مبروك يا ملك ..درب البسة ..
توكل : القطة يا هانم ..القطة ..
فى صوت حالم
فرغلى :ملك .. أنا ملك..ملك مملكة درب القطة ..
يعلو صوتة
فرغلى :ودى فين ع الخريطة دى يا عم توكل..

( فيد اوت )
__________________________
( فيد أن )
(مسمع 3)
________
صوت نقر على باب
المديرة :أدخل ..
صوت باب يفتح ..
عبده الفراش:قهوة سيادتك ..
المديرة : أيه الهيصة والزغاريد دى ..
عبده : أصل عقبال عند حضرتك ..عم الأستاذ فرغلى تعيشى
أنتى ..مات ..
المديرة : وهو اللى بيموتله عم ..يزغردوله ..آه ما هو عم عبقرى
زمانه ..والعبقرية بتقول كده ..فى الحزن نزغرد ..
وفى الفرح نصوت ..
عبده : لأ ساعدتك ..الزغاريد دى..عشان الورث..أصله ورث
ورث كبير قوى ..
المديرة :المعفن ده له عم غنى ..سبحان العاطى ..
(فيد أوت _______________________________
(فيد أن )
مسمع 4
_____
فرغلى : أكتبى فى وسط السطر ..أستقالة ..
زوبة : فى وسط السطر ..أستقالة العبقرى ..
فرغلى اللمونى
نهاية الأولى
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الإثنين 17 سبتمبر 2012 - 22:02

الحلقةالثانية
______
مسمع 1
______
زوبة :كتبت يا أستاذى ومعلمى..إستقالة العبقرى..فرغلى اللمونى
فرغلى : الله ينور عليكى يا زوبة يا أروبة..أيوه..أستقالة العبقرى
زوبة :عجبتك يا عبقرى ..يعنى هتفتكر زوبة ..لما تستلم مملكتك
درب البسة ..
توكل غاضبا
توكل : القطة يا أروبة القطة ..
زوبة :القطة ..البسة ..المهم ..فيها رجالة كتير كده ..
توكل : طبعا ..مليانة رجالة تشرح القلب ..
زوبة : أنا ليه ..طلب واحد ..هو طلب زغنن قد كده..
فرغلى : أأمرى يا زوبة ..ده أنتى الوحيدة المؤمنة بعبقريتى ..
ورسالتى ..
زوبة : هو طلب واحد ..عريس ..لحسن خللت خلاص ..
وهطق من جنابى..
(فيد أوت )
_______________________________
(فيد أن )
مسمع 2
_____
صوت باب يفتح
عبده : البشرى ..البشرى ..
المديرة : مالك يا عبده داخل هاجم ع المكتب كده ليه ..
عبده : أعذرينى سيادتك ..خبر أستاهل عليه ترقية ..
المديرة : خبر أيه اللى مفرحك قوى كده ..
عبده : العبقرى ..
المديرة : فرغلى ..عمل أيه المعفن ده مفرحك قوى كده ..
عبده : قدم إستقالته ..وسابها لسيادتك مع السكرتيرة ..
صوت زغرودة المديرة
وصوت إرتطام كرسى بالأرض ..
عبده : الولية من فرحتها ..وقعت وغمى عليها م الفرحة ..
(موسيقى )
_________________________________

مسمع 3
_____
صوت موتور سيارة
فى صوت مرتعش
فرغلى : أيه ده يا عم توكل ..أحنا فين .. وايه الحتة الغريبة دى..
توكل : أصبر يا ملك . قربنا نوصل خلاص..
صوت مرتعش
فرغلى :أحنا خرجنا برة حدود مصر ولا أيه..
وايه ريحه العفانة الفظيعة دى .. يااااه دى ريحة
وحشة قوى .. وأيه أكوام الزبالة دى كلها ..
توكل :أحنا كدة بقى يبقى دخلنا فى حدود مملكتك ..
وهنا تقع مجارى المملكة ...على يمينك هنا مزبلة
المملكة..ومذبلة القاهرة كلها ..
فرغلى :فى الهوا كده ..والناس عارفة تتنفس أزاى ..
صوت فرامل السيارة
صوت جهورى أجش
دنجل :أنزل يا واد أنت وهوه .. تفتيش ..
فى خوف
فرغلى : دول أيه دول كمان .. وأيه السيوف والسنج والمطاوى
اللى ماسكينها دى.. أيه حيموتونا
توكل :أطمن يا ملك .. دول من رعاياك .. تعالى يا واد
يا دنجل قرب..
دنجل :أهلا يا عمنا . مين الواد السيس اللى معاك ده ..
أنزل ياله م العربية ..تعالى ..
فى فزع
فرغلى : ألحقنى يا عم توكل..
فى غضب
توكل : أرفع أيدك عنه يا كلب ..ده سيدك فرغلى اللمونى..
الملك الجديد ..
فى أستعطاف
دنجل :حقك عليا يا ملك ..سامحنى .. أبوس أيدك تسامحنى
اللى ما يعرفك يجهلك.. نورت مملكتك يا سيد الناس ..
صوت رصاص من مسدس
دنجل:دى تحية ملكنا.. وتاج راسنا الجديد ..
( فيد اوت )
__________________________________
(فيد أن)
مسمع 2
_____
صوت موتور سيارة
وصراخ اطفال
فرغلى :أحنا فين .. وايه العيال دى كلها ..طلعوا منين ..
توكل :أنت كده فى الأمان وجوه مملكتك وجاهك وسلطانك
فرغلى : هو أحنا كده لسه فى مصر ..
والعيال والبشر دى كلها مصريين ذينا برضة ..
و كلهم عايشين وسط المجارى وكوام الزبالة المعفنة
عادى كده ..مفيش مشكلة ..
توكل : ما هى دى يا ملك اللى بتسميها الحكومة بتاعتنا
المناطق العشوائية ..والناس البيئة..
تلاقى فيها ناس من قبلى ومن بحرى واللى بيته
أتهد على راسه وراس عياله ومش لاقى
حتة تتاويه وتستر عياله ..ييجى هنا ويبنيله
عشة صفيح ولا بطوب نى ..بس بشرط ..
فرغلى : شرط أيه ..واحد هيجى فى الطل ده ويبنى عشة
مين يقدر يمنعه ..
توكل : أنت يا ملك تقدر تمنعه..لازم الأول تديله موافقتك
بالبنا..ولازم يقدم فروض الولاء والطاعة
للملك..ويدفع الأتاوة الشهرية ..
آمال أيه دى مملكة وليها قوانينها وأصولها ..
واللى يخالف مالوش فى شرعنا ..
غير الطرد أو الحرق ..ودى شغلتى أنا بقى ..
أنت تأمر وأنا أنفذ أوامرك فى الحال ..
فرغلى :قول ..قول كمان يا عم توكل ..وأيه كمان ..أشجينى
كمان وكمان.. أخيرا هأمر ..ويبقالى كلمة ..
توكل : وده غيراللى هربانين من أحكام ويلاقواهنا أمان
ده غير أن هنا متوى للحرامية والنشالين وبنات
الليل ..
بس هتلاقى هنا كمان ناس شرفا وموظفين حكومة
ودول بنعتبرهم معدمين المملكة ..
يعنى من كل لون يا بتستة.. وكله عايش مع كلة..
فى درب القطة تلاقى كل أنواع البشر بخيرهم
وشرهم ...حتى المتطرفين والأرهابيين تلاقى ..
تجارالمخدرات والشمامين .. شحاتين تلاقى ..
بلطجية أنتخابات ..بلطجية مظاهرات تلاقى ..
ودول اللى بيدخلوا برادس وفلوس بالهبل ..
ليك وللمملكة..
فرغلى : ليا أنا.. وأنا دخلى أيه ..
توكل :هاى ..أصحى معايا..ده أنت الملك..
ودول رجالتك..الحكومة تأولك وتأبجك البرادس
والفلوس..وتقولك ع المطلوب..وأنت تديهم أوامرك
وهما ينفذوا ع العميان ..
وكلهم عايشين فى حماك وطوعك..
و درب القطة .. سيعاهم كلهم ..
فى جدية
فرغلى : طول عمرى وأنا بادور ع الرسالة اللى خلقنى ربنا
ليها.. دلوقتى بس انا اتأكدت ورسخ فى وجدانى ..
أنى مبعوث العناية الآلهية ليكى يا درب القطة..
يصرخ عاليا
فرغلى : يا درب القطة ..جالك فرغلى اللمونى ..
جالك العبقرى ..
عشان ينور لك طريقك ..

( موسيقى )
________________________________
مسمع 3
______
صوت باب يفتح
توكل :أدخل يا ملك برجلك اليمين وسمى..
دى بأه شقة عمك الله يرحمه..
واللى بقت شقتك .. بعد ما خده ربنا عنده ..
يصفر بفمه
فرغلى : يااه .. فخمة قوى ..
توكل : اصل عمك كان راجل فنجرى ..ويحب ينزة
نفسه ويدلعها .. وكان يحب يعيش كملك ..
فرغلى :راااه ..اللى يشوف درب القطة من برة والفقر
اللى معشش فى كل ركن فيها عمره ..
ما يتخيلش العز اللى انا شايفه بعنيه ده كله
يعنى الملك فى وادى ..ورعاياه فى وادى تانى
خالص ..
يهمس لنفسه
توكل : كله من دم الغلابة والاتاوات والنهب والسرقة ..
الله يجحمه مطرح ماراح بقى ..
يصرخ فى بكاء و خبث
توكل :كله من تعبه وكده وشقاه . الله يرحمه كان
راجل شريف وميقبلش القرش الحرام أبدا..
فرغلى :الله يرحمه ويبشبش الطوبة اللى تحت راسه..
توكل : والحمد لله .. فأنتم خير خلف لخير سلف ..
جعلك الله زخرا لدرب القطة وناسها الغلابة
فى تفاخر
فرغلى : الظاهر إن عمى كان عبقرى وصاحب رسالة
هوة كمان ..
يهمس لنفسه
توكل : عبقرى فى النهب والسرقة .. وصاحب رسالة
فى ضياع مستقبل الشباب وإستغلالهم ..
صارخا
توكل : سبحان الله .. تقولش فولة وإنقسمت نصين ..
الأخلاق واحدة والعبقرية كمان واحدة ..
وإن شاء الله تكمل رسالته العظيمة دى فى
عهدك الميمون ..
فرغلى :إن شاء الله .. بنفسك إنت وأهل الدرب هنحل
سوا كل المشاكل ..ونخليها جنة ..
توكل :إن شاء الله .. دلوقتى أنا عايزك تنام وترتاح ..
ومن بكرة إن شاء الله هاخدك أعرفك بأهل
مملكتك ورعاياك علشان تبتدى حكمك الميمون
ومش عايزك تقلق خالص..ومتفكرش فى حاجة
خالص .. ما دام عمك توكل معاك.. نام وجط فى
بطنك بطيخة صيفى ..
ياللا اسيبك دلوقتى تنام.. وبكرة نعمل جولتنا فى
مملكتك يا ملك ..وتزاول مهامك الجليلة..
فى مملكتك الجديدة..
درب القطة .. يا ملك درب القطة ..

(نهاية الثانية )
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الأحد 23 سبتمبر 2012 - 3:34

الثالثة
_____
مسمع 1
_____
اغنية لأم كلثوم
واصوات زهر طاولة
ونقرات قواشيط
توكل :دى بأه يا ملك.. قهوة اللمونى ..ودى من ضمن
أملاكك اللى ورثتها عن عمك ..واللى بتجمع
أهل الدرب ..وبتعمل فيها أجتماعاتك مع رعاياك
وتوزع عليهم المهام ..و
صارخا مع صوت
أقدام تبتعد مسرعة
وصراخ يخفت تدريجيا
فرغلى : حريقة .. حريقة .. حريقة فى ضهر القهوة ..
المملكة بتتحرق ..مملكتى بتتحرق ..حريقة ..
اقدام تجرى مبتعدة
صارخا
توكل : إرجع يابنى .. إرجع يا فرغلى ..
متضيعش نفسك إرجع .. بلاش تهور ..
كده الواد راح فى البلالة..

(فيد اوت )
____________________________
( فيد ان )
مسمع 2
_____
صوت أجش خشن
مسطول
هبو : أنطق ياله..لجز رقبتك..أنت مين ..ودخلت هنا أزاى..
فى رعب
فرغلى : طب أبعد السكينة دى عن رقبتى.. وأنا اقولك ..
يا عم توكل ..يا عم توكل ..
صوت اقدام
مسرعة قادمة
لاهث الانفاس
توكل : ارجع يا هبو .. ابعد السكينة عن رقبته
ل السلاح يطول ..
هبو : عم توكل .. انت تعرف الواد ده ..
وهو ينهج
توكل : ايوه يا هبو.. أيوه اعرفه .. ده عمك فرغلى
الملك الجديد ..ملك الدرب الجديد ..
فرغلى :ملك ايه بأه .. ده انا اتهزأت واتبعترت كرامتى
يا عم توكل ..
توكل :احمد ربنا .. ده انت اتكتب لك عمر جديد ..
هبو مبيتفاهمش .. بيجز الرقبة على طول..
فى سطل ورجاء وصوت بوس
هبو :السماح والعفو يا ملك .. سامحنى ابوس ايدك ..
ابوس ايدك ورجلك وراسك و..
توكل :قوله سامحتك.. مش هيبطل بوس..
ألا لما تقوله سامحتك ..
فرغلى : خلاص يا عم هباب أنت.. سامحتك ..
سيب أيدى هرتها بوس بأه..خلاص سامحتك ..
هبو :هبو ..هبو.. مش هباب ..
وانا مش هصدق أنك سامحتنى ألا لما تاخد من
إيدى البوسة دى ..
هامسا
توكل : خدلك بوسة..ده نفس م الجوزة ..
متزعلوش ..لحسن ده حساس ودمعته قريبة
خدلك بوسة وريحه..
هامسا
فرغلى :بس انا راجل صاحب رسالة ..وميصحش ابدا ..
هامسا فى خبث
توكل : الرسالة .. ولا رقبتك ..
هيه ..قلت أيه ..رقبتك ولا البوسة ..
صوت كركرة جوزة
فرغلى : رقبتى طبعا ..
فى صوت فرح
هبو :حلاوتك يا ملك.. بوسة كمان على روح المرحوم عمك
اللى كانت بوسته تسمع فى الدرب كلة ..
فى صوت مسطول
فرغلى : هيه البوسة دى.. فيها ايه يا زفت الطين أنت ..
هبو : خلاصة .. الخلاصة ..زيت هبو من أيد حبيبك هبو
حلوة صح حلوة ..
يضحك مسطولا
فرغلى :آه حلوة ..سجع ..هبو من أيد هبو ..
طب هات كمان هبوة..من أيد هبو..والبوسة
دى بأه..على روح أبويا الله يرحمه ..
صوت كركرة جوزة
وفى صوت حزين
هبو : ياااه ..الدمعة هتفر من عينى ..قد كده يا ملك كنت
بتحب المرحوم ..الظاهر كان عزيز عليك قوى
خد البوسة دى يا عم توكل ..
عشان تعزى بيها الملك فى موت أبوه ..
يعلو صوت كركرة الجوزة عاليا
فى صوت مسطول
فرغلى :يااه .. ده انت بتبوس حلو قوى يا عم توكل ..
هو .. احنا فين .. ومين دول ..
فى سطل
توكل :دول مقاطيع المملكة وشبابها الصيع ..
فرغلى : صيع ليه .. هما مبيشتغلوش ..
توكل :هما لقوا شغل ومشتغلوش.. النفر منهم تحفى
رجله وهو بيدور على شغل ..ميلقيش ييأس..
ييجى عند هبو..
فرغلى : ليه ييجى عند هبو ..هو هبو عنده شغل ..
توكل : شغل أيه بس ..بيجى عنده عشان ينسى..
فرغلى : ينسى ايه ..
فى صوت حزن
توكل : أحلامه وأحلام أهله اللى طفحوا الكوتة وشحتوا
علشان يعلموه.. وحطوا كل آمالهم فيه ..
وفى الآخر عاطل.. صايع .. ضايع عمك الله
يرحمه ياما نصحهم ميعلموش ولادهم ..
ويسيبوهم ليه يعلمهم مهنة تأكلهم الشهد..
فرغلى : ودى مهنة أيه دى.. اللى كانت هتأكلهم الشهد ..
توكل :ييييييوه المملكة مليانة شغل ..خد عندك ..
نشل .. سرقة.. شحاتة .. نصب ..بلطجة ..
مسمعوش كلامه..واهم قاعدين عاطلين .. اللى
بيشم واللى بيبرشم .. واللى .. واللى
فرغلى : وكل شباب درب القطة كده ..
توكل : لأ طبعا.. مش كلهم .. قوم نرجع القهوة..
حاسب لتقع .. أسند نفسك يا ملك ..
فرغلى :ملك أيه بأة ..الملك ما راح فى البلالة ..

( موسيقى )
_____________________________

مسمع 3
_____
ضجيج القهوة وأغنية لأم كلثوم
صوت كرسى يقع
توكل : حاسب لتقع ..وقعت ولا يهمك ما يقع ألا الشاطر ..
أأقعد هنا ع الكرسى ده ..
صوت أقدام قادمة
توكل : خد بالك م الراجل العجوز اللى جاى علينا ده ..
عمك لا كان يقبله ولا يحب قعدته و كلامه ..
صوت رجل عجوز
شلتوت :أهلا .. أهلا بالغالى ابن الغالى .. تعالى فى حضن عمك
شلتوت ..أبوسك ..
بصوت مسطول
فرغلى : بوس تانى.. لأ .. مين ده يا عم توكل ..
توكل :ده الأستاذ شلتوت.. ناظر مدرسة ع المعاش ..
وكان صديق المرحوم أبوك الروح بالروح..
وبيسموه شباب الدرب.. عدو البطالة الأول ..
فى صوت مسطول
فرغلى : آآه ..يعنى صاحب رسالة .. ذي.. .
ورسالتك فى أيه يا عم شلتوت يا عسل أنت ..
شلتوت : البطالة .. اللى مضيعة زهرة شباب الدرب ومتوهة
خطوتهم..وسرقه فرحة أهاليهم ..
فرغلى : طب وأنت فى إيدك إيه تعمله .. إذا كانت الحكومة
بجلالة قدرها مش قادرة تحل مشكلة البطالة ..
هتحلها أنت ..يا راجل يا عجوز ..
شلتوت : أنا يا ابنى بعمل اللى يقدرنى عليه ربنا .. بوجه
شوية..و بنصح شوية .. أشاور لهم ع السكة ..
والحمد لله ربنا وفقنى مع مجموعة كبيرة منهم ..
اللى بدأ بمشروعه الصغير .. واللى حطوا اديهم فى
ايدين بعض ..وتشاركو سوا ..واللى بعتهم للجمعيات
الأهلية أو البنوك اللى بتدى قروض ميسرة للشباب .
واللى أقنعته أنه يسافر للصحرا والوادى..ويبعد عن
الدرب وزحمته .. واللى واللى..
فرغلى : ياااه..أنا سعيد بيك قوى يا عم شلتوت .. ويسعدنى
بل يشرفنى كمان ..أنى أأقابل صاحب رسالة ذيى
فى الدرب..وبصفتى ملك درب القطة وصاحب الشرعية
عينتك مستشارى الخاص لشئون شباب المملكة ..
والله الموفق والمستعان ..
يحدث نفسه
توكل : آآآه .. أهو ده اللى كنت خايف منه
شلتوت كل الواد وحطه فى جيبه ..
وضعت يا توكل ورحت فى الفاسخونيا
(موسيقى )
_________________________________
مسمع 4
______
توكل :أحنا دلوقتى واقفين قدام بيت جدك .. اللمونى الكبير..
فرغلى:ونعديله ازاى يا عم توكل .. دى المجارى بحرقدامه ..
وكوام الزبالة سده بابه ..
توكل :شايف صف الطوب المحطوط ده.. هنمشى عليها واحدة
واحدة ..لما نوصل للناحيه التانيةهعدى أنا الأول وأنت
ورايا ..تعمل ذى ما اعمل ..يالا ..واحدة ..واحدة ..
صوت اقدام فى المياة
صارخا
توكل : حاسب .. وقعت .. معلش قوم.. بكرة تتعود ..
عدى هات ايدك يا ملك ..
فرغلى :ملك ايه بأه..اللى ريحته طافحة مجارى ..
شلتوت : بكرة تتعود ..ع الريحة ..وتعدى ذى البهلوان ..
توكل : ده بأه البيت اللى إنت إتولدت فيه .. ومن قبلك
ابوك وعمك ..
فرغلى :فيه سؤال محيرنى ؟ من ساعة ما جيت الدرب
نفسى أسألهلكوا ؟
(نهاية الثالثة)
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الثلاثاء 25 سبتمبر 2012 - 6:50

الرابعة
_____
مسمع 1
______
فرغلى :السؤال ده محيرنى من ساعة ما جيت ..
شلتوت :اسأل يابنى أى سؤال يخطر على بالك ..
فرغلى :ليه المملكة إسمها درب القطة .. ومش درب
اللمونى ..على إسم جدى يعنى ..
ضاحكا
توكل :يااه يا فرغلى يا بنى ..رجعتنا لتاريخ قديم قوى ..
شلتوت : أنت طبعا من حقك تعرف أصلك وفصلك يابنى ..
صلوا ع النبى..
توكل : عليه الصلاة والسلام ..
فرغلى :عليك ألف صلى يا نبى ..
شلتوت :فى الهوجة اللى حصلت من هجرة الصعايدة
والفلاحين من قبلى ومن بحرى .. على المحروسة
عشان لقمة العيش ..وحلمهم فى حياة كريمة ليهم
ولولادهم من بعدهم ..كان جدك الكبير اللمونى ..
م اللى سابوا الريف وجم مصر .. وذى كل اللى جم . .
مرة يبيع خضار..ومرة .. يشتغل فى المعمار والبنا ..
وفضل على كده يتنقل من حتة لحتة ..ومن شغلانة
لشغلانة ..لحد ما رسى معاه الحال جنب أرض مزروعة
ليمون.. بقى يملى قفة الليمون وينزل يبيعها ويرجع
هنا تانى .. بنى لجدتك عشة فى مكان البيت ده..
واللى واقف قدامه.. والعشة بقت اودة مبنية بالطوب
النى .. والأودة بقت بيت .. والبيت بقى بيوت .. وناس
جم .. منين محدش يعرف .. زرع شيطانى..
فرغلى : آه من هنا بأه جه أسم اللمونى .. طب دى حكاية أسم
اللمونى ..ايه بأه حكاية القطة ..ودرب القطة ؟
ضاحكا
توكل :دى بأه أحكيها لك أنا .. لما جدك وجدتك بنوا العشة
فى مرة.. كانواقاعدين جواها وقفلينها عليهم ..
يضعف الصوت تدريجيا
توكل : طلعت عليهم من تحت الارض ..
بسم الله الرحمن الرحيم ..
( فيد أوت )
_________________________________

(فيد أن )
مسمع 2
______
صوت مواء قطة
صوت رجل عجوز ..
الجد : بسم الله الرحمن الرحيم ..أعوذ بالله من الشيطان الرجيم ..
بس ..بس برة .. طلعت منين القطة دى ..
صوت امرأة عجوز ..
الجدة : سيبها يا لمونى ..متخوفهاش منك يا راجل ..تعالى ..
الجد : أبعدى عنها يا ولية ..الله أعلم دى جن ولا شيطان ..
أنا خايف تفزع العيال فى نومتهم ..ولا تسخطهم ..
الجدة :سيبها أنت بس ..ومتدخلش بيناتنا..تعالى يا حبيبتى
أطلعى هنا وأقعدى على حجرى ..أيوة كده ..
الجد : يا ولية أنتى أجننتى ..مش شايفة شكلها ..فى قطة
سمينة كده ..ولا لونها الأسود ..
الجدة :أطلع أنت منها بس..تعالى..متخافيش منه ..ده قلبه ذى
اللبن الحليب ..لما تعاشريه ..هتعرفى أنه راجل بتاع
ربنا ..هو بس هايب منك شوية ..
(فيد أوت )
__________________________________
( فيد أن )

مسمع 3
______
فى خوف
فرغلى : اللهم أما أحفظنا ..دى أكيد كانت جنية ولا عفريت ..
توكل :ممكن ..وقعدت تلف حواليهم وتبص لهم .. وتتمسح
فى جدك شوية ..وتطلع على حجر جدتك شوية..
صارخا
توكل : وهوب ..
فى فزع
فرغلى :أيه ..سخطتهم ..
توكل :لأ ..طلعت ونامت على حجر جدتك ..جدتك ملست عليها
وقعدت تقرا قرآن ..
ومن يومها والقطة.. ولفت عليهم وعاشت معاهم..
وكان للقطة نظام مبتغيروش ..
الصبح تطلع تلف حوالين الأرض ..وترجع بعد أدان
المغرب تقضى الليل معاهم..
وميحللهاش النوم ..ألا فى حجر جدتك ..
فى النهار..طريقها متغيروش .. بقى كل اللى ييجى
لجدك عايز يبنى عشة ولا اودة
جدك يقوله امشى ورا القطة ومطرح ما تقف ابنى ..
ومن يومها .. اتعرفت المنطقة كلها بدرب القطة ..
فرغلى : وراحت فين القطة دى ..
شلتوت : سبحان الله يا فرغلى يا بنى ..جدتك دفناها من هنا
والقطة أختفت هى كمان.. ومبنلهاش آثر ..
تقلش الأرض أنشقت وبلعتها ..
(موسيقى)
________________________________

مسمع 4
______
توكل :تعالى يا فرغلى..أدخل..هات إيدك ..هو ضلمة شوية ..
شلتوت:ما تخش يا ابنى ..خايف قوى كده ليه ..وشك اصفر
فرغلى :خايف بس ..ده أنا مرعوب وقلبى فى رجليه..
شلتوت: من أيه بس ..؟؟
فرغلى: أنتوا مش قالتولى.. أن ده البيت اللى انشقت فيه
الأرض و طلعت منه القطة..
فى نبرة تخويف
توكل:أيوه.. هو ده البيت اللى طلعت من بطنه..اللهم اما احفظنا
ويجعل كلامنا خفيف عليهم .. القطة السودا ..
فرغلى :ومش عايزنى اخاف ..بلاش أنا والنبى ..خلاص أنا شفته
من برة .. كفاية قوى ..بلاش جوة ..
شلتوت :عيب عليك يا راجل يا مثقف.. تصدق فى الخرافات دى ..
آمال سبت أيه للجهلة والمتخلفين ..
فرغلى: يا سلام يا خويا ..ما انتوا اللى قلتولى حكاية القطة اللى
خرجت لجدى وجدتى ..من تحت الأرض ..
يضحك توكل
توكل : ومش كده وبس ..دى رجعت تانى لبطن الأرض ..يعنى
هى موجودة دلوقتى ..تحت البيت ..وممكن تطلع لما تشم
ريحتك وتعرف أنك حفيد اللمونى ..
فرغلى :ما هو ده اللى خايف منه ..
شلتوت :خش يا واد بلاش كلام فارغ ..ما احنا معاك أهو ..
هات ايدك وقوى قلبك سمى بالرحمن ..
فرغلى :بسم الله الرحمن الرحيم .. ياااه.. ده بير السلم ضلمة قوى
وريحته تخنق..
شلتوت:ما هو بنى عشوائى بأه ..لا عاملين فيه حساب لشمس
ولا هوا ..
صوت صفعة
صارخا
فرغلى: آى .. ايه ده بأه .. أنا اتلزقت على قفايا .. مين اللى
لزقنى على قفايا ..
شلتوت:مين يابنى اللى هيتجرأ ..ويلزق الملك على قفاه ..ده
يبقى أتجنن .. يجوز اتخبطت فى حاجة فى الضلمة
وجت فى قفاك ..
فرغلى: والله يا عم شلتوت ده قفا .. لزقة قفا .. عارفه وحفظه
وحسه..من أيام مظاهرات الجامعة..لما كنا نطلع م
المظاهرة ..يلمونا وياخدونا على مباحث أمن الدولة
وفى أمن الدولة..يوقفونا صف وكل واحد يكشف قفاه
وهوب لزق قفا ..لزق قفا ..لزق قفا ..يعنى دى مش اول
مرة اتلزق فيها على قفايا..
ضاحكا
توكل :يا خبرة فى لزق القفا..متاخدش فى بالك يا ملك..عديها ..
يا راجل ..واهى لزقة تفوت ولا حد يموت ..
صراخ اطفال
صارخا فى فزع
فرغلى :ايه ..فى أيه.. مين دول .. عفاريت ..
شلتوت:عفاريت ايه بس..متخافش كده.. دول ولاد ام اسماعيل ..
فرغلى:ام اسماعيل .ام اسماعيل مين ..
توكل :مرات ابو اسماعيل .. اللى ساكنين تحت بير السلم ..فى
الأودة اللى قدامك دى ..
صوت رجل
مريض
ابو اسماعيل : اتفضلوا يا بهوات .. مش قادر اقوم لكم ..
فرغلى :خليك مستريح .. انا هقعد جنبك ع الارض ..
سلامتك يا ابو اسماعيل ..مالك فى ايه..
ابو اسماعيل:الله يسلمك يابنى ..العيا هد حيلى..ومبقتش عارف
أأقوم من مكانى ..
صرخ أطفال
فرغلى:عيا ايه اللى هد حيلك .. دى ام اسماعيل اللى هدت
حيلك..كل دول عيالك يا راجل..ومش عايز حيلك ينهد
ابو اسماعيل: أيوه يا بنى ..كلهم عيالى ..
شلتوت:ده غير اللى سرحوا مع ام اسماعيل ..
ابو اسماعيل :هو الباشا حكومة ..هى الحكومة بيقفشوا اللى
عندهم عيال كتير ..ومحددوش النسل..
توكل:لا يا ابو اسماعيل..البية مش حكومة ولا حاجة..
ده الملك الجديد .. حفيد اللمونى الكبير..وجاى يشوف بيت
جدة وابوه ..
ابو اسماعيل: اهلا بريحة الغالى .. ااقوم اعملك شوية شاى ..
اصل ام اسماعيل خرجت على رزقها ..هه ..
فرغلى: ااقعد يا عم .. انت قادر تقوم ..انا عارف انتواعايشين
ازاى فى التربة دى..
فرغلى يكح
كحات متواصلة
فرغلى:هوا..هوا..عايز هوا .. مش قادر اخد نفسي..اتخنقت ..
صوت اقدام تبتعد
توكل:خد نفسك .. خد نفسك ..
صوت طرقعة صفعة
فرغلى:آى .. تانى .. قفايا تانى ..
( موسيقى )
_______________________________
مسمع 5
_____
صوت ضجيج القهوة
انفاس لاهثة لفرغلى
شلتوت: خد شهيق عميق ..ايوه ..أكتمه ..أزفره بأه ..
توكل:اشرب كباية المية دى .. يابنى شيل ايدك من على قفاك
خلاص خرجنا م البيت ..
فرغلى:ايه ده ..احنا كنا فين .. وايه البيت الغريب ده .. الناس
دى عايشة ازاى من غير هوا ولا شمس..
ده يموتوا..
(نهاية الرابعة )
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الجمعة 28 سبتمبر 2012 - 8:31

[color=#000000]

الخامسة

______

مسمع 1

_______

فرغلى: ما هو بيت لا بيدخله ..هوا ولا شمس ..يبقى تربة ..

شلتوت:ما هو يا بنى طول عمر البيوت العشوائية كده .. لا

فيها نور ولا هوا ولا شمس ..ما هو سموها عشوائية

عشان كده ..

فرغلى:وايه حكاية ابو اسماعيل وعياله..دول ييجوا عشر عيال

توكل: لا وأنت الصادق اتناشر عيل .. وكلهم بنات..

فرغلى:كلهم بنات .. آمال فين اسماعيل .. هو مش اسمه

ابو اسماعيل برضه ..

شلتوت:ياااه حكاية ابو اسماعيل دى هي نفسها حكاية الجهل

والتخلف والتقاليد المعفنة..والمفاهيم الغلط اللى مغروزة

جوانا..قال ايه..الولد عزوة لبوه .. وخلفة البنت مصيبة

الواد.. يشد ضهر ابوه ..والبنت.. تكسر ضهره ..

توكل:تعرف يا ملك.. ابو اسماعيل ده كان راجل يملا العين

بصحيح.. طول بعرض..طور يدور ساقية.. لو دخل فى

حيطة يهدها .. ولا ام اسماعيل يا عينى عليها

كانت ولا البدر فى تمامه ..جمال ايه .. وحلاوة ايه ..

شباب وصحة..فرسة.. بلغتكم أنتم يا شباب اليومين دول

موزة..الرجالة كان قلبها بيهفهف..لما كانت تعدى بس من

قدامهم .. يييييييييييوه ..

فرغلى: ياااه.. معقولة.. للدرجة دى..

شلتوت :لما اتعشم ابو اسماعيل فى جدك يجوزهاله.. بنى له

الاودة اللى تحت السلم وجوزهاله اصل جدك ..كان

بيحبه قوى..وهو كمان كان مخلص فى خدمته .. وحلف

ان اول مولود يسميه اسماعيل..على اسم جدك وبأه

يناديلها يا ام اسماعيل .. ويشاء ربك ما يرزقوش غير

بنات .. مرضيش بحكم ربه ..وكابر..وفضلت تولد له فى

بنت ورا بنت .. يقولها عايز الولد..ربك يخلف ظنه ..

وتجيب له بنت.. حاولت انصحه وافهمه وافكره بكلام ربنا

اللى قاله فى كتابه العزيز

صوت فخيم

شلتوت: بسم الله الرحمن الرحيم..يهب لمن يشاء إناثا ويهب

لمن يشاء الذكور او يزوجهم ذكرانا وإناثا ويجعل من

يشاء عقيما .. صدق الله العظيم

صوت فرامل ميكروباص

توكل:بص هناك يا ملك ..شايف اللى نازلة م الميكروباص

دى .. اهى دى بأه يا سيدى.. ام اسماعيل ..

فرغلى:معقولة..قول كلام غير ده يا عم توكل .. بقى الجلد

على عضم دى..كانت الموزة اللى بتحكوا عنها..

دى فرسة دى .. وايه العيال اللى معاها دول ..

توكل: دول بناتها ..اللى بيشتغلوا معاها ..

فرغلى: وبتاخدهم معاها المصلحة اللى بتشتغل فيها ..كده

عادى..ومديرة المصلحة بتسمح لها ..

شلتوت:مصلحة ايه يابنى بس..دى بتاخدهم تشحت بيهم على

باب محطة مترو الانفاق..

صوت أقدام مسرعة تقترب

فرغلى : ايه الحكاية ..البت جت جرى عليك يا عم توكل ..رمت

فلوس قدامك ..ورجعت لأمها جرى ..وأنت دسيتهم فى

فى جيبك ..

توكل :بعدين ..بعدين هفهمك الحكاية يا ملك ..

شلتوت :وليه بعدين ..أفهمك أنا ..الفلوس دى نسبتك ونسبة

رجالتك ..دنجل وعصابتة ..

فرغلى : نسبة ايه ورجالتى مين ..أنا مش فاهم ايتها حاجة ..

فى نبرة تهديد

توكل : ما قلت لك بعدين يا شلتوت ..على مهلك ع الراجل ..واحدة

واحدة ..

فى نبرة غضب

شلتوت :لا بعدين ولا قبلين ..أنا قايم وسيبهالكوا..

صوت أقدام تبتعد

فرغلى :استنى يا عم شلتوت ..فهمنى ايه اللى بيحصل ..

توكل :أأقعد يا ملك وانا هفهمك كل حاجة ..وبلاش تدخل الراجل

الحشرى ده فى شغلنا ..

فرغلى :شغلنا ..احنا لينا شغل مع ام اسماعيل ..

توكل :سبق وفهمتك أن لينا شغل مع الدرب كلة ..

فرغلى :حتى ام اسماعيل ..

توكل : حتى ام اسماعيل ..افهمك ..ام اسماعيل قبل ما تخرج

وتسرح بعيالها ..تمر الأول على دنجل ..ودنجل شغلته

يحدد لها محطة المترو اللى هتقعد تشحت عليها هى

وعيالها..ويسيب عيل من عيالة يراقبها ويحميها ..وفى

آخر اليوم يلمها هى وعيالها والمتوزعين حواليها من

أهالى الدرب ..ويرجعهم كلهم فى ميكروباص ..

والخدمات دى كلها.. فى مقابل تمانين فى الميه من الغلة

وطبعا كان عمك اللى بيستلم الغلة ويوزعها على رجالتة

والمفروض دلوقتى أنك تستلمها وتوزعها ..وعشان

أنت لسه مدخلتش فى الجو ..أنا بقوم بمهامك دى لغاية

ما تتودك.. وتخش معانا فى الجو ..

فى حسرة

فرغلى:ياااه .. ده كده الرسالة بقت صعبة قوى عليك يا عبقرى..

توكل:ياللا يا ملك .. كفاية عليك اللى عرفته و شفته النهاردة ..

قوم استريح لك شوية .. وبكرة نكمل ..

هتروح على بيت جدك ولا عمك ..

فى فزع

فرغلى: لأ.. بيت جدى لأ .. قفايا اتهرى م القطة وعفاريتها..



( موسيقى )

_______________________________





مسمع 2

_____

صوت اقدام تصعد سلالم

فرغلى:ايوه..بيت عمى أضمن..مفيهوش ..لا قطة ولا عفاريتها..

صوت صفعة

فرغلى:آى.. تانى .. كمان هنا فى لزق قفا ..



( موسيقى )

__________________________________



مسمع 3

______

صوت شخير فرغلى

صدى صوت

صوت كأنه عفريت

الصوت : هوووووووو .. يووووووووو ..هييييييييي..

نقر على الزجاج

يتثآئب وفى صوت مرتعش

فرغلى :ايه ده بأه كمان ..يا ساتر يا رب ..

الصوت :هووووووووو .. ووووووووووه..هيييييييييييييي

صارخا فى خوف

فرغلى : مين .. مين .. أنت مين..

الصوت:انا العفليت .. هاهاها ..أنا العفليت ..هاهاها ..

فرغلى :يا لطيف اللطف يا رب ..عفريت..أنا يطلعلى عفريت أنا

أنا اللى بخاف م القطة..يطلعلى عفريت ..

وعايز ايه منى يا عم العفريت ..

الصوت:عايز أكلك هم ..هم هم هم..

فرغلى: عايز تاكلنى .. هم هم هم ..

بس أنا طعمى وحش قوى ..ومش هيعجبك ..

الصوت :طعمك وحش ..يععع.. طب أأقولك.. أسخطك..أيوه

أسخطك قرد..لا ..لا.. أسخطك حمار احسن.. عشان أنا

بحب الحمير..واغنيلك ..باحبك يا حمارى ..

أنت تحب اسخطك ..قلد(قرد) ..ولا حمار ..

تزداد الاصوات

صوت زجاج ينكسر

صوت اقدام تجرى وتبتعد

صوت باب يفتح

فرغلى :الحقونى .. الحقونى .. العفريت هيكلنى .. عفريت ..

عفريت ..

صوت صفعة

مع صوت

اقدام تجرى

فرغلى: العفريت لزقنى على قفايا .. الحقونى .. الحقونى ..

صوت اقدام مسرعة

تقترب

توكل :ايه يا فرغلى .. في ايه .. أهدى..أهدى وشيل ايدك من

على قفاك ..

فى فزع

فرغلى:عفريت يا عم توكل عفريت .. اللى بيلزقنى على قفايا فى

الطالعة والنازلة طلع عفريت .. عفريت ..ده كان عايز

ياكلنى ..وبعدين يسخطنى قرد ..لا لا ..يسخطنى حمار

أيوه حمار..أصله بيحب الحمير ..

توكل: عفريت ايه يا بنى بس ..

فرغلى:أنا شفته من قزاز الشباك .. عينيه بتطق شرار.. وبقرنين

وبيطلعلى لسانه ..بيغظنى ..

صوت اقدام تقترب

شلتوت: في ايه .. صوتك صحى الدرب كله..خير.. حصل أيه ..

فرغلى :عفريت يا عم شلتوت عفريت..كسر قزاز الشباك وهجم

عليه .. وراح لزقنى على قفايا ..وكان عايز ياكلنى

مش كده وبس ..

شلتوت :ايه تانى..

فرغلى :ده كان عايز يسخطنى حمار ..حمار يا عم شلتوت حمار ..

فى تلعثم وأرتباك

شلتوت:أهدى بأه خلاص .. مشى .. أطمن انصرف خلاص ..

أدخل كمل نومك ..

فى خبث

توكل :أيوه خلاص .. أهدى واطمن ..عمك شلتوت صرفه و حبسه

فى قمقم خلاص ..

ينفجر شلتوت

فى بكاء شديد

فرغلى: فيه ايه يا عم شلتوت .. هو لزقك على قفاك انت كمان .. شلتوت:أنا مش عارف اتأسف لك ازاى يابنى .. أنا تعبت ..

والله يابنى أنا فى نص هدومى منك

توكل:مش وقته الكلام ده يا شلتوت .. نطلع فوق الاول ..

ياللا يا ملك متخافش خلاص العفريت صرفهولك عمك

شلتوت .. تعالى ..وشيل إيدك من على قفاك ..

يضحك

توكل :خلاص اللى بيلزقك انصرف ..


( فيد اوت )

( فيد أن )



مسمع 4

_____

توكل :ادخل يابنى متبقاش خواف كده.. وشيل إيدك من على

قفاك..طيب أنا هدخل قدامك عشان تطمن..آهه..

أطمنت حصلى حاجة..

صوت صفعة

(نهاية الخامسة)



[/c
olor]


عدل سابقا من قبل رضا الهجرسى في الأربعاء 17 أكتوبر 2012 - 10:18 عدل 1 مرات
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الأربعاء 17 أكتوبر 2012 - 10:16

السادسة
______
مسمع 1
_____
صوت صفعة
توكل : آى..يا بن الكلب..هي حصلت يا شلتوت الكلب أنت وابنك
ضاحكاويصفق
فرغلى : لزقك يا عم توكل ..العفريت لزقك على قفاك ..
فى غيظ يحدث نفسه
توكل :طيب يا اهطل يا ابن الاهطل..أنت رجعت تانى تلزقنى على
قفايا ..
اصوات اقدام
سريعة
توكل :مسكتك ..ومش هسيبك ..
الاهطل:سيبنى يا ابن الكب(الكلب) .. يا ابن الكب يا توكل ..
سيبنى ..سيبنى ..
فرغلى : يبقى مين الواد العبيط ده ..انت تعرفه..
توكل : طبعا أعرفه ..واعرف ابوه كمان .. ده بقى العفريت ..
اللى بيلزقك على قفاك ..فى الطلعة والنازلة..
فرغلى:معقولة ..المتخلف العبيط ده ..هو العفريت ..
الاهطل:سيبنى يا ابن الكب انت .. سيبنى .. هالبك ..
هالبك على قفاك ..
فى صوت حزين
شلتوت:سيبهولى أنا يا توكل..تعالى يابنى الله يهديك اروحك ..
سيبه يا توكل..
الاهطل :لا .. هه .. انا عايز العب مع الواد ده .. قفاه كبير وحلو
وعاجبنى ..اصل قفاه بيطرقع جامد ..
فرغلى : تانى .. ده انت هريته ..ده أنت أيدك أتقل من بتوع أمن
الدولة ..
شلتوت:تعالى يابنى الله يهديك .. تعالى يا حبيبى ..عارف لو
سمعت كلامى وجيت معايا ..هجيبلك عزيزة ..
الاهطل فى فرح
الاهطل : هتجيبلى عزيزة ..ماسى ..ماسى ..هات عزيزة..
فرغلى : يااه ..ده فرح قوى لما سمع اسم عزيزة ..مين عزيزة
دى ..
توكل : دى حتة بت مسترجلة ..والعبيط الاهبل ده بيحبها ..
الاهطل:آه بحبها ..بحبها وشلتوت هيجوزهالى ..
يغنى
الاهطل: انا احب عزيزة وهى تحبنى ..
أركب العجلة وهى تذقنى..
اصوات اقدام تبتعد
مع صوت الاهطل
الاهطل:هيه .. هيه .. أنا عزيزة اللذيذة .. والبوسة منى ببريزة
فى صوت حزين
فرغلى :لا حول ولا قوة ألا بالله ..اللهم أما أحفظنا ..اللهم ما
أحفظنا .. مين ده يا عم توكل..
فى سخرية وخبث
توكل : ده بقى يا سيدنا .. ابن معلم الأجيال وصاحب الرسالة
اللى عملته مستشارك الخاص ..
فى إستغراب
فرغلى:أبن الأستاذ شلتوت..معقوله..الراجل الوقور ده وصاحب
رسالة ذى..ابنه متخلف عقلى ..
فى خبث
توكل :مربى الاجيال اللى سلمت له دقنك ..أهو معرفش يربى
ابنه الوحيد .. ومش بعيد تلاقيه هو اللى مسلطه عليك
يلزقك على قفاك فى الطلعة والنازلة عشان يطفشك
م الدرب ..ويحكم هو مكانك .. ده راجل سو وخبيث ..
خد بالك منه وفتح عينك ده راجل العوبان ..
وأعرف بقى مين اللى بيخدمك بأخلاص ومين بيغشك ..
فرغلى :معقولة الكلام اللى بتقولهه .. انا مش مصدق ودانى ..
عم شلتوت..بيغشنى انا ..و طالق أبنه المتخلف عليه
عشان يطفشنى ..ويحكم مكانى .. كلام معقول برضة..
توكل :ما هو كان عايز يبقى الملك ..مكان عمك الله يرحمه ..
فرغلى : معقولة عم شلتوت.. بالأخلاق الوضيعة دى ..
توكل :صدقنى يا ملك .. عمك توكل هو المخلص الوحيد ليك
فى درب القطة كلها ..وباخدمك باخلاص لوجه الله تعالى
أى والله .. لوجه الله ..وأنا الوحيد اللى حفيت رجليه
عشان يلاقيك ويجيبك تاخد حقك..وتستلم ملكك..
فرغلى:اخص عليك يا عم شلتوت .. وانا اللى آمنت لك..
وصدقت انك صاحب رسالة زيى ...
أشكرك يا عم توكل أنك شلت الغمامة من على عنيه..
وعرفتنى ..مين عدوى ..ومين صديقى ..
وانت م دلوقتى ..مستشارى الخاص ..
فى خبث
توكل : العفو يابنى العفو..عمك توكل دايما هتلاقيه فى خدمتك
ورهن أشارة من صباعك الصغير ..
يا ملك درب القطة ..وحاميها ..
ومبعوث العناية الآلهية ..صح الكلام ..
فى تفاخر
فرغلى :صح الكلام ..

( موسيقى )
______________________________


مسمع 2
_____
نقر على باب
فى فزع صارخا
فرغلى : مين .. مين.. مين اللى بيخبط..
شلتوت :افتح يا فرغلى يابنى.. انا عمك شلتوت..متخافش افتح ..
أنا لوحدى ..
فرغلى :لو انت عم شلتوت بصحيح .. أدينى أمارة ..
شلتوت :بإمارة العفريت اللى لزقك على قفاك ..
صوت باب يفتح
فى ضيق
فرغلى :خير يا عم شلتوت .. فيه أيه تانى .. عايز تلزقنى
على قفايا تانى ..أتفضل يا سيدى ..قفايا ..آهه ..ألزقنى
ألزق ..ما انا خلاص فهمت الفولة..وقاعد.. مش ماشى .. شلتوت :يا بنى أرحمنى ..متبقاش أنت والزمان عليه .. ده انا
فى نص هدومي منك ..ومن اللى حصلك ..
و مقدرتش انام ولا يغمض لى جفن .. قبل ما افهمك
واحكيلك حكايتى مع الزمان ..
فى ضيق واستهزاء
فرغلى:لأ ماخلاص يا ست وردة ..انا فهمت كل حاجة ..
وعرفت ليه سلطت ابنك الشحط ده..يعمل اللى عمله
بس فتتك حاجة مهمة قوي..إن اللى قدامك ده ..عبقرى ..
وصاحب رسالة ..ومتفتوش الفوتة .. وولا عشرة ذى إبنك
الشحط ده يهزونى ..ويخلونى اسيب الدرب ..
شلتوت :شحط ايه يابنى بس .. ده طفل صغير ..
فرغلى :الهلف ده طفل..أنت فاكرنى أهبل ولا عبيط.. ده عمره
ميقلش عن عشرين سنة بالميت..
شلتوت :اتنين وعشرين يا فرغلى يابنى ..اتنين وعشرين ..
فرغلى: وقعت بلسانك أهو.. هو في طفل..عنده اتنين وعشرين
سنة ..هنكدب من أولها ..
يحدث نفسه
فرغلى : كلامك طلع صح يا عم توكل.. طلع راجل كداب وملاوع
فى حزن
شلتوت : اسمعنى يابنى الله يخليك .. خلينى أبعبع معاك و ارتاح .. فرغلى :هتدافع عن نفسك تقول ايه ..هه.. سمعنى يا سيدى ..
أشنف آذانى..اطربنى ..أشجينى ..

(فيد أوت )
_______________________________
( فيد أن )
مسمع 3
______
فى صوت حزين فخيم
بصدى صوت
شلتوت :حكايتى ابتدت من أربعين سنة.. كان ليه بنت عم ..
اتربينا سوا.. وحبينا بعض حب كبير قوى ..
اتخرجت م الجامعة.. واتقدمت لعمى ..وطلبت منه
يجوزهالى.. رفض..عشان انا فقير ولسه مكونتش نفسى
ومش هقدر اسعدها ..
وجوزها لتاجر غنى عشان يضمن لها مستقبلها ..
كانت صدمة كبيرة عليه قوى .. على ما فقت منها كانت
السنين عدت والزمن سرق عمرى.. وحبها مكلبش فى
قلبى ..ومفيش ست تانية قدرت تحل محلها فى قلبى ..
فى رقة
فرغلى :ياااه .. ده انت كنت واد حبيب كبير قوى .. وبعدين يا
روميو..حصل ايه ..
شلتوت:سنين مرت.. ووراها سنين.. و عرفت بالصدفة
انها اتطلقت من جوزها عشان مبيخلفش ..
مشعرتش بنفسي ..والدنيا مسعتنيش م الفرحة..
جريت عليها وعرضت عليها الجواز.. وافقت على طول
واتجوزنا
فى رقة
فرغلى : ياااه .. ده أنت ولا قيس فى زمانه .. وبعدين ..
شلتوت:ونسيت سنين الحرمان اللى عشتها .. وربك اراد واحنا
فى السن دي انها تحمل .. والدنيا مسعتشى فرحتنا ..
الدكاترة كلهم نصحونا بعدم الخلفة فى السن الكبيرة و دى
لخطورتها على الأم وع المولود..
مسمعناش كلامهم .. وحلم الأولاد وعزوتهم .. نستنا
عمرنا اللى جرى بينا ..
فرغلى: طب وهو الخلفة ليها سن..
شلتوت:كل الدكاترة أجمعوا خطورة الحمل للست اللى تعدى
الأربعين.. ده مش كده وبس ..
ده فى الأخطر ..
فرغلى: أيه كمان .. ده انت حكايتك كلها مآسى وتقطع القلب ..
شلتوت: قالوا ..إن احنا قرايب .. ولاد عم يعنى ..
فرغلى: ودى فيها ايه دى كمان..
شلتوت:قال ايه.. جواز القرايب بينقل الامراض الموروثة من
الجدود ..
فرغلى: صح .. حتى احنا بنقولها بالبلدى كده ..
العرق يمد لسابع جد ..
شلتوت:المهم..رمينا كل كلامهم ده ورا ضهرنا..
والنتيجة اهه شفتها بعنيك ..
ولد متخلف عقليا ..امه ماتت وهية بتولده جالها تسمم
حمل ..وراحت فيها عند خالقها ..وسبتهولى أتعذب بيه
فرغلى يبكى بشدة
فرغلى :كفاية ..حرام عليك يا شيخ ..قطعت قلبى ..
شلتوت يبكى بشدة
شلتوت :على الله تكون سامحتنى .. وعفيت عن ممدوح ..
فرغلى : ممدوح ..ممدوح مين ..
شلتوت: ممدوح ابنى ..العفريت اللى كان بيلزقك على قفاك ..
فرغلى :متفكرنيش.. حرام عليك .. قفايا نقح عليه ..
لما جبت سيرته ..
( نهاية الحلقة ال
سادسة )
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الإثنين 29 أكتوبر 2012 - 15:18

السابعة
_____
مسمع 1
______
صوت ضجيج القهوة
دنجل:صباح الصباح يا عمنا ..
توكل: دنجل ..بتعمل أيه هنا ..وسايب مكانك ع الحدود ..أنا مش
منبة عليك يا طور ..مكانك متسيبوش ابدا ..
دلوقتى لو حصلت كبسة م البوليس .. مش هنلحق نلم
نفسينا .. ورحنا فى البلالة ..
دنجل: اطمن يا عمنا ..أنا موقف الواد مشرط مكانى ..
ومديلة كل صلاحياتى لحد ما ارجع ..
توكل :اختصر ..أيه الحاجة المهمة قوى كده اللى سيبتك
مهامك الجليلة فى تأمين حدود الدرب..
دنجل : مسكت جاسوسة خطيرة .. كانت بتسأل وتتطقس عليك
وعلى ملكنا وتاج راسنا .. قلت أسلمهالك بنفسى ..
واشوف أوامرك فيها ..ندبح وندفن على طول ..
ولا نقررها الأول ونعرف مين اللى زققها علينا ..
توكل : لا يا واد طلعت ناصح فى دى ..
دنجل : تربيتك يا عمنا ..
توكل : حطتها فين ..
دنجل : سبتها أمانة عند هبو..فى الخن بتاعه اللى فى ضهر
القهوة ..
(فيد أوت)
___________________________________
(فيد أن)
مسمع 2
_____
صوت كركرة جوزة
زوبة :يا خويا أبعد بأه ..بوسة أيه اللى اخدها م الهبابة دى ..
فى صوت مسطول
هبو : اسمعى كلامى يا بنت الناس..خديلك بوسة وهتدعيلى بعدها
وكمان عشان متشعريش بالتعذيب اللى هيدوقهولك دنجل ..
أنا قصدى اكسب فيكى ثواب ..
صارخة
زوبة:يا لهوك من بدرى يا زوبة ..يوم ما ابوس ..ابوس جوزة..
صوت اقدام تقترب
دنجل :أهى.. هى دى الجاسوسة يا عمنا ..
توكل :زوبة هانم ..
زوبة :الحقنى يا عم توكل ..ابعد عنى المنيل ده ..
توكل : خلاص يا هبو ..فى الأمان ..
هبو : ماشى يا عمنا ..احنا كنا عايزين نخدم بس ..
زوبة : متشكرين يا خويا ..ومستغنين عن خدماتك وعن بوستك
توكل : خير يا زوبة هانم ..
(موسيقى )
_______________________________
مسمع 3
_____
صوت جرس باب
صوت باب يفتح
يتثآب فى كسل
فرغلى : عم توكل ..صباح الخير .. خير فى حاجة ..
توكل : صباح الفل يا ملك .. خير اطمن ..
زوبة : هيييييييه ..مفاجأة.. أنا جيت ..
فى خوف
فرغلى: أعوذ بالله من الشيطان الرجيم ..سلام قولا من رب رحيم
مين .. زوبة..زوبة الأروبة.. انتى مش هتبطلى عادتك المهببة دى ..لازم تهلى علينا بزعابيبك المهببة دى ذى أمشير ..
زوبة : اخص عليك يا عبقرى ..دى مقابلة تقابلنى بيها برضة ..
ده أنت متعرفش أنا اتبهدلت قد ايه عشان اوصلك..
توكل : إنما أنتى يا زوبة هانم ..عرفتى توصلى لدرب القطة ازاى
زوبة : ما أنا نسيت اقولك يا خويا .. إن أنا م الدرب اللى جنبيكم
درب البفرة ..
فى أستهزاء
فرغلى:أمال كنتى دوشانا فى المصلحة ..بجاردن سيتى اللى
اتولدت فيها ..وفيلا مامى اللى ورثاها من جدو الباشا فى
مصرالجديدة .. كل ده كان نخع وكدب .. ده أنتى طلعتى
نخاعة وكدابة كبيرة قوى ..
فى جدية
زوبة :لو سمحت يا ملك ..أنى لا أنخع .. ولكنى أتزين ..
توكل : المهم يا ست زوبة ..فى حاجة مهمة تخص الملك ..
هى اللى رمتك علينا ع الصبح كده ..
زوبة :لا يا خويا اطمنوا ..أنا جاية لمصلحة تخصنى أنا ..
كان وعدنى بيها العبقرى ..
فرغلى : خير أأمرى ..
فى خجل
زوبة :والله أنا مكسوفة قوى .. والخجل يملأ وجهى
فرغلى :جديدة عليكى حكاية الكسوف والخجل دى يا أروبة ..
زوبة : أنت مش كنت وعدتنى ..وقدام الراجل البركة ده ..وهو
يشهد عليك ..
فرغلى: وعدتك ..وعدتك بأيه ..
زوبة :أفتكر ..أرجع بذاكرتك للخلف ..فى المكتب ..
مكسوفة يا خواتى أأقول ..بس لازم أأقول ..
توكل : ما تقولى يا ستى غلبتينا معاكى ..عايزة فلوس ..
زوبة :لأ ..عايزة عريس ..
يضحك توكل وفرغلى عاليا ..
توكل : عريس عايزة عريس ..
زوبة : أيوه عريس ..أنت وعدتنى ..وكلام الملوك لا يرد ..
وهما واحد من اتنين ..يا دنجل ..يا هبو ..
( موسيقى)
مسمع 4
_____
صوت أطفال تتصايح
فى تفاخر
فرغلى : هى دى بأه يا زوبة ..مملكة درب القطة ..مملكتى ..
عشان لما ترجعى المصلحة ..تقولى للمتخلفة المتعفنة
مديرة المصلحة ..العز اللى أنا فيه ..
زوبة : طبعا يا عبقرى أنا فهماك ..ده أنا هخليهالك ..تطق من
جنابها كده وتموت بحسرتها ..وتعرف قيمتك ..
وطبعا مش هجيب لها سيرة عن عيال مملكتك الوسخين
المعفنين دول .ولا الدبان اللى لازق فى وشهم ..
ولا الهدوم المقطعة اللى لابسينها دى ..
فرغلى :صحيح دول المفروض يكونوا لابسين مريلة ..وكتبهم وشناطهم في اديهم .. هما مزوغين من مدرستهم ولا أيه ..
تشمشم بأنفها
زوبة :الله .. ايه الريحة الحلوة دى .. دى ريحة كبدة بتتحمر.. يااه..ده انا جعت ع الريحة ..
يشمشم بأنفه
فرغلى : ليكى حق ..دى ريحة كبدة محمرة ..والريحة جاية من
ورا كوم الزبالة الكبير ده..
صوت معدنى
لملعقة كبيرة
فى صينية
فرغلى :آيوه .. هية عربية الكبدة .. اهه ..تعالى يا أروبة ..
فى فرحة
الكبابجى:أهلا يا ملك .. مراحب يا ست الكل .. أتفضلوا ..
قوم يا واد من ع الترابيزة خلى الملك يقعد ..
فرغلى :أنت تعرفنى ..
الكبابجى :مين فى درب القطة كلها ميعرفكش يا ملك .. أأمرنى ..
طلباتك أوامر ..أحبش لكم شوية كبدة بالفلفل الحراق
والليمون .. ماشى ..
زوبة :والبصل يسترك ..كتر م البصل ..
فرغلى:ماشى..وكتر لها فى البصل .. بصراحة انا كنت هموت م
الجوع ..وريحة الكبدة الموحوحة جوعتنى أكتر..
بس لما شفت منظرك المأرف ده.. نفسى أتسدت عن الأكل
الكبابجى:ليه يا ملك بس .. دى كبدة ذى اللوز..وهتدعيلى
طب دوق الحتة دى من أيدى ..
فرغلى :لا أدوق ولا أتنيل ..أأأأأأأف ..أبعد ..ريحتك غطت ع الكبدة
أنت أيه مبتستحماش .. مبتغسلش أيديك حتى ..
اكل من ايدك الوسخة دى ازاى..
زوبة : يا خويا متبقاش قرفى كده..أنت هتضيع علينا الأكلة ولا
أيه ..ماله الراجل ..ما هو ذى الفل أهو ..
ضاحكا
الكبابجى:دمك خفيف يا ملك والله .. اسكت يا ملك ع اللى حصل
لى من يومين .. جاتلى دوخة ووقعت وشالونى هيلا
هوبة ع المستشفى الميرى .. وعينك ماتشوف ألا النور
.. تحاليل وحقن ومحاليل ونقل دم..
وفى الآخر يقولولى عندك أبصر أيه كده ..
فرغلى :وتطلع ايه الأبصر ايه دى.. طلع عندك ايه يعنى ..
الكبابجى : حاجة كده فى الكبد .. قال ايه الكبد تعبان..
ضاحكا
الكبابجى:قال أيه ..بياع الكبدة.. كبده تعبان .. مش نكتة دى والنبى فرغلى :كبدك ماله يعنى .. فيه ايه ..
الكبابجى:مش فاكر..هم قالوا أيه بالظبط ..حاجة ذى ماتقول كده ..
سيم .. سين ..
صارخا فى فزع
فرغلى: يا خبرك اسود..ومتنيل بستين نيلة ..تقصد فيروس سى ..
ضاحكا
الكبابجى:الله ينور عليك وعلى حواليك.. طبعا الملك .. ولازمن
ولابد تكون عارف كلتها حاجة ..هو فيروز سين ده ..
صوت صينية
توضع على خشب
الكبابجى:اتفضل يا ملك بالهنا والشفا ..تحبيشة هتدعيلى عليها ..
أنت والهانم ..
صارخا فى غضب
فرغلى :هنا ايه وشفا ايه يا متخلف يا جاهل أنت .. عندك التهاب
كبد وبائى وفيروس سى ..وبتأكل الناس من ايدك ..
ده انت كارثة على درب القطة كلها..
صوت ترابيزات
وكراسى تنقلب
وصوت صوانى
صارخا
فرغلى: لأ ..لأ ..أنا رسالتى لازم تبتدى بيك ..
أحميك الأول ..وبعدين ..اسلمك للمستشفى بأيدى ..
زوبة : طب ناكل الأول ..وبعدين حميه ..

( موسيقى )
_______________________________

مسمع 5
______
يحدث نفسه فى صوت فخيم
صدى صوت
فرغلى : راجل جاهل.. متخلف..ايه ياعبقرى حظك المنيل دى ..
مرض وفقر وجهل وتخلف ..ايه حكايتك معايا يا درب
القطة .. ده انتى مش محتاجة عبقرى وصاحب رسالة
ذيى .. أنتى محتاجة معجزة ..
لأ .. دى أنتى عايزة رحمة ربنا تنزل عليكى م السما ..

(نهاية ا
لسابعة )
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الخميس 1 نوفمبر 2012 - 20:50

الثامنة
_____
مسمع 1
_____
زوبة :يا خويا مش كنت تصبر شوية لما ناكل الكبدة ..وبعدين ..
فرغلى: أنتى تخرسى خالص .. باين عليه يوم أسود من أوله
طبعا لازم يكون اسود ومهبب بالزفت والقطران ..
زوبة : يا خويا أنت دايما مزرزر كده..يا ملك بهزر معاك ..
صوت موتور سيارة
وفرامل شديدة
فرغلى :وده ايه ده كمان .. الميكروباص بيجرى كده ليه ..
ومين دول اللى بيجروا وراه ..
زوبة : يظهر والله أعلم .. ده بوكس بوليس ..
صارخا
الضابط :وقف العربية يا حيوان والا هضربك بالنار ..
صوت فرامل
الضابط :انزل يا حيوان م العربية.. حطوه فى البوكس ..
صوت باب
الميكروباص يفتح
الضابط :انزل ياواد انت وهو .. حطوهم فى البوكس كلهم ..
صوت اطفال تصرخ
زوبة :ماليكش دعوة أنت يا خويا ..أرجع يا عبقرى متوديش
نفسك فى داهية ..
فى صوت واثق
فرغلى :في ايه يا حضرة الظابط ..واخد العيال دول على فين..
و جريمتهم أيه .. ومعاك تصريح م النيابة بالقبض عليهم
أشوف التصريح لو سمحت ..آه البلد فيها قانون ..
هى مش سايبة ..
الضابط :وانت تطلع ايه انت كمان..

فرغلى : انت طبعا متعرفنيش ..وأول مرة تشوفنى فى الدرب ..
الضابط: وسيادتك تطلع مين بأه يا سيدى ..
فرغلى: أنا الملك ..ملك درب القطة ..
الضابط:ايه يا روح ماما ..أنت أيه .. أنت عبيط يالا .. ولا مجنون
ولا بتستهبل .. شكلك كده بتستهبل ..
صارخا فى غضب
فرغلى :أحفظ أدبك ولسانك وانت بتتكلم معايا ..
ولازم تفهم إن أنا المسئول الأول والأخير عن كل
حاجة بتحصل فى درب القطة ..
فى خوف
زوبة : أعقل يا خويا ..وبلاش تهور ..دى الشرطة..
فرغلى :أنتى تخرسى خالص فى يومك المهبب ده ..
الضابط:اهلا يا حبيبى ..تعالى لى .. يعنى سيادتك بتعترف أنك
رئيس العصابة اللى بتشغل العيال دى ..
فى خوف
فرغلى:عصابة ..عصابة ايه ..هو العيال دى شغالة فى ايه بالظبط
الضابط: شغالة فى السرقة والنشل والتسول.. و.. و .. وحضرتك
أعترفت دلوقتى أنك زعيم التشكيل العصابى اللى مشغلهم
صارخا فى فزع
فرغلى: معرفهمش ..دى مرة أشوفهم ..
صارخا
الضابط:طب قدامى على البوكس يا ملك ..الكلام ده تقوله قدام
النيابة.. ده احنا ماصدقنا لقيناك..وأنتى معاه ..
زوبة : ولا أعرفة ..دى أول أشوفه فيها..
( موسيقى )
__________________________________
مسمع 2
______
صوت طرقعة صفعة
فرغلى: آى.. تانى .. قفايا تانى..
الضابط:بلاش قفاه يا شاويش محروس ..
صوت طرقعة صفعة
فرغلى:يا عم محروس بيقولك بلاش قفاه..أنت كده بتخالف الأوامر
صوت صفعة
فرغلة: أنت قريب بن شلتوت الاهطل ..كفك وزن كفه بالظبط ..
فى استهزاء
الضابط :قولتلى انت مين بقى يا سيدى..آه .. الملك ..
وده بأه.. الأسم الحركى بتاعك .. عارف أيه اللى عجبنى
فيك ..شجاعتك ..أتقدمت وأعترفت وسلمت نفسك من غير
حد ما يطلب منك .. ووفرت علينا مجهود كبييير وبحث
وتحرى.. على فكرة ..أعترافك ده ..وتسليم نفسك بنفسك
هيخفف العقوبة عليك ..
فرغلى:اعترفت .. اعترفت بأيه بس يا باشا .. انت عايز تلبسنى
مصيبة وخلاص
فى توعد
الضابط:وبعديييييين بأه .. هتتعبنى معاك ليه ..ما أنت كنت ماشى
حلو وذى الفل.. ومعترف..بلاش قفاه يا شاويش محروس
صوت طرقعة صفعة
فرغلى:يا عم محروس.. خف ايدك شوية..ده الاهطل ملاك بالنسبة
لك ..
صوت نقر
على الباب
توكل :صباح الخير يا باشا .. الأستاذ توكل المحامى ..
حاضر مع المتهم فرغلى اللمونى ..

( فيد أوت )
_________________________________
( فيد أن )
مسمع 3
______
توكل: أهدى يا ملك ..خلاص الموضوع خلص واتلم ..
ولولا زوبة الله يسترها ..جت جرى وفهمتنى الموضوع
كان زمانك..رحت فى البلالة ..ولبست قضية ..
وبعدين ده ظابط جديد علينا..والغربال الجديد له شدة برضة..
وناسنا فى أمن الدولة ..واللى بنخدمهم هيفهموه الفولة..
أنا عايزك تطمن خالص ..طالما عمك توكل موجود معاك ..
حط فى بطنك بطيخة صيفى يا ملك ..
فرغلى:ملك ايه بقى..هو فى ملك قفاه مشاع لكل من هب ودب..
يضحك فى أستهزاء
شلتوت:أصبر يا ملك..ومتنساش أنك عبقرىوصاحب رسالة ..
وشمعة تحترق لتضيئ الطريق للآخرين ..مش ده كلامك
وإن صاحب الرسالة لازم يعانى ويتعذب عشان يوصل
رسالته للناس ..
فرغلى:يعانى آه .. يتعذب.. ماشى .. يتشبح على نخلة .. معقولة
إنما عمرى ما سمعت عن صاحب رسالة بيضرب على قفاه
صوت جرس الباب
صوت باب يفتح
شلتوت: حمدالله ع السلامة يا فرغلى يا ابنى ..كفارة ..
فرغلى: تعالى أنت يا عم شلتوت ..فهمنى حكاية العيال دى ..
فى حسرة حزن
شلتوت:آآه..دى حكاية العيال دى مصيبة وكارثة..على الدرب
وناسه .. حكايتهم تقطع القلب ..
فرغلى:الظابط بيقول نشل وسرقة وتسول ..بس دى عيال لسه صغيرة .. والطبيعى يكونوا فى مدارسهم بيتعلموا..
شلتوت:مدارسهم .. مدارس ايه يابنى اللى تساع كل العيال دى ..
الحكومة تبنى مدرسة تكون درب القطة خلفت عيال تملا
عشر مدارس. . العيال اتكربست فوق بعضها جوةالفصول
لا مدرس عارف يشرح ولا تلميذ عايز يفهم .. العيال بقت
تهرب والأبهات لاقادرة على تعليم ولا دروس خصوصية
والفقر كاسر ضهر الكل ..والعوزة خلتهم يشغلوا العيال
فرغلى:بس دى كارثة .. دى مصيبة ..
شلتوت:المصيبة الأكبر .. أن الطفل اللى فى عمر الزهور..
واللى المفروض يلعب ويجرى ويتعلم .. ويعيش طفولته
عشان يطلع أنسان سوى يفيد مجتمعه وأهله وناسه ..
يا أما تلاقيه فى ورشة ولا مصبغة ولا .. ولا ..
فرغلى:ورشة ايه ومصبغة ايه يا عم شلتوت .. الظابط بيقول أنهم حرامية ونشالين ومتسولين ..
شلتوت:ما هو يا فرغلى يا ابنى..في ناس فقرا صحيح بس شرفا ..
ودول العوزة اللى بتخليهم يشغلوا ولادهم فى صنعة شريفة
يتقوتوا منها م الجوع الكافر..وفي ناس الفقر موت ضمايرهم
أستغلوا الأطفال البريئة دى.. فى تسول وسرقة ونشل
توكل: المهم يا ملك .. متبقاش تتهور تانى وتحط نفسك وتحطنا
معاك.. فى مشاكل مع الشرطة .. احنا فى غنى عنها ..
فرغلى:توووبة من بعد النوبة .. انا خلاص..
قفايا مبقاش يستحمل لزقة واحدة كمان..
( موسيقى )
___________________________________
مسمع 4
______
صوت ضجيج القهوة
توكل:شايف يا ملك .. الناس كلها بتحبك ازاى .. كل المشاريب
تحية وبلوشى كمان..
فرغلى:ما انت كمان مبطلتش تطلب فى مشاريب ..
ما هو أبو بلاش كتر منه ..
ضاحكا
توكل:الله يحظك يا ملك ..دمك شربات والله..خلينا فى المهم ..
في موضوع مهم جدا ..وحيوى ..وميحتملش التأجيل ..
فرغلى:خير يا عم توكل ..وغوشتنى ..خير ..
توكل :هو من ناحية خير ..هو خير إن شاء الله ..انا باقول يعنى
أنت شاب فى عز شبابك .. وصحتك والحمدالله مية مية ..
وبقول يعنى بدل المشى البطال وال..
يقاطعه فى حزم
فرغلى:لأ يا عم توكل .. أرجوك .. حاسب على كلامك ..
أنا عمرى ما كان ليه فى المشى البطال والصرمحة ..
ده أنا أبويا الله يرحمة ويبشبش الطوبة اللى تحت راسه
مربينى ومعرفنى دينى كويس .. ومعلمنى ازاى أفرق بين
الحلال والحرام ..ده كلام ..ده كلام يا راجل ..
توكل:الله يرحمه ويدخله فسيح جناته.. كان راجل دوغرى وتمام
ويعرف دينه كويس.. وضميرة حى ..وده اللى خلاه يسيب
الجمل بما حمل لعمك ويطفش بيك م الدرب وبلاوية ..
بس أنت كده فهمتنى غلط .. أنا قصدى بدل المشى البطال..
واللى مش سكتك خالص .. يبقى مبقاش قدمنا غير سكة
الحلال ..الجواز ..
فى صوت خافت
فرغلى: الحلال والجواز..
توكل :أيوه ..الجواز عشان هيبتك وسمعتك يا ملك قدام رعاياك
وناس الدرب ..
فى صوت حزين
فرغلى:بس يا عم توكل مين هترضى بيه.. وانا فقران وعدمان
ومحلتيش اللضا ..
صارخا
توكل:هاايه .. صحى النوم .. ده انت الملك .. بنات درب القطة
كلها تتمنى نظرة رضا منك ..اشارة من صباعك الصغير ..
فى ثقة
فرغلى:آه.. صحيح فعلا .. فعلا .. عندك حق والله يا عم توكل ..
بس أنا يهمنى فى المقام الأول ..تكون عبقرية وصاحبة
رسالة ..ذى ..
توكل : اطمن خالص يا ملك ..عروستك عندى ..

(نهاية ا
لثامنة )
الرجوع الى أعلى الصفحة اذهب الى الأسفل
رضا الهجرسى

avatar


مُساهمةموضوع: رد: ملك درب القطة..مسلسل أذاعى كوميدى.   الأحد 23 ديسمبر 2012 - 1:23

التاسعة
_____
مسمع 1
______
أصوات وضجيج القهوة
خطوات قادمة
شلتوت: السلاموا عليكم..
توكل / فرغلى: سلام ورحمة الله وبركاته ..
توكل:جيت فى وقتك.. احضرنا يا استاذنا ..
شلتوت:خير إن شاء الله ..
توكل:انا لسه بكلم إبننا فرغلى .. انه آن الآوان بأة..
انه يكمل نص دينه ..
شلتوت: ونعم الرأى .. الجواز سترة للى زيه ويحميه من
السكك البطالة ..واخترت مين إن شاء الله من بنات
الدرب..دى لازم تكون متربية وتعرف دينها وعلى
خلق ..
صارخا
فرغلى: وعبقرية ..وصاحبة رسالة ..ذى..
توكل:ايه رأيك فى بنت الشيخ عبد الصمد امام الجامع
ومأذون الدرب ..أظن مفيش احسن من كده ..
شلتوت:بس دى اتجوزت من ييجى كده سنة ..وكنا شهود أنا
وأنت على عقد قرانها ..
توكل:لأ..دى كانت الكبيرة ..أنا أأقصد الصغيرة.. ما هو
عنده بنتين ..
شلتوت: يا الله على بركة الله ..جواز مبارك إن شاء الله ..
صارخة
زوبة: جواز ..جواز مين ..
فرغلى :أعوذ بالله من الشيطان الرجيم ..سلام قولا من رب
رحيم ..أنتى طلعتى منين ..
ضاحكا
توكل :طلعت على ريحة الجواز طبعا ..باركى للملك يا ست زوبة
خلاص هنجوزه ..
زوبة : يا حظك الاسود يا زوبة ..دايما منسية كده ..
توكل : أطمنى خالص يا ست زوبة ..نخلص جوازة الملك ..
وانتى بعده على طول ..
زوبة : يسمع من بقك يا عم توكل يا أمير أنت ..
إنما أنت يا عم توكل ..عازب ولا متجوز ..
فى فزع
توكل :متجوز ..أقسم بالله متجوز ..
زوبة : يالا مفيش نصيب ..
( موسيقى )
__________________________________
( مسمع 2 )
-------------
صوت ختام صلاة
صدى صوت خفيف
عبد الصمد :السلام عليكم ورحمة الله وبركاته .. السلام عليكم
ورحمة الله وبركاته ..
صوت الجماعة:السلام عليكم ورحمة الله وبركاته .. السلام عليكم
ورحمة الله وبركاته ..
فرغلى: حرما يا سيدنا ..
عبد الصمد:جمعا إن شاء الله ..تقبل الله منك ومنا ..
انت مين يابنى .. انا مشفتكش فى الجامع قبل كده ..
أنت غريب عن الدرب ..
توكل:ما غريب ألا الشيطان يا سيدنا .. ده بأه يبقى حفيد
اللمونى الكبير والملك الجديد للدرب
عبد الصمد : يا ألف اهلا يابنى .. عودة حميدة ومباركة لأهلك
وناسك يا بنى..ده أبوك كان من خيرة الناس وافضلهم..
شلتوت:والله يا سيدنا أحنا طمعانين فيك..وأبننا له طلب عندك
عبد الصمد:خير ان شاء الله..ابن الغالى يطلب يجاب على طول ..
شلتوت:أبننا فرغلى .. عايز يكمل نص دينه ..وطلبه عندك ..
وقولنا له أنت مينفعكش غير نسب الراجل الكمل
الكامل ..إمامنا ..وشيخنا ..
عبد الصمد: الله يكرم اصلك يا أستاذ شلتوت..هه يالا ..
توكلنا على الله.. نكمل كلامنا فى البيت ..
يحدث نفسه
توكل :تانى يا شلتوت الكلب ..يعنى أنا أتعب وجهز ..
تيجى أنت وتاكلها ع الجاهز ..
ماشى.. الجيات اكتر ..
( فيد اوت )
__________________________________
( فيد ان )
( مسمع 3 )
--------------
صوت اقدام تقترب
عبد الصمد:تعالى يا بنتى ..قدمى الشاى للبهوات ..
ادخلى يا بت متكسفيش كده .. تعالى ..
هامسا
توكل:أنت متنح كده ليه.. ونزل عليك سهم الله..
مد أيدك خد الشاىم البنية .. وملى عينك منها ..
فرغلى:هه .. آه .. طيب .. شكرا ..
صوت اقدام تبتعد
شلتوت: ماشاء الله .. أدب وكمال وجمال .. ربنا يتمم بخير ..
عبد الصمد:استأذنكم خمسة..أنتم مس غرب..البيت بيتكم..
فرغلى: أتفضل يا عمى ..
اصوات اقدام تبتعد
هامسا
توكل:هيه .. يا ملك .. مش قلتلك قمر ..قلت أيه ..
فرغلى: بس .. دى لسه عيلة صغيرة ..
توكل:عيلة ايه بس..بأه الانوثة دى كلها..وتقولى عيلةصغيرة..
شلتوت: أنوثة ايه يا توكل بس .. دول حشينها قطن وقماش ..
توكل:هي صغيرة صحيح .. بس هتكبر مع الايام ..
شلتوت: تكبر مع الايام أيه بس يا توكل ..أعقلها كده معايا ..
تفهم ايه دى فى مسئوليات الجواز والحمل والولادة
وتربية العيال ..حرام عليك يا راجل ..
هامسا فى نفسه
توكل :أيوه ..أنبر أنت فيها ..وخد بنط على قفايا ..أنا غلطان
..أنى دخلتك فى الموضوع من أصلة ..
خطوات اقدام مسرعة قادمة
فى فزع
عبد الصمد:أعذرونى يا اخوانى .. بنتى الكبيرة بتولد.. والولادة
متعثرة .. وجوزها خدها ع المستشفى ولازم أحصلها
حالا ..ربنا يستر ..يا ستار يا رب ..اللهم لا أسألك رد
القضاء ..ولكن اسألك اللطف فيه ..
فرغلى: كلنا جايين معاك يا سيدنا ..
( موسيقى )
_______________________________
مسمع 4
_____
أقدام تقترب
عبد الصمد:سترك يا رب .. يا رب استرها مع عبدك الغلبان ..
باب يفتح ويغلق
عبد الصمد: طمنى يا دكتور الله يسترك.. بنتى عاملة ايه ..
فى غضب
الدكتور: أنت ابوها ..
فرغلى:ايوه يا دكتور أبوها .. الشيخ عبد الصمد ..
إمام جامع ومأذون درب القطة ..
فى استهزاء
الدكتور:شيخ وإمام جامع ومأذون شرعى كمان ..يعنى عارف
القانون كويس..وفاهم دينك ..ازاى يا راجل يا مجنون
أنت.. تجوز بنتك.. وهى قاصر ..
عبد الصمد: أنا قلت جواز البنات سترة.. يابنى ..
الدكتور:سترة .. ده جريمة .. طفلة ذى دى عايزة اللى يربيها
هتربى عيال ازاى ..تفهم ايه دى فى مسؤليات جواز
وحمل وتربية .. أنا لو بإيدى لسجنك ..دى جريمة ..
يبكى
عبد الصمد: جريمة..جريمة ايه بس..هو اللى عايز يستر بناته
يا ناس ..يبقى مجرم ..
الدكتور: ما هو الجهلة والمتخلفين اللى ذيك اللى لا فاهمين
دين و بيتحايلوا ع القانون ..بتسنين البنت ..
هما اللى جايبنا ورا .. ولا أيه رأيك أنت يا أستاذ ..
فرغلى : طبعا يا دكتور .. أنا بأيدك فى كل كلامك وأشد على
يدك يا دكتور .. أنت من الواضح انك عبقرى
و صاحب رسالة ..ذيى..
فى غضب
الدكتور:طب لما أنت مأيدنى فى كلامى ..وزعلان قوى كده
عملت ليه عملتك المهببة دى
فرغلى: عملة أيه يا دكتور ..والله ما عملت حاجة ..
الدكتور:هو أنت مش الهباب اللى اجوزها ..
فرغلى :لا والله يا دكتور ما أنا ..أنا الهباب اللى بعده ..
فى غضب
الدكتور :امال واقف معطلنى ونابح حسى معاك ليه..
غور من قدامى..يالا أبعد..راجل حشرى صحيح..
باكيا
عبد الصمد:طمنى ع البت يا دكتور..الله يسترك..ويستر عرضك ..
الدكتور:بنتك بين ايادى الله .. إحنا عملنا اللى علينا والباقى
على ربنا..البنت كان لسه جسمهامكتملش..وميستحملش
حمل وولادة .. جالها تسمم فى الدم ونزيف فى الرحم
والمولود نزل ميت ..صلى و دعيلها .. وأستغفر ربك
يمكن يغفر لك جريمتك فى حق بنتك ..البنت دى لو
جرالها حاجة ..هيبقى ذنبها فى رقبتك ..
فى رجاء ودعاء
عبد الصمد: يا رب سامحنى ونجيلى بنتى .. دى أمانة وفرطت
فيها عن جهل ..وأنت وحدك اللى عالم وعارف نيتى
و أنى كنت عايز أسترها ..وطمن عليها فى حياتى..
فرغلى: استغفر الله يا شيخنا .. وخليك مؤمن بالله ..
فى رجاء
عبد الصمد:لا آله ألا الله ..محمد رسول الله .. أعذرنى يا فرغلى
يا بنى فى الطلب اللى هطلبه منك ده..
فرغلى: أطلب يا سيدنا ..أنا تحت أمرك ..
عبد الصمد:عايزك تعفينى من طلبك بجواز بنتى التانية ..
مش عايز أأقع فى الغلط تانى ..وضيع التانية..
فى جدية
فرغلى:لا.. أطمن يا سيدنا .. انا مقدرش أشارك فى جريمة
بشعة ذى دى .. وربنا يقوملك بنتك بالسلامة ..
توكل : يا شيخنا ميبقاش قلبك رهيف كده ..وتوكل على الله وتمم
جوازة بنتك واسترها ..
شلتوت :يا توكل ..خليك محضر خير ..ولا يلدغ المؤمن من حفرة
مرتين .. واعقلها وتوكل ..
توكل : والله أنا كانت نيتى خير للكل ..
يحدث نفسه
فى أسى وحزن
فرغلى:وبعدين معاكى يا درب القطة..
فى متاهاتك المنيلة بستين نيلة دى..
واللى مبتخلصش ..
ناويالى على أيه..
وموديانى على فين ..
يا درب القطة ..

( نهاية ال
تاسعة )
الرجوع الى أعلى الصفحة اذهب الى الأسفل
تقى احمد




مُساهمةموضوع: رد: ملك درب القطة..مسلسل أذاعى كوميدى.   السبت 15 أكتوبر 2016 - 5:06

الله جميله
يعطيك العافية
الرجوع الى أعلى الصفحة اذهب الى الأسفل
 
ملك درب القطة..مسلسل أذاعى كوميدى.
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا الثقافى :: ركن رضا الهجرسي للقصة-
انتقل الى: