الرئيسيةس .و .جبحـثالتسجيلدخول
شاطر | 
 

 "الفنقلُن" بالله "الفيفا" دي بتجيب "الفِرق البتتمورض دي" من وين ؟؟ بلجيكا وكوستاريكا ومكسيكيكا ؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: "الفنقلُن" بالله "الفيفا" دي بتجيب "الفِرق البتتمورض دي" من وين ؟؟ بلجيكا وكوستاريكا ومكسيكيكا ؟؟    الأحد 6 يوليو 2014 - 7:37









الفنقلن "لويس فان قال"







بقى ما عندنا برنامج غير كاس العالم
ياخي أمبارح الليل كلو نلاوي
بلد قالوا إسما كوستاريكا
والله في الخريطة محلـها ماعرفتو
ظاهر إنـها من الفرق البلعبوا بالفقرا ومؤكد بتاعين كِجور
معقول تلاتة مرات تدق في الماسورة ؟؟
وهن قايلننا شغل "مايرنو" ما بنعرفو ؟؟
فرق جاتنا مسكينة كاتلا حيلا
تتمورض تتمورض لمن بقت لينا في العزيزة وحيرتنا
ماعارف ناس الفيفا خلوهن دخلو كاس العالم كيف ؟؟
إذكرت وزير القُحة بتاعنا القال "إنتو العيانين الكتار ديل بتجيبوهن من وين ؟؟"
وكوستاريكا بس من ما قالوا ليـها "هولندا" تعال شوف المماوتة
يا الله ويامين وبالترجيحية حتى ياكوستاريكا خليتي الهولنديين يعبروا لنصف النهائي
نان "فنقال" لِعب ليهن ؟؟
قاعد في كرسيهو ولا إشتغل بيهن الشغلة
لآخر دقيقة قام علي حيلو وفِرت طقة "فنقلن" ليك الفنقلة المابعرفوا ليـها
جابوا ليهن حارس في الزمن الاضافي التاني
ذكرني حبوبتن لينا مشينا لعرس ولدا الكبير في عاصمة واحدة من ولاياتنا
"ماتقوموا تقول ولايات داحش كمان"
بعد سنة جات لي بكا والناس متلمين حولـها في قهوة زي كاس العالم دا
واحد داير يعمل ليـها "شِفِت" قام سألا
أها يا حاجة "ناس عثمان ولدك إن شاء الله بقو تلاتة ؟؟"
عاينت فيهو وقالت ليهو "الحمد لله بقو تلاتة" وسكتت لكن علي مضض
قام واصل في الاسئلة "نظام يحرجا"
"بالله بقو تلاتة أها جابو شنو ؟؟"
إستعدلت عديل وقالت ليهو " كمان ولدي بلعب ما فِرت طقة ولد"
يمين صاحبنا بقى زي ناس كوستاريكا محل يمش غلبو
كمان "الفنقلن" فِرِت طقة جابو حارس طويل والله أنا قايلو حارس الدفاع بالنظر
بس هو بالطول
إتشبح ليك ليهن بين التلاتة "ماسورات"
إتعولق إتعولق مرق الأولى
إتعولق وإتخومل تاني مرق واحد
خلى ليك ناس كوستاريكا خشومن "ويكا ويكا"
وتعال شوف البهجة أمبارح في أمستردام
الحليب ومشتقاتو وزعوها للهولنديين في السحور مجانا
وهديلك لي حسي "يدشوا" حليب
طبعا حليب الفرزيان الزي بقر المحافظ
والعجب واحدة تانية اسما بلجيكا ولا بلكلنتون ماعارف
إتعولقت على الارجنتين جنس عوليق
بخراج الروح حتى الارجنتينين جابو قون
ما معقول يابلاتر ياخي "بالمناسبة كان معانا في اللجنة الادارية في الاتحاد"
ياخي كاس العالم مناسبة بتتكرر كل أربعة سنوات
فمافي داعي تدخلوا لينا دول تتعولق علينا نحن لي كاس العالم الجائي يكون نفسنا قائم
وعارفننا ما عندنا برنامج وأغاني وأغاني ذاتو خليناهو لي فرفورتريكا
المهم التحية للكوستاريكيين والبلجيكيين "بالله دي أسماء دول ولا مضادات حيوية ؟؟"
ونتلاقى في نصف النهائي فرق زي فتايل الريحة





الرجوع الى أعلى الصفحة اذهب الى الأسفل
حسن وراق حسن




مُساهمةموضوع: رد: "الفنقلُن" بالله "الفيفا" دي بتجيب "الفِرق البتتمورض دي" من وين ؟؟ بلجيكا وكوستاريكا ومكسيكيكا ؟؟    الأحد 6 يوليو 2014 - 7:58

العكلته يا محبوب حقت ناس اهلي شندي ديل لوايييق زي ويكة الطندب
صلاح ادريس حالف يلعبو كاس العالم الجاييي
بس بتبقي عندو مشكلة وين يلقي ليهو مشجعات حلوات زي الشفناهم ديل
جعليات شندي يا مشلخة ويا متبلمة
الرجوع الى أعلى الصفحة اذهب الى الأسفل
عبدالمنعم ترتورة




مُساهمةموضوع: رد: "الفنقلُن" بالله "الفيفا" دي بتجيب "الفِرق البتتمورض دي" من وين ؟؟ بلجيكا وكوستاريكا ومكسيكيكا ؟؟    الأحد 6 يوليو 2014 - 9:14

في شندي العظيمة تلقى بنات جعل
واحدات في المتمّة زي لون العسل
النايرات خدودِن زي فجراً أطلْ
الرجوع الى أعلى الصفحة اذهب الى الأسفل
 
"الفنقلُن" بالله "الفيفا" دي بتجيب "الفِرق البتتمورض دي" من وين ؟؟ بلجيكا وكوستاريكا ومكسيكيكا ؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: