الرئيسيةس .و .جبحـثالتسجيلدخول
شاطر | 
 

  ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الثلاثاء 16 يونيو 2015 - 8:09





إلتقطت عدسات المصورين "الشمشارين" غندور "يبكي وينتحب"
وعابو عليهو الدموع "خلف الرموش" وشبهوهو بالنسوان البكايات
أنعمنهن ذكوريين "بي خشومن" فيها شنو لو الرجل بكى وإنسحب ؟؟
لا ثقافة لا تعليم وقلنا الإنسحاب الاستراتيجي أصلهن ما سمعو بيهو
طيب البكاء التكتيكي دا داير ليهو شنب وجلابية وشال ؟؟
يشيلكن الشال مراة ولدو في صفِحتو
أها يعني لو الواحد ليهو شنيبات وخنقتو عبرة "بفتح العين" يبلعا ولا كيف ؟؟
ما لازم يفكها كدموع سخينة تجري على الخدود الرطيبة التخينة
الشمشارين ديل في داعي ينتهكوا الخصوصية ويصورو الأريب النحيب ؟؟
وأنا "أعوذ بالله من الأنا" كمثقف وعندي دكتواراه مفروض ما آخد بالنتائج بل بالمسببات
ولازم "الضلِع" على الشروحات الفقهية والمراجع العلمية حتى لو كانت بلغة "الزولو"
ولابد كمان من إستصحاب كافة الجوانب والاُطر والمحددات وأن أنأى عن الإستسهال
لطفاً لمزيد من الشروحات يمكنكن الرجوع لمرجع "تبرير الهروب في مواجهة الكروب"
المهم ماعلينا دا كلام شرحو يطول وانا لا أحب الاسترسال فيهو إلا في المؤتمرات العالمية
أها ناس تكالبت عليهن عصابات الامم تكالب الأكلة على القصعة
كان قالوا ليهن حمديلا علي السلامة وبركة الربنا أنقذكن من ناس مانديلا مش كان أخير ؟؟
وكإنقاذيين لا هن قِلة ولا هن غثاء سيل عشان تتداعى عليهن عصابات الامم
لا هن هينين ولا مقطوعين لينين مرقوا بالووتركلوف زي الشعرة من العجين
طيب زرة جنس دي البقت عليهو قبال دا منو ؟؟ ما تجاوبو !! وكان علي غندور
إياهو الببكي !! جابوهو وزير خارجية شهر ما كملو يقولو ليهو خلاص كمشنا ليك الزول ؟؟
ما بي موية وكملت وكلو حا تذروهو الرياح وغدا نصبح حطاممممم
وعليكن النبي الزمن دا العضة وين غير وزارة الخارجية ما من طيارة لي طيارة
يقومن علي خدمتك شابات زي اللوز والمنقة بالموز كان ضلالي كان "كوز"
والعجب كان بقيت علي مثنى ورباع تقوم تعينا تختها في سفارة في كوجِنهاجن
إن جيت ماش أسمرا تغشاها وإن بقيت جايي راجع من بورما تتكل معاها
"عليك الله خليني من شغل العيش الميت دا كمان بقو يعبرو بي كيس التمباك"
"دا أم فتفت ما تفرتقو واللبان الشِكلِت ما تجيب في ريحتو خبر تفي عليهو"
أها ولو بقى في إجتماع للجمعية العامة للأمم المنتحبة تسوقا معاك تتسوق
وبدل سعد قِشرة وسوق الناقة تخفسو تمرقوها في تشيلسي جيرل والأبل ستور
ولو لقيت فرقة أثناء الاجتماعات طوالي البيرل ريفر مارت في الحي الصيني
بالله عليكن غندور كان بكى ما ليهو حق دا كلو بلقاهو وين حدثوني ؟؟
شوف وجعة ناس البافانا بافانا أتاريهن ما هينين يتراقصوا في عِز المظاهرات
كانو دايرين يمرقو غندور ملوص وليهو زمن قانص للترطيبة دي لا كلّ لا ملّ
والله أنا كان محلك "ساقو مني" ورجعوني تاني مواطن عادي زيي وزي الناس
أبكي دي شنو كمان ؟؟ يقوم واحد يقيف جنبي يسكتني بي كلمتين وخلاص
آآآي التبكيني بنسودا المراة دي إنتو مالكن ومالي
هو ببكي ساي والله أردح ردحي بالصِح اللقدر زول يقبضني
وأقلد من طرف يقولو اللِقولو "قول العين ما كتل غنزول"
وهو بنتظر لمن أصِل مطار الخرطوم ما من إسما شنو ديك بتحزم وبتلزم
وأربط الشال المشغول السمح دا في نص بطني "ممكن ألتقو بالعمة كان قصر"
ويلا "حي ووب حي ووب حي ووب" والعجب كان نزلت لقيت نُقارة
هلا هلا ما ما ببكي ليك الدنيا دي كلها ودمعي يشتت يغلب اللقاط
وتوقد "فار" وتصبح رماد في الخرطوم ..
بافانا بافانا "كفانا" "كفانا" قطعتو قلبنا
إستغفر آآخوي وأنعل إبليس وربنا ما يوريك جنس الخُلعة دي
ومن بكرة أمش الوزارة الناس منتظرنك بالمناديل
ما تشمت فينا الشمشارين أسي يقولو ديل منتخبين ولا منتحبين ؟؟



الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الثلاثاء 16 يونيو 2015 - 11:36




عقب وصول الرئيس عمر البشير قادما من جنوب افريقيا
وقفت أعداد من قيادات المرأة بقيادة البرلمانية د. سعاد الفاتح
وهن يكبرن بصوت عال وحسب "الجريدة " تعالت الهتافات بصورة عشوائية من هنا وهناك
بخلاف التكبير "بالروح وبالدم نفديك يا بشير"
و(نحن معاهو الله رعاهو)
و(إنت بخير نحن بخير)
وعند خروج وزير الخارجية من المؤتمر الصحفي اتجه ناحيتهن مكبراً ومهللاً
ولم يتمالك وزير الخارجية بروفسير إبراهيم غندور نفسه
وذرف الدموع قبل بداية المؤتمر الصحفي الذي عقده أمس بالصالة الرئاسية بمطار الخرطوم.

علي ذمة الراكوبة




الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الثلاثاء 16 يونيو 2015 - 11:51

يا حبيب .. كتاباتك مثل صينة الوالد الجراد الرحمة تخشاه يمنة ويسرة ما اصبح صبحا او اليل ليلا ... تقعد تاكل بمزاج ما شاء لك الله من لحوم وسلطات وكسرة بكسر الكاف وخبزا طيبا وملاح ولا الشيف اطيب .. اها كتاباتك محل ما تلقط تستمتع .. شى جناس وشئ طباق .. وشى تلميح وشى تفضيح .. شئ تشبيه وشئ تشنيح .. شئ ساهل وماهل وشئ صعيب وناشف ...وهلم جرا .... متعك الله بالعافيه والصحه ..
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الثلاثاء 16 يونيو 2015 - 16:48




يادكتور ربنا يديك العافية وكل عام والناس كلها بالف خير
نسلم بأنهم منتخبين بالفعل من الشعب ونفترض وجود الدولة والمؤسسات
تخيل نسوان يجن ويزغرتن ويهللن ويكبرن
"نظام تضامن مقدس مع الرئيس في محنته "
مع انو مفروض يكون في شخص أو جهة تتحمل مسئولية البحصل دا
من رحلة نجيريا كان واضح بانو في جهات كانت بالمرصاد ومنتظرة الفرصة
وفي آخر دقيقة الرئيس حزم حاجاتو وغادر قبال ما الفاس يقع في الراس
فما ممكن تسافر في تجاهل تام للمستجدات المتسارعة والعلاقات المتشابكة
وما طرأ على الأحداث محليا وإقليمياً ودوليا
رجل الشارع العادي كان مستشعر خطورة الخطوة في ظل مذكرة التوقيف
فهل يعقل غفلة وزارة الخارجية وعدم مقدرتها على الإستبصار ؟؟
ماعارفين توقيع جنوب افريقيا على ميثاق روما ؟؟
ماعارفين طبيعة الحكم هناك المرتكز على الفصل بين سلطات الدولة ؟؟
"وبطبيعة الحال السلطة القضائية من ضمن تلك السلطات "
مع انو عندهم سفراء وقناصل وممثلين مالين الدنيا
دا غير جهات العمل الاستخباراتي
ومع دا كلو يقوم وزير الخارجية "قدس الله سره" يفاجي الناس
ووين ؟؟ في المطار منفوخ واقف لمبة يجعر ويتنهف
الفكر غائب تماما
في تمام وقت حضور الرغبة الملحة في الكراسي دون الوفاء بأي إستحقاق
وزارة الخارجية بجليل مهامها تختزل في بكية وتجعرة
في حضرة سعاد الفاتح الجات المطار تجامل الرئيس
وعلى فكرة سعاد الفاتح مشار لصفتا كبرلمانية
"تمش المطار ولا السكة حديد تكبر وتزغرت وتهلل" وخلاص "ما برلمانية"
كلو قاعد امفكو رئاسة فيها خمسة مساعدين واتناشر نائب
والبرلمان يقنت الناس واقفة علي حيلا المحل ماشايلن
زول واحد يقدر يقول للناس ديل الكلام دا جوطة ساي مافي ؟؟
يتخيل لي غندور كان ما بكى ناس سعاد الفاتح كانن شالن حالو
ويسونو ونسة في فريق الكدسة وحا يقولن قصر في مسئولياته  
بلد بحالها شغالة شيلني واشيلك والرمة وحباسة
وتدار وتساس بإنفعالات وعواطف مجموعة عيانين "سلباً وإيجابا" ؟؟
عموما والله الحال بقى مابسر لا عدو لا صليح
وترا بالنسبة لينا مافي غير ورجغتنا دي الانت سميتا كتابة
والسلام ياروح البدن


الرجوع الى أعلى الصفحة اذهب الى الأسفل
ودعيسي




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الأربعاء 17 يونيو 2015 - 5:29

حنييييين يا
الرجوع الى أعلى الصفحة اذهب الى الأسفل
كوثر يوسف عبدالصادق




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الإثنين 22 يونيو 2015 - 8:02

المحبوب ....ياخال متعك الله بالصحه . يعلم الله كتاباتك الانت مسميها ورجغه بننتظرها بفارغ الصبر لانها بتفش فينا غباين كتييييره . واسلوبك السلس الحلو بخلينى ماشايفه الكتابه من دموع الضحك . سلمت دوما وواصل دون فاصل
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الإثنين 22 يونيو 2015 - 18:51




ياتيكو كيفك ورمضان كريم
لمن الزول يقرا كلامك وكلام وعيسى بيصاب بحزن
علي الحزن الملازمنا وابى يفوت
وما تساليني عن السبب
حمدو في بطنو "بعد الافطار"
نتمنى ببركة الشهر الفضيل دا الناس تعود
اخاف يجي وقت ما نقدر نسلم فيهو على بعض
على الاقل في مثل هذه الايام المباركات
وكل عام وانتم كلكم بالف خير


الرجوع الى أعلى الصفحة اذهب الى الأسفل
كوثر يوسف عبدالصادق




مُساهمةموضوع: رد: ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة    الثلاثاء 23 يونيو 2015 - 10:09

والله ياخال فهمتك بس ماف شئ مستحيل ووحات الله ورسولوا مشتاقين كتير للمتنا فى رمضان وفطورنا الجماعى فى الاكاديميه . وعلى المحبوب وكج الفراخ وانتى يابت عمسيب عليك العده والرغيف والطعميه على جعفرون وعشى وودعيسى الحاجه الحلوه وانتى ياتيكو سلطة الروب وساره الجاك وساره اسماعيل التقليه والمغربى والبليله وحاتم عفيف السلطه الخضراء لانو بقطعها دقااااق على قول عواطف وناجى الجندى ومحمد جعفر ووجدى يوسف العصاير .ياااااااااااه ويقعد عمك حسن ويتربع جلسة بعد الافطار ﻻنو هو المبرمج لجميييع المدعويين .بجد ايام لا تنسى ولن تنسى ياخال .بس ماف مستحيل
الرجوع الى أعلى الصفحة اذهب الى الأسفل
 
ياغندور دا بكا شنو الميت دا !! والله أنا كان إنخلعت جنس الخلعة دي أردح ردحي !! وزير خارجية شهر ما تمو ؟؟ صورة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: