الرئيسيةس .و .جبحـثالتسجيلدخول
شاطر | 
 

  يا ورقة كان تغشنا ياخي .. عموما ناس الامتداد أوعة يكونوا عِرفو

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: يا ورقة كان تغشنا ياخي .. عموما ناس الامتداد أوعة يكونوا عِرفو    الأحد 30 نوفمبر 2014 - 11:42




الامتداد براو يا اخي
دي الدنيا كلـها بتعرفو حق المعرفة
ما حاما بقليباً حنين
يضحك
يسامر
يوادد يجامل يساند لا لحظة لان
ولا يوم لملم همومو فات مشى اختفى  
ولا نور محياهو يوم إنطفى  
ولا لحظة مل طوافو يشرح سر الإحتفاء
نعزي منو فيك ما انت مننا ونحن ليك
ما المحنة أكبر من إحتمالنا في غيابك وغروب وشيك  
نقالد التراب  
ولا نبكي المسافات المشيتا درب درب  
نبكي الارصفة ولا المواني الحاضنة مراكب سفرك
ولا المطارات الفيـها جواز سفرك طموح
مستف الحب زاد  للرحيل
يا قريب  
منو البقدر يودعك
وانت كنت مستودع همومنا النازفة
الموت حق والحياة بعدك من غير وِلِف
ما انت الإلفة بي ذاتا وصفاتا
وحا نقول شنو غير وداعاً ايـها الرجل الأنيق
فلك الله وإليه راجعون
جيت في اسراع وغادرت والناس في أشد الحاجة ليك
جيت وقجيت منازل إلفتك بيناتنا في مهل دون ضيق
وغادرت قبل ما تكمل الخطاوي الطامحة شوق
شوقك لي بلد حر واسع فسيح
وفي وداعة الله خليناك
معاكا سلامة ودعناك
أعاصير من الحزن  
شلالات من الدموع
فضاءآت من الكآبة
وقلوب يعتصرها الألم النحيب
ما بتصدق لو قلنا ليـها ما حا تجي تاني
كيفن بتنبض ان انقطع سيل المعاني ؟؟
خريف الدموع أب شقة قمر السبوع خال البلد من حدو لي حدو
كضاب المرض كان قال بلوي سيفك
وكضاب الموت كان فكر يطوي طيفك
واصل وقوفك
أنثر حروفك ضياء
ما بنخلي حاجاتك تمش  
وتمشي وين ومعاك ما كمل الكلام
ما نحن مستنين مجيك يا آية الخير الوفي
يا رونق الصبح الوعِد
 



الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الأحد 30 نوفمبر 2014 - 11:47





وداعا أخي عبد الكريم
وربنا يصبر الناس علي فقدك المفاجي
عمنا عوض الله وأخوانك وكل الاهل
إنا لله وإنا اليه راجعون





الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الأحد 30 نوفمبر 2014 - 12:12

الله يا المحبوب ...
يا وجعى عليك يا جمل الشيل ....
عبد الكريم رجل من زمن غير زمنا ...
عبد الكريم صاحب قلب كبير ... وحب كبير ...
والله ما عارف اقول شنو واكتب شنو ... ده زول جميل بالحيل ..
سوف افتقد كثيرا عبدالكريم .. سوف افتقد حكاوية .. مشاريعة الانسانية وهو يحدثنى عنها .. احلامة المشروعة عن الغلابة والمساكين .. سوف افتقد جهودة فى مشاريعنا الخيرية .. مشاريع طالما تحدثنا عنها طويلا .. تفاكرنا وخططنا ...
سوف افتقد رجل رجوتة ان يتولى قيادة الحصاحيصا دوت كوم الخيرية .. لم يصدنى ... لكننى احسست ان للرجل احلام تسع الحصاحيصا كلها .. وتواعدنا على الخير ... ولكن الخير فيما اختارة الله  ....
يا وجعى عليك يا زول يا كبير ...
الرجوع الى أعلى الصفحة اذهب الى الأسفل
مجذوب الطيب




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الأحد 30 نوفمبر 2014 - 13:35

دايما الناس بقولو للزول الشهم ان شاء الله يوم شكرك ما يجى واليوم اخى عبدالكريم يوم شكرك جاء وانبرى ليه الاوفياء

ده اخوك المحبوب قال فيك درر الكلام وكل معانى الشهامة وكل صفات الرجولة وامانة يا بلد مشى منك راجلا مشهود

له بالمكارم والكرم فى اسمك رسم سلمت اخى المحبوب انت دايما كما عهدناك راعى وفاء .

اما اخوك بكرى ود عثمان حمد ود الحاجة نفيسة اخت ام نزل وتومتها وجارتها وعم عثمان الذى كانا صغار نحسبه قريب

عمنا عوض الله عبدالله شهادته فيك مجروحه ذى مجذوب لاننا من بيت واحد وحى واحد وجماعة واحدة وكثير ذى بكرى ومجذوب

يبكوك يا عبدالكريم وجرح نصر لسه ما برى لكن الله يصطفى من يشاء ونحن لا نقول الا ربنا يحسن مثواكم ويبدلكم جنات ونعيم و

نقول للوالد الكريم اصبر واحتسب امرك لله ولعبد اللطيف واخوانة العزاء ولنا الصبر والدوام لله.
الرجوع الى أعلى الصفحة اذهب الى الأسفل
كوثر يوسف عبدالصادق




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الأحد 30 نوفمبر 2014 - 19:26

ماعايزة اقول قد كان وكان
ﻻنو جوانا لسسسه ح يكون
بضحكتو البشوشه وسنو البيضاء
ونبرات صوتو المجلجل والكلام الموزون
ح يفضل فى اذانا باقى ﻻنو بجد نحنا لسع مامستوعبين
رجلا ابكى الرجال
حسرتنا فيك كبيره وحزنا عليك عميق
رحمك الله ....رحمك الله ..
وغفر لك
انا لله وانا اليه رتجعون
الرجوع الى أعلى الصفحة اذهب الى الأسفل
ودعيسي




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الإثنين 1 ديسمبر 2014 - 3:45

كريم
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الإثنين 1 ديسمبر 2014 - 6:00




(( .....فات الكان بدّينا إحساس بالإلفة
وكان راوينا
فات الباكي جَرِحنا
وناسي جروحوا
ولافي ورآنا مدينة.. مدينة
فات الصاحي ونحن نَغـُطْ
في النومة السابعة
طالِق حسو ولا حسيِّنا
حتحت فينا غُناهو الطاعم
وفَاتْ قنعان من خيراً فينا
سلاماتْ يا زول يا رائع
....
ما تْقومْ
يا زول يا رائع ومهمومْ
يا مضيّع ضَيْ عيني وراكْ
واقف
حاحاي للنوم
.......
وأنا ضَعفي أمامك فاضحني
سامحني!
ما قدرت أطولَكْ
سامحني!
شُفتَكْ من وجع طَالع
على برزخ ملتقى النيلين
كنتَ هناكَ وحّيدك
وكل الناس أتنين .. أتنين
براك واقف
في حدْ السيف
براك الما وقف بينْ... بينْ
تغازل حلمك الفارع
فَتح بابين على الملكوتْ
تَسَلِّم على حضرة جلال الموتْ
وتفتح في الأرِض نفّاج
إذا امتلأ الفراغ بالصوت
فيا باطن الأديم أفتح
براحات الحنين مُشْرَعْ
وأَنْدَهْ لي مُدن شاخت
أنْدَه لأطلال القُرى الراحت
بيوتْ في بيوتْ
تَمْرُق من شِبر مَسَرح
مدن فاضله
وعالم باتساع الحُلْم
بقامةَ يشتهي التابوت
فما لَفَظَ البحر يُونِس
ولا أنسدّت
شهِية الحوتْ ... ويا زول يا رائع تمشي
بالحسره وتموت ؟
وسلاماتْ يازول يا رائع )).



الرجوع الى أعلى الصفحة اذهب الى الأسفل
سمؤال




مُساهمةموضوع: رد: يا ورقة كان تغشنا ياخي .. عموما ناس الامتداد أوعة يكونوا عِرفو    الثلاثاء 2 ديسمبر 2014 - 10:51

وصلت سدرة منتهاك
ياناس نعزي مع منو؟
ونقول شنو؟
حامدنوا رب العالمين
عاد صح يباكو مع منو
يمكن يباكو مع فطين
قول نورة يبقى مع الحسين
يا زول اقولك شوفلك اكتر زول حزين
ياهو الوطن
ايوه الوطن
العاشو جواه الخزين
الدهدهك روحت وين؟
راجنك آآ عشم الغلابة المتعبين
راجنك آآ دخري الضهابة المتربين
الرجوع الى أعلى الصفحة اذهب الى الأسفل
 
يا ورقة كان تغشنا ياخي .. عموما ناس الامتداد أوعة يكونوا عِرفو
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: