الرئيسيةس .و .جبحـثالتسجيلدخول
شاطر | 
 

  سمساعة جاكن بي نيابتو ومحكمتو !! إلا داير يجلد المزارعين "بنطلون وإسكرت وبلوزة"

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: سمساعة جاكن بي نيابتو ومحكمتو !! إلا داير يجلد المزارعين "بنطلون وإسكرت وبلوزة"    الأربعاء 10 يونيو 2015 - 10:45







سمساعة والله اكان سمعت بيهو قريب دا
والليلة لقيت ليهو تصريح منفوش "نفِش قطن" في كافة المواقع
قال كشف "انا فهمتها حتاهو" اتراقصت خير
كشف عن خطوات جارية "الواقعة ما برفعا"
وشدة ما الخطوات جارية إنت ذاتك لمن نفسك يقوم
أها زول جا محافظ "ذراعي" ومعاهو خطوات جارية مش ياهو القنقر والموليتة ؟؟
أنا براي فرحت قلت خلاص حا نرجع نغني غنانا الطاعم  
باسم الخضرة والحقول والكنوز من باطن الارض تنادي
وماشاء الله سمساعة ذاتو في الصورة بشبه الموسيقار الماحي سليمان
يعني راسنا عديل مع إيلا من حفلة لي حفلة نحتو حت النبق
ولمن بديت أقرأ في الخبر بصراحة أصبت بإحباط
ومن شدة الدهشة غلبني الرقيص ويا جلدة ما تمت
والخطوات طلعت ما عندها علاقة بالقمح والوعد والتمني
نيابة ومحكمة !! أسي الدخل دا في دا شنو ؟؟
أنا في البداية شكيت قلت إلا عينوهو في النظام العام وضِهِب وطشه شبكة
باقي اليومين ديل كشوفات التعيين مالية البلد وممكن تتلخبط
يطلع إسمك في كشفين مثلا وزير دولة بالمالية المركزية
وفي نفس الوقت تكون مكتوب والي لولاية الكاملين أو الدمازين عادي
تخيلو خطوات لإنشاء نيابة ومحكمة خاصة بمشروع الجزيرة
نيابة ومحكمة دا ما جلد راسو عديل
أسي في داعي للنيابات والمحاكم ؟؟
ما أي مزارع يقل أدبو تطقو بي طورية ولا سلوكة وتريحنا
زهجتونا ذاتو نظام عام نظام عام
كدي النشوف إيلا رايو شنو ؟؟


الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: سمساعة جاكن بي نيابتو ومحكمتو !! إلا داير يجلد المزارعين "بنطلون وإسكرت وبلوزة"    الخميس 11 يونيو 2015 - 6:20




المعيلق:

كشف محافظ مشروع الجزيرة المهندس عثمان سمساعة عن خطوات تجري- حالياً- لإنشاء نيابة ومحكمة خاصة بمشروع الجزيرة، وأعلن في جانب آخر إجازة لائحة المحددات الفنية والدورة الزراعية والري والوقاية بالمشروع.


وقال- خلال الاحتفال الذي نظمه مزارعي القسم الشمالي والشمالي الغربي في منطقة المعيلق أمس الثلاثاء بمناسبة تعيينه: إن الإجراءات القانونية ستطال أي مزارع لا يلتزم باللائحة، ونبه إلى توجيهات رئيس الجمهورية المشير عمر البشير بالالتزام بزراعة محصول واحد في النمرة الواحدة، وشدد سمساعة على ضرورة الالتزام بمواقيت الزراعة؛ لتفادي اختناقات الري، مشيراً إلى أن مياه الري المخصصة للمشروع تتراوح بين 6 إلى 7 مليارات متر مكعب، وسخر سمساعة من الأصوات المناوئه لتعييينه محافظا للمشروع، وقال: أنا لم أطلب من أحد التوسط لتكليفي بهذا المنصب، ووصف تكليفه بهذا المنصب بأنه غليظ وليس جلوساً في المكاتب الباردة، وزاد مخاطباً المزارعين نحن جيناكم مبشرين ومنذرين، نافياً صلته بعمليات الخصصة والهيكلة والتصفية التي شهدها المشروع

التيار

1/ خطوات تجري- حالياً- لإنشاء نيابة ومحكمة خاصة بمشروع الجزيرة
2/ انا لم أطلب من أحد التوسط لتكليفي بهذا المنصب
3/ ووصف تكليفه بهذا المنصب بأنه غليظ
4/ وزاد مخاطباً المزارعين نحن جيناكم مبشرين ومنذرين






الرجوع الى أعلى الصفحة اذهب الى الأسفل
 
سمساعة جاكن بي نيابتو ومحكمتو !! إلا داير يجلد المزارعين "بنطلون وإسكرت وبلوزة"
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: