الرئيسيةس .و .جبحـثالتسجيلدخول
شاطر | 
 

 النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها    الأربعاء 4 فبراير 2015 - 7:44






عشان ما يجي "حيوان" يفتح فينا بلاغ بموجب قانون "حماية الحيوان"
القانون العملوهو ناس الفاتح عز الدين الدحيش وبدرية قبال كم يوم
نحن إطلاقاً ما جبنا سيرة الحمير والبقر والكدسة
ولا الحصين والغنم والبغال والجمال
ديل ياهن الحيوانات البستحقن الحماية
مساكين "الزول ياكل عشاهن" لا بهشن لا بنشن
الناس عايشين معاهن في حِوار وسلام وأمان من تالف "الأزمان"
التمساح يقدل "كدي" يخوض في جناين الشواطي
لا دخل قصور روض ولا ناغم "متعاطي"  
قاصدين الحيوانات المفترية وعاملة فيها فتوات دي
اللهي الجقور "فتوات الفئران" والضببة والسحالي والصراصير
وهي ذاتا لا لامة في الحيوانات ولا لامة في الطيور ولا في الزواحف
وعلي العليـها بقت عليها حكاية خائنة خائفة
"تتمكن بالتساهيل متسايفة وتقرض في الرساميل متعايفة"
قبال دا قرضت حديد مشروع الجزيرة حديدة يسوها كانون ما خلوها
لا خلت السكك الحديد ولا خلت زنكي الفبارك ولا ماكينات الحليج
معدات الهندسة الزراعية والجملونات والسرايات جابت "واطيـها" عاليـها
طبعاً ما البلد عِدمت "الكدسة" المفندكات وليهن شنيبات ديلك
ولو ما كِدا الفئران بتلعب جنس اللعب دا ؟؟
وكان عندنا كدسة عليهن رك وممكن ننتكل عليهن ساكتات فوق أم كم ؟؟
غلبن الكلام كلو كلو "يلولحن في الضُنُبة ويبرمن في الشنيبات" ؟؟
يا حليل كدستنا الزمان فار واحد يقدر يقل أدبو مافي
الكديس "شوف عيني" يقوم بي عبار المريسة براو
ويمين ما بمز بي "فار" مزتو لحم ضان وفي الضان بيت الكلاوي
تلقى العصر راكب حمارو ماش علي أهلو يدوبي
وبمجرد ما نحدثن عن الفئران الفار اللعمى يشيل "الملكلك"
الكديس كان زي "بوش الأب" الأولاني ما سمعتو بي قصتو ؟؟
ما جاتو مارغريت تاتشر في البيت الابيض تتبكى وتتنهف ؟؟
قعدا في العنقريب حِداهو
وجاب ليها "كوز" موية غسلت وشها وقشتو بي طرف توبا
سالا "نعل ما عندك عوجة جاية في النهرات ديل متربتة ؟؟"
قالت ليهو "وأخدت ليها إنجخاخة وقعدت تتنهف أهي أهي أهي "
"مالك يابوش آآخوي ما سمعت بالارجنتينيين كابسونا في جزر الفوكلاند ؟؟"
"إنت قاعد يا جورج والارجنتينيين يعملونا ونسة في فريق الكدسة ؟؟"
نان جورج بوش "لِعِب" ما طوالي طيب خاترا وقال ليها
"قومي شوفي شغلتك علي الطلاق بالتلاتة إلا أنجمن ليك نجام قبورة"
قامت علي حيلا وعدلت توبا ومرقت وقفوا ليها ركشة وصلتا المطار
رجعت لي أهلا ويمين قبال ما تحلب غنما وتعشي جهلاتا
بوش مرق ليك الارجنتينيين من جزر الفوكلاند زي العجب
أها اليومين ديل الارجنطينيين "حقننا" جقور علي فئران فايرين
مرة وثبة ومرة حوار وقرضتن وأحمد شرفي بالمزيقا
الجقور واقعة في الأراضي والميادين والسنمات قرض جد
وبعد ما قرضت أصول مشروع الجزيرة جات تقزقز بكبري المنشية
بالله لو عندنا كديس من النوع أبو كديس داك الجقور دي بتعمل كدا ؟؟
يقرضن وياكلن علي كيفن ؟؟
تاكلن السم اللي يلحقكن "الصِح"
أمانة في ذمتكن كبري جديد زي دا تقرضنو جنس القريض دا ؟؟
والكبري يوم الليلة أولاد أعمو ما سمعوا بيهو  ؟؟
مالكن ما ماكلان ومقرضات شرق النيل كلو لي عِد بابكر !؟
ما تمشن تقرضن الوادي الأخضر الباعوهو للمغتربين بالدولار ؟؟
بس فلاحتكن تبارن تقرضن في الممتلكات والمؤسسات الحيوية ؟؟
السلطتكن علي كبري المنشية شنو يشوي شرشوفكن إن شاء الله
أسي الشركة الوهمية العملتو موقفا مع الشئون الهندسية مش حا يتأثر بالقرض دا ؟؟



جقور تقرض في الحديد والخرسانة زي البتقرض ليها في دِربِس ولا لكوم ؟؟
إلكمكن حيدر قُطامة ما تقومن لي يوم القيامة
مالكن ما عارفات البلد في حالات "حِوار" متوثبة ؟؟
أوعة تقولن القانون الأجازوهو أول البارح دا بحميكن "يا لاغفات يا مقرضات"
وكان ما عارفات وملمات بنصوص قانون "الدحيش" الجديد النحدثكن
فالقانون "قانون حماية الحيوانات مش الجقور والفئران والحيران"
فقد كفل للحيوانات الحماية من العطش والجوع والخوف
وضمن ليها عدم التعرض للمؤثرات الفيزيائية
وإستحدث حريتـها في التعبير عن سلوكها الحيواني
وحدد ليـها ساعات العمل
"يعني مافي حمار يجر ليهو كارو  قدر البنطون اليوم كلو بدون راحة وبرسيم وايسكريم"  
وفرض عقوبات على المخالفات تصل للسجن والغرامة والتغريب
في مواجهة منتهكي حقوق الحيوانات بحسب نص القانون
والتغريب يعني يمرقوك في جزيرة سرنديب زي محمود سامي البارودي
شوفن هنا نحن والله المعبود بالحق ما بنشتكيكن
والله أكان نلملم الكدسة الفي حُجارة البطارية ما نخليكن
كبري يوم الليلة أقساط قرضو ما بدت تقومن تقرضنوا ؟؟
أسي ناس الشئون الفنية بهيئة الطرق والقصور في الولاية ينومو كيف ؟؟




الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها    الخميس 5 فبراير 2015 - 5:18





واحد سألوهو
رايك شنو في الكباري العملتها الانقاذ ؟؟
قال : كويسة جدا ! لكن حقو تاني يخلطوا مع الاسمنت سم فار





الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها    الأحد 8 فبراير 2015 - 5:46




ذاعْتَ الكضبه من أمريكا لا الأندلسا
في الفار القرم صبة حجر هرسا
يا أهل العلم ويا من للطبايع درسا
دي جسارة جقور؟ أم خيابة كَدَسه
--
الكدسة المن التركية بي قفطانا
وبي جنيه انجليز باعت تراب سودانا
حايمة الليلة في وسط الجقور سجمانة
ما بتعضي ما دام يوت كروشها ملانه
--
الفار الكبير في جحرو (عارف عزو)
يقل الكبري بي ضراع الفساد ويهزو
والكدسة الكبار من شوفتو ديمة يفزوا
يسكروا بي دم المسكين ولحمو يمزو
---
في الدنيا أم قدود محنا شُداد وكبار
شفنا الكبري بي فعل الجِقِر ينهار
يا سيدي الوزير راجياك كباري كتاار
بدل أسمنتِ سوي المونة سم الفار
--
مو جقر الجُحُر الخوفوه بي بُرَّه
جقرا ضوق المسؤول حناضلا مُرَّه
جقرا يا الوزير خلاك تنز زره
ومن كضبك مسيلمة في الخلق يتبرا
--
يا جراح البلد أبيتي تب ما تبري
من تالاك أنا ممحوق وكملان صبري
يا ست الصُبا إن درتي يوماً شُكْري
بدل أسد الخلا سميني جقر الكبري

"الكلس" الراكوبة




الرجوع الى أعلى الصفحة اذهب الى الأسفل
عاكف اسماعيل عبد الرازق




مُساهمةموضوع: رد: النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها    الثلاثاء 17 فبراير 2015 - 12:26

الجقور ماجقور نصاح
بعد السرقه كمان فصاح
الا بكره الضبحالصاح
ان ما متن ما بنرتاح
الرجوع الى أعلى الصفحة اذهب الى الأسفل
 
النخلي البلد دي "للجقور" !! قبال دا قرضت أصول مشروع الجزيرة تقوم أسي كمان تلغف كبري المنشية ؟؟ الله وكبر عليها
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: