الرئيسيةس .و .جبحـثالتسجيلدخول
شاطر | 
 

 جك الفول "للحبان المشتتين في المنافي غُلبا"

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: جك الفول "للحبان المشتتين في المنافي غُلبا"    الثلاثاء 3 فبراير 2015 - 7:02



(( سنة أربعة وتزعين كنت شغال في شمبات المرسى، ومؤجر في شمبات الأراضي مع صديق صيدلي إسمو عماد عبد العزيز عندو هايلكس موديل تزعة وتمنين. تقريباً تقريباً، كل يوم بعد المغرب ما عدا الخميس والجمعة، كنا بنمشي نزور صيدلي تاني بأبي روف إسمو نادر حُسين إبراهيم، بيتم فاتح على البحر. بمجرد وصولنا لبيت نادر قاعدين نلقى الكراسي مطلعة قدام البيت، واشللة مرشوشة، والشاي باللبن جاهز. أول ما باب الهايلكس بتاع السائق ينقفل؛ صوتو بجيب حسين الصغير ود أخت نادر لبرا البيت ومعاهو ألعابو وبطلع ضهر البوكس يلعب. حسين دا، كان عندو ميزة في كلامو وهي إدخال كلمة "جنّكم" في أي جملة يقولها، مثلا:
أول ما نكب الشاي يقول بنص إنتباه وهو بلعب في ضهر البوكس: جنّكم تشفطوا الشاي باللبن!
أو أول ما نكورك لعمك بانقا بتاع الدكان عشان يصلح الفتة، يقول: جنّكم تضربوا الفتة بالزيت!
أو أول ما نبدأ الونسة، يقول: جنّكم تتونسوا بالدويات (الأدوية)!...........................))
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: جك الفول "للحبان المشتتين في المنافي غُلبا"    الثلاثاء 3 فبراير 2015 - 7:04




((............إستمرّ هذا البرنامج بنفس هذه التفاصيل لثلاثة شهور إلا انو كان في تفصيل آخر شال ملل التكرار وساعد على إدماني للروتين دا، وخلى الأحداث دي ممكن تبقى موضوع ونسة تتحكي، وهو خروج رحاب عصام العاقب بت جيران ناس نادر متلفحة بتوب الصلاة وشايلة جك بلاستيك أصفر تجيب فوقو فول من بانقا. كان حسين الصغير ينبهنا بمرورها بقوله: جنّكم تشتروا الفول فوق الجكاكة! طبعا الزمن داك، الصعلكة لسع ما كانت إتمكنت، وكونك تشوف ليك بنوتة بهذا المشهد الرومانسي المتكرر؛ بتحبا بتحبا... واحد ح يقول لي ما دام عشتوا زمن قبل التمكين، كيف عرفت إسمها بالكامل؟ مرة، بعد فتات كتيرة، أصريت أدفع، وأنا بحاسب في عمك بانقا خليت ليهو الباقي وسألتو عنها حتى كمان قال لي باقي ليها شهر تتخرج من كلية الاداب.

إنتهى الجزء الثاني والظاهر تاني باقي جزء صغير أخير ..............)).




الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: جك الفول "للحبان المشتتين في المنافي غُلبا"    الثلاثاء 3 فبراير 2015 - 7:05




((.............آخر أربعاء جينا فيها راجعين من أبي روف كانت باردة وتخيلت نفسي حزينا، لا أدري بسبب كآبة البرد ولّ غياب رحلة رحاب من البرنامج لأكثر من أسبوعين؟؟
يوم الخميس العصر عماد جدع لي مفتاح البوكس وقال لي: عليك الله، يا بلبل* قبل تمشي السينما أغشى بيت ناس نادر رجع لعبات حسين الصغير النساهن في ضهر البوكس أمس، لانو لو إنتظرن للسبت؛ بجننا، وأخوك عارفو جبان ما بقدر يتخلف عن خميس بيت الخالة وبتّها بالصافية!!
قلت ليهو: جنّكم تلخبطوا للناس سينماتم بحبكم!
وقفت العربية قدام بيت ناس نادر ويجي حسين من بعيد قاشر ومعاهو أصحابو شايلين قزاز الببسي، وطلع نزّل لعباتو وهو جاري قال لي: جنّكم تشيلوا لعبات الاولاد الصغار!
قلت ليهو: حسين، أقيف، دا، عرس منو؟ قال لي أسأل بانقا.
مشيت الدكان وقبل أسألو قال لي: صاحبتك
قلت ليهو: جنّهن يعرسن بدون يكلمننا!
اليوم داك بدل السينما قعدت في كبري شمبات أُراقب إنعكاس أنوار الزينة على شاطئ أبروف.
إنتهت )) أبوبكر عباس / سودانيزاونلاين



الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: جك الفول "للحبان المشتتين في المنافي غُلبا"    الثلاثاء 3 فبراير 2015 - 7:45





العنوان في المصدر "جك الفول"
وعشان أنقلو بحذافيرو كان لازم أدخل ما بين القوسين
وذلك تبعا لشروط الموقع "هنا" البشترط ان يكون العنوان مكون من 10 أحرف على الأقل
ولذلك وجب التنويه






الرجوع الى أعلى الصفحة اذهب الى الأسفل
حسن وراق حسن




مُساهمةموضوع: رد: جك الفول "للحبان المشتتين في المنافي غُلبا"    الثلاثاء 3 فبراير 2015 - 20:23

جنكم تجهجهونا يا محبوب
الرجوع الى أعلى الصفحة اذهب الى الأسفل
 
جك الفول "للحبان المشتتين في المنافي غُلبا"
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: