الرئيسيةس .و .جبحـثالتسجيلدخول
شاطر | 
 

 الجن فوق كم ؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
صداح فاروق وراق




مُساهمةموضوع: الجن فوق كم ؟   الثلاثاء 2 سبتمبر 2014 - 10:37

مشيت العُمرة .... بعد ما اللمين رسل لي الاقامة ... قعدت اربعة شهور بلا شغل ...
حايم فوق الناس...من بيت عزابة لي بيت عزابة.....يوم حايم في السوق... لاقاني
سعودي..... باين عليهو مرتااااااااااااااح.... شديد... كورك لي ... يا زول يا زول.... اتلفت لو..... قال لي انا سمعت انكم في السودان بي تعالجو الزول المجنون، وشاطرين في الحكاية دي وانا عندي اخوي مجنون ما بتعالجو لي؟....


قلت لو بالحيل بعالجو لك...... كدي امشي اشتري لي بسطونة....وتعال النمشي معاك.....شلت البسطونة في ايدي...ودخلني سماحة بيت... قصر عدييييييل كدي....والعربيات اربعة واقفات.... ودخلت جوا..... ودخلني علي الزول المجنون..... لقيتو متحزم بي عقالو ويردح في نص العوضة....وفي مرا زي القمرا وقت شافتنا زاغت لي جوا... اتاريها دي مرتو....


قلت للزول الجابني انت امرق برا واقفل الباب دا وراك بالمفتاح....وما تفتحو علا اقول لك انا افتحو...... وزولي المجنون في رديحو.....


يقفل الباب....وانا اقع لك في المجنون دق...دق نضيف..... لب لب لب لب...... بتجن مالك اكان ما قلة ادب منك؟.... لب لب لب ... الكهرباء رااااااقدة وبى بلاش .. لب لب لب .. الموية ما بتقطع .. لب، باعوض مافى.. لب لب لب .. بتجن مالك خدمة الزامية ما عندكم .. لب لب لب .. .. الجانى ليها شنو عربيتك الفورد واقفة برة ؟....لب لب لب.... بيتك قصر؟...لب لب لب...مرتك زي القمرا؟...لب لب لب ..... ما جنيت انا المعرس زينب بت الخِدر؟ .... لب لب لب ....


وامرق صورة لي زينب شايلا في جزلاني واوريها ليهو....واقولو عاين لي للكعوبية دي وعاين لي مرتك؟.... لب لب لب لب ..اكان كنت معرس البعاتي دا كنت سويت شنو؟...لب لب لب لب....الله مقصر معاك بي شنو؟ عشان تجن ليهو؟.. لب لب لب....


الناس يشربو الموية بالكوز وزينب بت الخدِر تشربا بالزير، تشيل الزير بي ايد واحدة وجق جق جق جق تشرب...وتختو وبااااااااااااااااااع تدشا....لب لب لب ... النسوان يغنو ليهن... كان مشت تتفدع ... وزينب كان مشت تتضرع...؟ لب لب لب .... الله يغيظك....لب لب لب...


اها زولي من شاف صورة زينب راق شوية وهدا... وبعد شوية... اتشعبط فوقي ويقعد يجعر ويبكي... اتاريني حننتو ...


بعد كم يوم اخوهو لاقاني قال لي الحمد لله اخوي بقى شدييييد الا من يتذكرك يقعد يبكي ....



منقول بصبر..‬

الرجوع الى أعلى الصفحة اذهب الى الأسفل
امجدالشيخ




مُساهمةموضوع: رد: الجن فوق كم ؟   الإثنين 8 سبتمبر 2014 - 11:48

هههههههه اسلوب بسيط ولطيف ومعبر ياريت تتتبع لنا قصص للكاتب هذا وتنقلها لنا هنا اخي صداح .... وجزيت خيرا للبسمة التي علت وجوهنا ...
الرجوع الى أعلى الصفحة اذهب الى الأسفل
أبو رائد




مُساهمةموضوع: رد: الجن فوق كم ؟   الإثنين 8 سبتمبر 2014 - 15:15

ههههه زولك يا صداح جنو كلكي اكثر من العيان
الرجوع الى أعلى الصفحة اذهب الى الأسفل
عبدالمنعم ترتورة




مُساهمةموضوع: رد: الجن فوق كم ؟   الأربعاء 10 سبتمبر 2014 - 15:47

شبعة الحوتة
الرجوع الى أعلى الصفحة اذهب الى الأسفل
 
الجن فوق كم ؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: