الرئيسيةس .و .جبحـثالتسجيلدخول
شاطر | 
 

 رمضــــــــــــــــــــان ورمزان "فطرني"

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: رمضــــــــــــــــــــان ورمزان "فطرني"    الخميس 3 يوليو 2014 - 11:54



الننفش معاكن شوية
ترا كلاماً بينا
هندي جاني داخل قبل شوية قال لي وهو يلولح في راسو "رمزان مبروك"
قلت ليهو "الله يباخت في عمرك
وإن شاء الله نبارك ليك جديد وليداتك"
شفتو جنس المحن دي ؟؟
كل زول ساكت لا تعرف الصائم لا تفرز الفاطر
وإن نضموا إياهو جنس دا
قلت أحسن أجيكن هنا وننضم شوية لأنو كلام زي دا اصلو ما معقول
بالله مش أحلى حاجة في رمضان النضم ؟؟
بت العوض الله يرحما كانت في بدايات رمضان زي ناس رمزان ديل
من حداشر فِرد كضمة حدها الطراويح وإن نضمت تنضم "كُتُر"
تعمل كل الحاجات في صمت والعينين البي كرتين ما يلحقن
وبعد تفطر مباشرة بتاخد ليـها رقدة لكن برضو ساكتة
وما تقوم إلا لمن يكوسو غتاية البِسلا حقت اللبن ما يلقوها
تقوم براها كان جنـها وجن البِسلات
قدر ما تلقى ليـها قروش تشتري ليها بِسِلا
مرة من الجماعة بتريق عليـها قال ليها
شنطة المدرسة إنقطعت أديني بِسِلا النشيل فيها الكُتب ديل
ومن قولة تيت ومن اول يوم وبعد تصلي المغرب
تلقاها تعاين للهلال وتردد "بالله أسي دا هلال يوم واحد بس؟؟"
وبعد داك تبقى في حساب الزمن وتلقاها تردد "الحمد لله ترا الدخول إتنين"
"طبعاً السكات قريب للتيسوعة بتحول لمظاهرات"
اللياس والكعك والترزية "طق لي التوب دا كان أقدر أعيد بي"
في رقدة بعد الفطور نحن بنكون جينا عليـها لزوم المكيفات
في آخر رمضان قبل "سفر الجفاء"
فطرنا وضربنا اللقمة والنعيمية "ربنا يوعدنا"
وكباية ليمون وكباية آبري أحمر
دا غير البليلة كان عدسي كان "كبكبي" لا اذكر
الجراد الله يرحمو كان عندو معدل سجارتين يومياً
وفي رمضان بتناولن بعد الفطور مباشرة "بنلتات"
وما بجيب السجائر "براو" إلا في رمضان
بعد الفطور طوالي دورنا الحديد "زوغة المكيفات"
لكنو المرة دي إنتفض وقال "أقعدو هنا زول يتحرك مافي "
"العندو سجاير يطلعو والعندو تمباك يمرقو مافي داعي لللف والدوران"
ومرقت علب السجائر البرنجي الماخمج بي كباريتا
وأكياس التمباك رقدت رز
والله أصعب سجارة تشربا قدام أبوك "ياحليلو"
سكت ساي بعد شاف "المناظر" وشويتين نضم
قال المحيرني ود فرح مع إنو أصغر واحد لكن سفتو وكراعو واحد
"كان معذبو بمقاس 45 في المراكيب البجيبا من الضعين والفاشر ونيالا" "ياحليلن"
بت العوض اليوم داك خليناها براها تشيل وتشرب في الموية
لمن خلاس غلبتا الحركة
خافت جاتنا تجرجر في التوب ماقادرة ترفعو "شبعانة موية"
قالت مالكن في شنو الليلة ما جيتو بي غادي  ؟؟
الجراد أخد ليهو ضحكة قال ليـها
"إنتي يا مرة بدخني حتى إنتي كمان ؟؟"
زمن كان لطيف ورمضان لو بشوي سمح من البداية للنـهاية
وبي نفس واحد الناس حدها العيد
لا زول بشكي ولا زول بقنت كلو زي البمب
حتى الشكية تضحكك لمن تقرب تفطر
أسي بالله كان سلمت ليك علي زول ساي يهجمك ينشف ريقك
يبادر ليك يحننك "ما السكري"
ربنا يشفى لكن السكري فعلاً عملو أفرش وتخين
نرجع للسرامس والبسلات
والبسلة إناء صغير يستعمل في جلب الحليب والفول مرات مرات
ياخي البسلا الما بتعرفوها دي كانت عظيمة زيـها وزي الكافينول
ومرات مرات بتنافس سرامس الشاي
لكن السيرمس أخدت رواج أكتر بحكم اللمعة
دي لمن ظهرت الناس بتختـها وتتفرج
"أبعد آآشافع ما تطقـها تكسرا"
يضارفو عليـها زي شافع النديهة
والعجب كان زرت ليك ناس مرطبين
طوالي تجي شرقان "والله لي درجة الشاي دا جابو لينا في سيرمس"
يشهد الله السيرمس السيرمس قريب العشرين سنة التقول مسي
كمان لمن ظهر سيرمس الموية عيييك شالوها الناس وبقت قصة
التوابير بقن من الغبشة تقول شايلات الحفة
وأي حاجة لازم تدخل السيرمس وإلا بتبقو ناس بدعيين ساي
لو زرت زول في المستشفى وما شلت معاك سيرمس يشيلو حالك
إمكن العمود سبق السرامس شوية فلو شلت عمودين برا ترامس إفتح الله
ناس المحالج كانوا بشيلو العواميد "وردية الليل"
والبشيل سيرمس إلا يضاريـها "نان تسقي منو وتخلي منو"
"ناس عليك الله كب لي حبة في الغتاية دي"
أها لمن ظهرت البسلات الترامس شوية إتاحتن
وإمكن كان ليهن الفضل في حركة اللبن "أكتر واحد إتفسح في البسلات"
والروب وشوية شوية دخل الفول الله يقلعو والله كره البسلات في "النقل"
والبسلا الشايفنـها دي يا ما شالنـها حراير ونظمت فيـها القصائد
وأذكر الغزلية الاخدت رواج "القطار دور حديدو" ما لقتو
"يا الشائل البسلا
ندهت ليك أبشِلا
تدي الحِلا طلا وتفقدني ... وكان حضرت الزمن دا كان قالت "تفطرني"




الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: رمضــــــــــــــــــــان ورمزان "فطرني"    الخميس 3 يوليو 2014 - 22:58

الله يجمّك يا المحبوب .. انت ماك عارف كمية الراحة والاستجمام التى
تتنزل علىّ وانا اتنقل فى مكاتيبك العجيبة وتناولك الاعجب وخلطاتك
ووصفاتك التى تخج القلب وتقّوم النفس وتجعل الشفاة تتدلى ..
لانها وصفات يصعب استنساخها ولا تصلح للتدوال الا بشخوصها
الغير قابلة للتكرار لا فى زمان مضى ولا زمان قادم
ولا فى مكان وان طال فية بقائنا ..
رحم الله الاموات وجعل البركة فى ريحتهم العطر هذه..
ونشوفك فى رمضان فى السودان ان شاء الكريم ..
الرجوع الى أعلى الصفحة اذهب الى الأسفل
حسن وراق حسن




مُساهمةموضوع: رد: رمضــــــــــــــــــــان ورمزان "فطرني"    الجمعة 4 يوليو 2014 - 6:25

الله يرحم شيخنا الجراد كان درامي بالفطرة
عندما يضحك الجراد تتكلم عيونو
وعندما يسخر كان يعبر بالبضحكة الظاهرة علي نواجزه
كان بتسلي بيكم والعجب ودفرح ضحكت جنس ضحك من سفتو مقاس نعلاتو
فجأة اذكرت صديقو الجاء يشيل معاهو الفاتحة 11 باليل وقمنا وزعناهو
ربنا يرحم شيخنا الجراد رحمة واسعة يجمعه مع بت العوض في عليين مع الانبياء والصديقين
الرجوع الى أعلى الصفحة اذهب الى الأسفل
صداح فاروق وراق




مُساهمةموضوع: رد: رمضــــــــــــــــــــان ورمزان "فطرني"    الجمعة 4 يوليو 2014 - 10:24

"يا الشائل البسلا
ندهت ليك أبشِلا
تدي الحِلا طلا وتفقدني ... وكان حضرت الزمن دا كان قالت "تفطرني"



الرجوع الى أعلى الصفحة اذهب الى الأسفل
 
رمضــــــــــــــــــــان ورمزان "فطرني"
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: