الرئيسيةس .و .جبحـثالتسجيلدخول
شاطر | 
 

 يا جماعة هوي البتزرزرو فيها دي ما "فاتو بنسودة" دي بت "فاروق كدودة"

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الثلاثاء 21 أبريل 2015 - 12:09





ساندرا بت من دهب في زمن حكام الضهب
نصيبا وهي شابة في ريعان الشباب
إختطاف
وتعذيب
وإهانة
وخلع أكتاف والفاعل غلب الوصاف
كلام ينم عن خوف إن ما قلنا رعب
وكان على أقل تقدير إكرامها كإمراة
بدل بهدلتها في الحراسات ورميها في الشوارع
وكل الدلائل بتشير لجهة نافذة ومتحكمة وعندها سلطة
والفي قلبو أبو الحُرقُص براو "بِرقُص"
ففي أخبار اليوم سمعنا بمداهمة منزلها وإقتيادها لتحقيق
التحقيق أمام نيابة أمن الدولة بالعمارات "شارع عبيد ختف"
على خلفية بلاغ دوّنه جهاز "راس الدولة الحاكم بامر الله " في مواجهتها
مع إنو الجهاز دا أنكر أي صِلة ليهو باختطاف ساندرا
ونفى تماماً أي علاقة ليهو بحادثة الاختطاف
وهو معقول جهاز راس الدولة الحاكم يورط نفسو ويقوم بعمل زي دا ؟؟
يعني بلحيل الجهاز دا فاضي عشان يقنب يلاوي في البنات ويعمل قاضي ؟؟
أنا شخصياً شكيت وقلت إمكن شالا "حمار النوم" الله إنعلو
باقي بشيل الزول يرميهو في شوك "كان كِتِر كان سِدِر"
والله صحي وزمان كان الليل كلو ينقل في الناس
وبصراحة والحق يقال ومع انو حمار
لكنو يوم واحد ما سمعنا بيهو شال ليهو بت أو إمراة
بس كمان "حمار النوم" البرمي الزول في الحراسات دا إطرشنا
إلا يكون حمار نوماً عوسي ولا داعشي  
والأغرب من كِدا
كمان جاب ليهو احتجاز واستجواب وتعذيب على الطريقة الايرانية !!
مش كدا وبس كمان يخمك يرميك في الشارع !!
بالله دا كلام دا ؟؟  حمير النوم دي جنت ولا شنو ؟؟
غايتو الإختطفو البنية دي إلا يكونو مشبهنها علي زولة "شامنها"
مش كِدا وبس كمان جريمتا كبيرة وضد الدولة
والدولة دي مافي زولة مقابلاها اليومين إلا إمرأتين مافي غيرن
شديناهن فوق الله والرسول الهاملات المطلوقات المُضِرات
واحدة فيهن فاتو بنسودة أم شلاضيم بي شعيراتا
قاشرة بمنصب المدعية العامة لمحكمة الجنايات الدولية
إنت كان عندك عمار ما تعملي في قامبيا مالِك قاعدة في لاهاي ؟؟
إلهله سنيناتك بركة النبي الدول ماجنبك عميا منهن ؟؟
وإن بقى خائفة من بريطانيا وفرنسا والمانيا
ما تمسكي في ناس لكسمبورج ولتوانيا وسويسرا الدول الزي نجوم الغد دي
"حقيرة حقيرة في الحيطة القصيرة"
والتانية مافي غير الايطالية فريدريكا موغريني أم عصيبات ممثلة الاتحاد الاوربي
الشككت في نزاهة الانتخابات وقالت مخجوجة قبال ما تبدا
الله يخج مصارينك علي كبدتك علي كلاك
أها كيتاً عليك مهرجان الانتخابات بقى علي التنصيب
وكان ما حدثوك جهزنا الجلاليب والقفاطين عشان الاحتفالات
"وبيني وبينكن انتخاباتنا بقت زي حفل الزفاف"
"حفل الزفاف الفيهو العروس داخلة في السابع بإسبوع"
"والعريس راكب حصانو ورابط هلالو ويهز في سيفو يبشر"
والأصم يزغرت بي إيديهو الاتنين
ظبطا لا خوف لا وجل بل نتايجو ذاتا مضمونة
"كِرتِلة فيها تلاتين شجرة" والبقطع واحد بس معقول تجلي ؟؟
والكرتِلة التانية حقت ناس "قريعتي شاحت"
ولو ما كدا الرئيس "قيد التنصيب" بسافر ولا بقطع تظاكــر  
هداك جهز عفشو ماش جاكارتا الاندونسية لـ"الأفروآيشن"
وكان فاتو قلبا محدثا التلحقو في جاكارتا عشان تشوف شُعاع
غايتو بت كدودة بقت عليها حكاية شقي الحال البقع في القيد  
جهاز راس الدولة عينو في ناس موغريني وبنسودة ويعذب في بت كدودة ودا عيب
لك الله يابتي




الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الثلاثاء 21 أبريل 2015 - 18:08

المحبوب خلى بتنا فريدريكا موغريني فى حالها ... وارعى بى ناس فاتو بى غادى لى بنسودة ...
انت نازل نبز فى نسوانا .. قايلن هاملات ولا شنو ... والله تقبل عليك بت ميركل الا توريك ليهو ...
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الثلاثاء 21 أبريل 2015 - 18:22



يا دكتور الهملة دي كيفنها ؟؟
وإن شاء الله ما يبقى كلام
ما سمعت بي رحلة جاكارتا والرُكب المتخابتة ؟؟
تتخيل الجماعة منتظرو لكن بنسودة قالوا لابدة في سنغافورة
إنت يا دكتور سنفافورة دي بي وين لي جاكارتا ؟؟
بعدين ميركلنكن طلعت طيبة خلاص
شايلة ليها موبايل مالينو ليها أجهزة تسنط ما جايبة خبر
واسي منتظرين الامريكان يفكو الشمارات
والله هامبورج دي كان تبقى ليك خرم إبرة
غايتو كان سابينا قرت الكلام دا إياني المستقيل



الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الثلاثاء 21 أبريل 2015 - 18:32





بصراحة بنسودة دي تخوف فعلا
أولاً جهامة والعينين زي الشرار "محمراهن"
واحد صاحبي أندوسي قال لي شافا أمس القريبة دي
شايلة ليها عكاز وواقفة ليها تحت شدرة في سنغافورة
وحسب كلام الاندوسي قال شختت ليها شخيت
وقالت الراجل الجي يقطع الشخيت دا
ولمن شافت السنغافوريين مستغربين قالت ليهن:
"هويا الطير ديل أنا ما معاكن إنتو إنتو إن قدركن "
وكمان ضحكت قالت ليهن إنتو فاضيين من أكل عقارب الجمال
وبت كدودة كان شالت ليها عكاز يمين زول كان بصلا مافي






الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الثلاثاء 21 أبريل 2015 - 18:36











الرجوع الى أعلى الصفحة اذهب الى الأسفل
عثمان فارس




مُساهمةموضوع: رد: يا جماعة هوي البتزرزرو فيها دي ما "فاتو بنسودة" دي بت "فاروق كدودة"    الأربعاء 22 أبريل 2015 - 20:28

يا محبوب سلاااااااام

قدر ما نقول نصوم من الكلام

نلاقي فعلاً (الغريق قدام)

..انه المضحك المبكي










الرجوع الى أعلى الصفحة اذهب الى الأسفل
 
يا جماعة هوي البتزرزرو فيها دي ما "فاتو بنسودة" دي بت "فاروق كدودة"
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: