الرئيسيةس .و .جبحـثالتسجيلدخول
شاطر | 
 

 زول ساي يبارك لي آداء القسم "اليمين الدستورية" مافي ؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: زول ساي يبارك لي آداء القسم "اليمين الدستورية" مافي ؟؟    الإثنين 22 يونيو 2015 - 19:09





إختلاف الرأي لا يفسد للولد قضية
وكمان لو لا اختلاف الازواق ولا الاذواق ما عارف
لبارت الوظائف العمومية
المهم لي كم يوم كل مرة افتح الموقع
وجري على المنبر العام
اقول امكن زول يشوف صورتي بين الجموع
ونحن نؤدي اليمين الدستورية
زول واحد بكلمو بي التكليف الجديد مافي
عشان تجهدو نفسكن شوية تفتشفو وتقرو الكشفوفات
ومن اسي ابعدو من كشوفات النواب والمساعدين الأوائل والمتاخرين
وما تركزو على كشوفات المجلس الوطني
لا تركزو على كشوفات الوزراء الاتحاديين
وكمان ابعدو من كشوفات الولاة ودا شعرا ما عندنا ليهو رقبة
وما يجي واحد يقول لي اسمك ما طلع مع المستحقين
والله ومن شدة ماني مستحق كمان اسمي طلع في كشفين
اللهم كفينا شر العين الحاسدة
وعشان ما الشمار يكتل ناس هناي
فسوف اطلعكم على بعض جوانب الاحتفال
غايتو بركة في المشاوفة الواحد لاقى ناس في الفيسبوك مالامي فيهن
ناس من العالي والعام ما لاقيتن
لقيتن ليكن متحزمين ومكفكفين يدين الجلاليب "أقسم بــ ....."
"أقسم بــ ....."




الرجوع الى أعلى الصفحة اذهب الى الأسفل
حسن وراق حسن




مُساهمةموضوع: رد: زول ساي يبارك لي آداء القسم "اليمين الدستورية" مافي ؟؟    الثلاثاء 23 يونيو 2015 - 5:43

كان كدا ياحبو محمداك الخطة الاسكانية مش برضو فيها اداء قسم
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: زول ساي يبارك لي آداء القسم "اليمين الدستورية" مافي ؟؟    الثلاثاء 23 يونيو 2015 - 10:19





ياورقة أقول ليكن اليمين الدستورية تقولو لي محمداك الخطة الاسكانية ؟؟
يعني أقعد أزح لي متين ؟؟ وفي الآخر يدوني قطعة وتطلع فاضية ؟؟
لحدي الآن محمدين بـ"ودساوي" مش برضو كشوفاتنا طلعت بي هناك ؟؟
النميري "عليه الرحمة" قالوا كان معجب جداً بالصلحي
أصلو كان لاقاهو في الدوحة وفكر يضمو للكشف في أول تعديل
لكن لمن رجع الخرطوم راحت ليهو حكاية الصلحي وشبك في "صالحين"
ورشح صالحين للثقافة وفي الكشف "زمان كشف واحد" ظهر اسم صالحين
وفي يوم "الحليفة" والناس واقفين صف بدوو يندهو في الأسماء
والنميري لاحظ لوزير الثقافة لقاهو ما ياهو الزول الفي بالو
المهم أكلا يا الله ويامين لكنو سأل المسئول الجنبو
"إنت دا منو الحلف وزير للثقافة دا ؟؟"
قال ليهو "سعادتك دا ما محمد خوجلي صالحين الرشحتو لينا إنت"
رد عليهو بسرعة "لا ياخيييي ......"
"أنا قاصد الراجل المسغف الفنان وعندو لحية وشغال في الدوحة داك "
"إنت بتقصد الصلحي سعادتك ؟؟"
"أيوة أيوة أيوة الصلحي مش صالحين "
على كل حال القصة دي "كان كِضِب كان صِح" أنعشت آمالي
وقلت يا "ولد" ما تجرب حظك إمكن ربنا يكرمنا لا نحراها ولا ندراها  
ولمن إقترحت الفكرة لواحد قريبنا دستوري قال لي ما تحلم
وعن السبب قال لي "إنت زمان الله أكبر بتاعتك كانت ميييييتة"
أنا خوك إنت كيف الكلام دا ؟؟ إلا كان يوم كنت ما فاطر ولا حاجة
وحكيت ليهو بأنو الهتافات دي دايرة ليها سندة في الجوع ما بتبقى
وأسي كان ما ساي أمين حسن عمر دا بعرف هتاف ؟؟
وفي واحد قريبنا "تاني" مسلط إقترح علي حكاية "الفكة"
قلت ليهو ناس الفكة كتيرين ياخي وبقو أكتر من الهم في قلب القصر الجديد  
وعرفت بعداك بأنهم "ناس قريبي المسلط" سجلوا ليهن مؤسسة سياسية
وإختارو الاسم ما شاء الله "القوى اللبرالية الديمقراطية جناح الهامش" دخلتو
لكن جنس إجتماعت وجنس لجان وجنس مماحكات التقول دايرين نقلبا  
غايتو الحمد لله قدرنا نخش الشورت لِست بتاعة المشاركة الفاعلة
وقريبنا المسلط إشترط علي خشمي ما أفتحو لا بي أعوج ولا عديل
قال لي في ثوابت أصلك ما تحرك "ساكنا"
قلت ليهو بيوت الحكومة ؟؟ والله مكجنا حيشانا قصيرة
قال لي لا يا حِدق الجنائية الدولية وارنيك خمستاشر وخصخصة المؤسسات
إن قالوا دايرين يخصخصوا ضريح السيدي الحسن تقول آمين
ونسة مافي بس تعتمد على التصريحات الصحفية "حا نعمل وحا نقوم"
وإن قمت ولا قعدت زول بسألك مافي
المهم تبقى زي الباص المكتوب عليهو  "بكرة الركوب مجان"
وفي الرياضة يدعموك وتدعم  
و مافي ما يمنع تبقى رئيس في واحد من أندية القمة
أغنيتك المفضلة لازم تكون "وصونا قالوا لينا الشردة عيب وشينة..
"عييييب وشينة..والراجل الحمش ..فوق الجمر بمش ..ويخلي سمعة زينة"
غير كِدا تلزم الصمت "أها مش خشمي بقدر عليهو"
وهو أنا فاضي ما من إجتماع لي إجتماع ومن لجنة لي إنبثاق ليوم الحليفة
ولمن الكشوفات طلعت "إعمالاً لمبدأ التقسيم العادل للسلطة بين المكونات "
قلنا ما مشكلة ما دام لقينا السلطة فالثروة ساهلة تجنيب بنحصلا
وبأمانة في كل الاجتماعات الناس دي كلها أمنت على التقسيم العادل للسلطة
وعشان ما نظلمن ساي والله واحد جاب سيرة الثروة في خشمو مافي
والكلام كلو عن القوي الأمين الأحسن من القوي وماهو أمين
والحمد لله مشيت كويس وإلتزمت بالموجهات ونكران الذات
لدرجة إنو فناني المفضل بقى فرقة الصحوة وشنان ومرة مرة قيقم
لكن نجاة غرزة ومريم جراكين ما بسمع إلا مديحن ولا أناشيدن الوطنية
وفي الصحوة والمنام تلقاني اردد "لا لدنيا قد عملنا نحن للدين فداء ........"
".....فليعد للدين مجدا أو ترق منا الدماء أو ترق كل الدماء"
وقدرت أباصي كل المحن والشدائد ساعدتني الجلاليب والشالات المطرظة
مرة واحدة غلطت وكان في نقاش جانبي كِدا ولا عليكن بيهو
قلت تعيين فاتو بنسودا في الجنائية الدولية إنتصار للمرأة الافريقية والله ما زدتها  
وتمرق من خشم العدو إتشالبوني ليك إتنين من الاتحادي جماعة الدقير
وكان ما فتحية الملازمين كان لحقوني بروف عمر أبو زيد الياصفني ما يتوصف
الحمد لله ما سمعوني آل البيت البقسمو في السلطة بالكاس يمين كانو جنبوني
ومن ديك تاني قلت يا ولد خليك حريص مالك ومال الشِبك
وكلامي كلو بقى على شاكلة "المحاور والأُطر وحقيقة ونحسب ونجنب ونحتسب "
أها يوم الحليفة جيت بدريييي زيي وزي الناس ودخلتي القصر إتفاجأت !!
من الريسيبشن أشوف ليك السبورات أمات حمالات ديك الما بتغباني
ملصقين عليها أسماء المستحقين قريب تلاتاشر سبورة مشوبحة
أول ما دخلت داير أبدأ أقرأ "شفقة بلقيسة الربطت الزمام في ديسه"
وبالفعل جنبت كدي قريبي "نبهني" وقال لي مالك مستعجل كشوفاتنا هناااااااك  
وواصل داير تقرأ شنو دي كشوفات الرئاسة والنواب والمساعدين والمستشارين
والجنبها دي الوزارات الاتحادية وشئون الوزراء ووكلاء الوزارات
بي قلبي قلت ليهو "مش جائز تحصل علي حكاية الصلحي وصالحين؟؟"
ودخلنا لي جوة شوية قال لي دي كشوفات وزارات التجنيب "إسِمك في"
والمتلمة فيها الخلوق دي كشوفات ناس المجلس الوطني واللجان المساعدة والفرعية
"هلا هلا رسم الحنة ساهل الكلام الدخان والدلكة النوم من عيني شلته"
حسبو فلاحتو في ستات الشاي والمشوشوات في المجلس مطنشن
ما علينا وأنا بطالع في كشوفات الولاة لاقيت إتنين من زملانا المؤلفة قلوبهن  
وسلامن ميت بي راس أصابعينن تقول ما بعرفوني "لا يرحمو لا يخلو رحمة الله تجي"
واحد منهن سألني قال لي الليلة الجابك بي هنا شنو ؟؟
طوالي قريت ليهو " إنا عرضنا الامانة .... وحملها الانسان إنه كان ظلوما جهولا"
ضحك قال لي "أها فكة ولا أصل ؟؟" عامل فيها من آل البيت نويت أتثاقل عليهو
قلت ليهو " لا والله حركات ساي"
صدقني قال لي "طيب الجابك هنا شنو ما تشوف كشوفات الرئاسة "
بعد ما مرينا على الكشوفات الناس كلها بدأت تكفكف في جلاليبا
والكتاب مدمدم بي قماش لكن ما بقطع الشك كتاب شنو




الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: زول ساي يبارك لي آداء القسم "اليمين الدستورية" مافي ؟؟    الثلاثاء 23 يونيو 2015 - 12:46

والله حسن اكرمك بى حكاية الخطة الاسكانية دى ...
لكن انا لكفكفة جلابيتك دى غير صحن العصيده ده ما شايف ليك حاجه ...
امتعك الله واللهم اجعله خير
الرجوع الى أعلى الصفحة اذهب الى الأسفل
 
زول ساي يبارك لي آداء القسم "اليمين الدستورية" مافي ؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: