الرئيسيةس .و .جبحـثالتسجيلدخول
شاطر | 
 

 "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الأربعاء 28 مايو 2014 - 11:39






(( أقرت وزارة الصحة الاتحادية بوجود نقص في أمصال لدغات العقارب والثعابين في بعض المناطق خلال العام الماضي وأعلنت عن رصد مليون جنيه لتوفيرها محكمة لموسم الخريف بلغت تكلفتها 37 مليون جنيه للتركيز على الاستعدادات المبكرة للحيلولة دون حدوث آثار صحية كاشفة عن تكوين 204 فريق صحي للاستجابة للطوارئ الصحية خلال فترة الخريف وقالت مسؤولة الطوارئ سمية الكد إن الوزارة أعدت قائمة لكل ولاية بالتركيز على مناطق الأخطار العالية.)) الجريدة




قُر ينفخكن يوقفكن قربة بركة النبي محمد
طيب جهزتو شنو ؟؟
يعني الناس ترحل تخلي البلد ولا كيف ؟؟
مالِكن ما عارفين الخريف على الأبواب والكهرباء بتقطع بالليل ؟؟
طيب دايرين الناس تكابس في الضلام مع العقارب والدبايب ؟؟
يخسي عليكن وعلى إهمالكن
وزارة قدر الضربة ما قادرة تجيب أمصال عقارب ودبايب ؟؟
والله يستر ما يكون مصل "أبدرق" خلصان كمان
والله بي موية وكملت
الوزارات دي مالا بقت تتملص من مسئولياتا ؟؟
ناس الدفاع والداخلية كملو أمصال "تأمين السلامة"
وهديلك الجنجويد حايطين الناس من القبل السبعة
وأراضي العاصمة كان باقي فيـها ميدان "عقرب"
بالله دي حال شنو دي ؟؟
تم توزيعـها مرابيع على روسين عوائل المسئولين من الوزارات ذاتن
كمان تجينا وزارة الصحة الاتحادية تتقدل وتقول مافي أمصال
طيب إنتي ياوزارة مراتباتك بتاخديـها مننا ولا من العقارب والدبايب ؟؟
حدثيني ؟؟
ملايين ميزانيات الدولة دي كلـها ما مخصصة للعقارب والدبابين اللفحا منو ؟؟
أسي أها نعمل شنو الخريف هدا جا
والمطر بجي ومعاهو الهبايب البترمي عواميد الكهرباء الأصلها متقطعة
والناس في الخريف بالليل دايرين الكسرة وملاح الشرموط الحار يدفيهن
البقدر يخش ليهو "تُكُل" منو ؟؟
وكمان يعوس ليهو كسرة إذا كان مافي أمصال ؟؟
مالكن ماعارفين التكلة والرواكيب والشيكان دي كلها ملبدة نصائب ؟؟
عموما نحن ما راح نقبل إطلاقا بعدم وجود أمصال للعقارب والدبايب في ظل هكذا ظروف
وأوعة تجيبو أمصال مضروبة زي الغاز الجابوهو ناس منو ديلك ما عارف
نحن عندنا عقارب ودبايب الكلاش ما بخوفا خلي مصل
وبعد دا تقولو في نقص في الأمصال ؟؟
تخلو أي حاجة بس لازم الامصال
القعونج ساهل يغوغي لامن يقول بس
برضو الباعوض ما مشكلة ينوني وقرصة قرصتين الفجر بطلع
لكن أب درق ..مش المصل ..دا قوات الدعم السريع ما تقدر عليهو
والحق مش على وزارة الصحة الاتحادية
هي برضو وزارة مسكينة وماعندها غير رسوم دخول المستشفيات الخاصة
لا عندها إيصالات بتقطعا ولا عندها مال تجنبو
والله أنا كان وزير صحة كنت جنبت من حيشان المستشفيات الكبيرة دي
إن شاء أسجلا في إسم أولاد بناتي هو الجائب خبري منو بالله ؟؟
وممكن أتبرع بجزء من العائدات عشان الأمصال والمحاليل والمياه المقطرة
وكان علي "الرُكب الصناعية للمسئولين" يمين ولا بجيبا من برا
"من دقنو وأفتلو"
يعني أشيل رُكب الجماعة المرقوهن يوم داك ديلك دايرين بالركب شنو ما كفاية عليهن الكيعان "يلحسوها"
ونعمل إحتياطي ضخم من الرُكب
إن إحتاج الرئيس ندي والباقي إن شاء الله نقسمو للاعبي الكرة المحترفين الجايين من برا ديل "بِضُرو ؟؟"





الرجوع الى أعلى الصفحة اذهب الى الأسفل
مجذوب الطيب




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الأربعاء 28 مايو 2014 - 12:20

والله كلامك حلو ولغة من زمان ما سمعتها وانا بقراء مرت بخاطرى ذكرى سريعة كلمحة بصر

     واذكرت بلدى فى ذاك الزمان وسبحت فى بساطة ريفنا الحبيب وبساطة اهله الممزوجة بالطيبة
     
     والقناعة. والحياة تمضى كل الهم كان البرد جاء دواه كسره حارة بملاح شرموط بركة من

     ربك وعافيه ما هو المعطى والقادر والعارف البحمدو ويشكرو ما تجيوه عوجة.

     وربنا هو الواقى من العقارب والدواهى ومن كل شر نازل . ياحبو كلام كان بلسان حبوبتى

   ارجو ان ان تكون الترجمه والدبلجة باللهجة السورية عشان بناتنا واولادنا يفهمو انهم من امة

   عظيمة . وسلمت شكرا.

.
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الأربعاء 28 مايو 2014 - 16:07



يا مجذوب ازيك ياخي
كيفك وكيفك ناسك لعلكم طيبين
نشكرك على التشجيع الحار لتلك المفردات التي بدات في الاندثار
اهو نسلي نفسنا شوية
على فكرة حبوبتك البتتكلم عنها دي ذاتا قعدت برضو معاها ان لم تخني الذاكرة بتصدق ؟؟
ربنا يرحمهم جميعا
ياخي ديل حيرو المابتحير
تخيل وزارة قدر الليلة وباكر
علاج لاي حاجة مافي
يقولوا ليك بس امصال العقارب والدبايب مافي
يعني الامصال التانية راقدة هبطرش  
37 مليون جنيه للتركيز على الاستعدادات المبكرة للخريف!!
للحيلولة دون حدوث آثار صحية !!
وعملوا 204 فريق صحي للاستجابة للطوارئ الصحية !!
والفرق دي على مستوى البلد او الولايات
يعني لو قسمنا ال 37 مليون على الفرق في الولايات بتري ما تلحق تشيل "ملين" واحد
يعني دايرين يحاربو العقارب والدبايب والقعونج البجوو مع الخريف
طيب التصريف وفتح المجاري علي منو ؟؟
وهو اسي العقارب والدبايب قاعد تسال ليها زول ؟؟
ما يشوفو الدبايب الجات محاصرة العاصمة دي


الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الأربعاء 28 مايو 2014 - 16:31

"حبوبتك البتتكلم عنها دي ذاتا قعدت برضو معاها ان لم تخني الذاكرة بتصدق ..."
يا المحبوب والله الذاكرة خانتك فى دى .. انت قعدت مع حبوبة حبوبة مجدوب وجد جده كمان.. حاجة الدهر عليها رحمة الله وجده بابكر حاج توم علية الرحمة والمغفرة..
انت شايف مجدوب يجادع فى كلامك بتاع العجائز ديل معاك قايلوا قدرك ولا شنو!!! يا خى مجدوب ده صغير وجاهل لسع ووراى بسنة بس..ما شوف النفخة والقعده الماهلة دى فى البروفايل ...
لكن كلامك سمح بالحيل .. امتعك الله والعيال كمان !!!!

الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الأربعاء 28 مايو 2014 - 16:48



يادكتور مساء طيب
ياخي مجذوب كنت بسمع عنو من زهير عبد الله "الله يرحمو"
اتمنى نقابلو في مقبل الايام
ويسمع الكلام على الهواء "مشاترتن"



الرجوع الى أعلى الصفحة اذهب الى الأسفل
حسن وراق حسن




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الخميس 29 مايو 2014 - 5:50

يا محبوب
ات ماك خابر ظهر واحد صيني مستثمر في شراء العقارب الحية
قالوا ليك العقرب الصغيرة ب 10 جنيه والمتوسطة ب 15 والكبيرة ب 20 جنيه
اسع ناس بربر من ما تفلل الواحد فيهم شايل بطاريتين يفتشو في العقارب بالماشة حقت الجمر
وقالوا ليك ناس بربر خلو المشي للدهب وشغالين عقارب ودبايب
عشان كدا الامصال لزوما شنو طالما ظهر المستثمر الصيني يانج شي في مشروع كبير لحصاد العقارب
والله يستر علي فرقة جاز العقارب وميدان عقرب ما نلقي الصيني اشتراهو
الرجوع الى أعلى الصفحة اذهب الى الأسفل
مجذوب الطيب




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الخميس 29 مايو 2014 - 8:35

اولا صباح الحير اخى المحبوب وبالرغم من اننى عصرت الذاكرة عصر قصب السكر عشان اجمع ملامحك اواتذكر  

  وين اتلاقينا. فشلت

وااللوم على الغربه الجفايه . والله يرحم الخال زهير وزوج اختى الاستاذة منى الطيب المحامى ما كان بعرف زولا هين ولالين .

وانا اعشق الماضى وناس زمان وبساطة زمان وحنية زمان عشان كدة انا حبيت اسلوبك دون مجاملة اوكسير تلج .

واى كلام قلته انا صادق فيه. اما انت اخى الكبير شويه وصديق غالى جدا واخ لم تلده امى تربينا على لقمات ام نزل وفاطمة بت

فردوس ورقية مرة عثمان خلف الله والجلسة العصرية قدام دكان عثمان حمد عليه وعليهم الرحمة جميعا وأيام طفولتنا وصبانا بالمابقوما

الغالية جدا علينا اخى بكرى تحياتى الكثيرة للاولاد وام الاولاد والباقى على الحبان من الالمان وربنا يجمعنا ومعاك المحبوب فى حرم

المصطفى عليع افضل الصلاة والسلام
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الخميس 29 مايو 2014 - 9:27



مرحب أخي مجذوب
وسوف نرسل لك الصورة الحقيقية
"عشان ما يضللك واحد من المغرضين بصورة مضروبة"
وبجيك للتفاصيل في الخاص ان شاء الله
ياورقة ممكن بالله تورينا المصدر الذي إستقيت منه هذه المعلومات
"شفت إستقيت دي كيف"
هي إنت في العقارب ترا عندها أمصال لكن أقرأ الخبير دا
وجماعتك يجهزو في أمصال العقارب والدبايب


(( اجتاحت الآف الفئران شوارع وبيوت مدينة المعيلق بولاية الجزيرة، عقب هطول أمطار غزيرة في المنطقة، وأبلغ الأهالي أمس أن الفئران اجتاحت المدينة واخترقت منازل السكان، مسببة الذعر وسط المواطنين، بينما أشاروا الى أن بعضها نفق في لحظات خروجه، وأبلغ الأهالي مسؤولي الصحة في محلية الكاملين بالأمر، دون أن تستجيب السلطات الصحية، وأبدى الأهالي تخوفهم من أن تتسبب الفئران في انتشار الأمراض والأوبئة خاصة مرض الطاعون )) اليوم التالي




الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين    الخميس 29 مايو 2014 - 9:36



دي طرتني حكاية مباراة لقلب الجزيرة في واحدة من قرى الجزيرة الرياضية "الميدان أرضو طينية ومشقق"
المهم القلب طلع مغلوب بهدفين لواحد
وكان أحد لاعبي القلب قد أضاع فرصة التعادل وهو منفرد بالحارس تماماً والمرمى فاضي
إلا انه لم يسدد الكرة في المرمى الخالي تحت دهشة الجميع
ولمن رجع النادي سألوهو  "زعللانين" عن السبب
قالوا ليهو كيف تحاور الدفاع والحارس وما تسجل
قال ليهن " بعد حاورت الحارس جاني فار مع خط المرمى قلت ما بدارق بي رقبتي خليتا ليهو"







الرجوع الى أعلى الصفحة اذهب الى الأسفل
 
"دبابين ودبايب" وزارة الصحة الاتحادية "تُقِر" بوجود نقص في أمصال لدغات العقارب والثعابين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: