الرئيسيةس .و .جبحـثالتسجيلدخول
شاطر | 
 

  "هيلاري كلنتون" إن شاء الله في "حجتك" ...

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين




مُساهمةموضوع: "هيلاري كلنتون" إن شاء الله في "حجتك" ...   الثلاثاء 15 مارس 2016 - 14:34




ولا دايرة مننا شُكر
ولاهيا مشحودة
من يوما عديلة
والله إلا ما تسمع بالشيء
قبال دا في عرس ود بت المِنى جات قعدت واحد وعشرين صباح
خدمت الناس حفيانة
العواسه بالصفيحة من تُكُل لي تُكُل
لي موية رمضان ركبت مع الناس مرقتا في ود أبطينة
بيل كلنتون بي جلالة قدرو جا لا حقا
كنا قاعدين جنب الظلط نشوف ليك السياحي وقف "والقليب رجف"
ونزلو منو تلاتة تنفار عرفنا إتنين منهن نادر ود الخليفة وعثمان ود الجمرو
يا حليلن جوازاتن كانت جوة السفارة
عِلا الحمد أشرو وسافرو وعثمان قبال تلاتة أيام رسل ليهو موبايل لي النعمة بت جار النبي
نزلوا من السياحي ولمن جوو قاطعين الظلط كان نادر شايلو الشنطة
وعثمان ماسكو من ايدو
ولمن قربوا لينا في الضفة التانية من الكورة العرضية
أنا براي قلتا دا منو الليلة الجانا يتكل في أنصاص الليالي دا ؟؟
"بيل كلنتون شخصياً ؟؟"
"ها زول حمدِإلا على السلامة وصلت متين ؟؟"
وقبال ما نسالمو قال لينا دقيقة النقطع "الجُمار" وأجيكن
أها "بدون مواخذه" شال ليهو طوبة ومشى بعيد لمن وِصِل "الشِقِل"
وإن ما مصباح كورك ليهو كان لليلة ماش
"آآزول خلاس قبلك ما تدخل وسط الشِقِل دا تقرصك نصيبة"
قضى حاجتو وجا راجع يربط في "تِكتو" وماسك طرف الجلابية بي خشمو
قالد الناس القِدرو يقيفوا علي حيلن كلهن نفر نفر  
قلنا ليهو أقعد فرق معانا شوية لكن قال تعبان اليوم كلو أخدو سفر
قام طيفور سألو "الشيء إتحركت من نيويورك مباشرة لي هنا ؟؟"
قال ليهو أبداً والله يا ولدي عديت يومين في ستكهولم
طيفور بي طشتو ديك سألو تاني "مالن ناس ستكهولم نعل عندهن عوجة ؟؟"
قال ليهو أبداً والله
"مشيت بي دعوة"
"جزاهم الله خير لكن الدعوة من منو فيهن ؟؟"
دا طيفور وكان في حالة إندهاش مِشعشِع
"من الرابطة السويدية المناهضة لتعذيب المعتقلين السياسيين في العالم الثالث"
هيلكن هو ما "السكو سكو"
ولا يعرفه إلا الراسخون في علم فضاءآت الصقائع  والشعشعة في الليل والنهار قطائع"
وفي هذه الأجواء المستفسرة الاستجوابية يقوم ينط الجنيد موجهاً الكلام لعثمان
"عليك النبي سوقو معاك وصلو ناس السُرة بت الخِدِر"
شب ليهو طيفور قال ليهو "أبداً مرتو نازلة عند ناس مصطفى ود الصول النحدثك أنا "
الجنيد طوالي شكمو
"أسكت المِر اللِفقعك ما تيدخل في كلام الناس الكبار "
"أسي بنقلب انجليزي والله تاني كان تبقى زي سايق البوباي الاشارة لا جاي ولا جاي"



ونواصل

الرجوع الى أعلى الصفحة اذهب الى الأسفل
abdelgadir ahmed




مُساهمةموضوع: رد: "هيلاري كلنتون" إن شاء الله في "حجتك" ...   السبت 19 مارس 2016 - 12:41

الشئ المحيرنى انا شخصيا انو ود حبوبه هز البلد من اليمن للشام
علاقة ديل بالانجليز شنو
وهل المسافه بين اليمن و الشام بعيدة لمن تحتاج

لى ود حبوبه كى يهزها
سالت جدى ود ابراهيم محمد الذى حضر كتلة ودحبوبه
للانجليز فى التقر وحضر شنقو ..استشهاده فى سوق الحلاوين
قال لى اليمن دى هناك ورا الشمس وتبرع بان سرد قصة
ياجوج وماجوج وقال هم بشر قصار الواحد عنو اضانين
طول جسمو فبفترش اضان ويتغطى بالاضان التانيه
و القوم دول خجزهم ذو القرنين وراء الجبلين وخروجهم من غلامامت الساعه
التى انكرها الترابى عديل
وقال ذو القرنين هو الاسكندر المقدونى الاكبر 300 قبل الميلاد
لا هو لا معلمو ارسطو قال فى قوم محجوزين
وناسا و اسبوتنكس شبروا اشللا و السما وتحت الماء
ولم يقولوا لنا ان الارض تقف على ظهر سلحفاء كبيره
حتى لا نسالهم عن السلحفاة التى تقف عليها السلحفاء الاولى

الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الإثنين 21 مارس 2016 - 7:59





يا قدورة كيف حالك
نشكرك على المرور ياخي
وربنا يقدم الفيهو خير





الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الإثنين 21 مارس 2016 - 8:00






وعثمان أبداً ما قصر مع بيل قال لي وصلتو لحدي ناس السرة بت الخِدِر
وبيل حلف طلاق بالتلاتة كان يحضر حفل وداع عثمان بمناسبة سفرو
((وسفرك بكرة قالوا يا ناس مالكن ومالوووووووووووووووووووو))
دا ما طيفور جاء حفل الوداع مسنسن يمشي خطوة وخطوتين مستحيل
وشايل ليهو كيس نايلو في بصلتين وباقي شطة خدرا قال أكان يزيدو بيهن العشا
هيلكن يا طفطف العشا ما لقيمات وشاي بي لبن في داعي تتعب نفسك جنس التعب دا ؟؟
والناس يقرقرو في كيسو الجا يلولح فيهو زي منديل ام كلثوم قال ليهن داير يسالم هيلاري !!
سيف رضوان كان قاعد بعيد قال ليهو "سببك ؟؟"
"مالا كانت معاك في وزارة الخارجية يا كرتي ؟؟"
وقال كدي طيفور هوهو ليك في سيف الله ساي فكاهو منو
"تشبهني أنا بي كرتي يا قُمرتي ؟؟"
"مالي دقني حمست وضي البنات مابي ولا بطني كرشت وجلدي خرِش ما في ؟؟"
شبّ ليهن جدي مساعد قال ليهو خلاس يا طيفور نشبهك بي سحلول
وحرم تفتح خشمك بي نضمة واحدة إلا نجدع فيك توب الناها بت مكناس
ومن سمع كلِمة الناها قعد يتوحوح قام وقف قريب لي جدي مساعد وسألو
"دحين الناها دي مش قالوا ختبا وزير خارجية أفغانستان ؟؟"
جدي مساعد ولا مقق ليهو "بالله شوف دا كمان "
" الناها آآيابا ما رضت بي وزير خارجية آيسلاندا شايلو دكتوراه في العلاقات الخارجية"
"تجي ترضى ليها بي ملا ؟؟ الله يا طيفور إمِلك في النار دي "
طيفور أخد ليهو صنة وقام سأل أخت عثمان "هيلاري نعل ما قعدت معاكن في صاج لقيمات ؟؟"
ردت عليهو قالتلو "بري والله حلفنا عليها لكن لخت لينا العجين "
"لي شنو يعني الحقارة في ذمتكن هيلاري عندها مروة لخ ؟؟"
"وكان بتقدر تلُخ كان لخت مونيكا لويسنكي المازي عجينكن اللُكة دا ؟"
وقال ليها كدي زحي لي كدي وقعد يكورك
"تعال آشافع ناغم لي هيلاري دي النسالما الليل هود وبكرة عندي موية في القمح"
ولمن كلما جرت ليها توب ورجعتو قالت النشوف توب تاني دا ريحتو بعر بعر
شبت ليها الصُريا قالت ليها
" مو بعر العواسة آآختي كدي أمشي قالدي طيفور وشمي ريحتو "
هيلاري طوالي شهقت "واو ... يعني ريحتو طيبة ؟؟"
"طيبة شنو يا بت امي عرقي الكنابي أنا عارفا ليك البتشدو منو ؟؟
وبي طيبتا ديك قالت للصُريا" يبدو إنكم لسه في الصناعات الغذائية"
ديك قالت ليها "غذائية شنو آآزولة مو شارب ليهو لبن بدرة عرقي عرقي بتعرفيهو ؟؟"
قالت ليها "كيف ما بعرفو أول البرح لمن الناموس حماني النوم حاجة السرة أدتني كباية"
بت مصطفى من سمعت قالت "السرة شديتا في شيوخ الشيديرات"
وزادتا " شوفي يا بت امي كمان دايرة تبوظ علينا هيلاري"
جات سالمت طيفور والفي راسو داك كلو راح
"الوجعل أم فتفت ؟؟"
جابو لينا الللقيمات ديك مدغناها زييييين لمن آمنا
والطيب ود الزبير قاعد جنبي ياكل ويتمطق وبالراحة قال لي "شُفت اللخ دا كيف ؟؟"
وفك لي شمار قال "بكرة قالو هيلاري معزومة لي عرس بلال والحفلة بي صديق سُرحان"
جدي مساعد قال لينا "والله كان دايرين تطبوظو عين الولية بي عكاز وتوقعونا في شِبك"




الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الثلاثاء 22 مارس 2016 - 16:44





الصباح بدري ماش الشغل لاقاني طيفور وبي نظرة حياني
راكب وينهر في حمارو وظاهر عليهو انو "الهناية ما فايتة مقيلة وبايتة"
المهم قال لي صحي هيلاري جاية حفلة الحنة هولة بلال
الله يجازيك يا طفطف زمان بنسال من الفنان من دار الاذاعة ولا شيلني واشيلك
اسي الحكاوي اتطورت وكمان طفطف داير يجي يغزز كيعانو ويتغزل في هيلاري !!
مخير الله عليك ياهيلاري ويا حليلك من مانهاتن برايت زون ايريا
وياحليلك من نيويورك صني اسكوير والقرين فاونديشن باركس
غايتو حفلة عرس بلال مع عرقي الكنابي وهيلاري كلنتون وصديق شربان اكان الله ساي يتمها
والله طيفور داير يطير فووووو لمن قلت ليهو هيلاري جاية
وكمان اكدت ليهو حسب مصادري الموثوقة بانو صديق سرحان أمبارح في المرابيع وطوالي جايي عندنا
ومن شدة طريبتو طفطف قعد يقوقي وانا منكرب وراهو اسمع ساااااااااااي
اللوري الونه
اب عادماً فنه
خلا الخلوق حزنانين
شال طير الجنه
وقليبي الحنه
قولولو عودتك لا متين
اللوري البدر
لا زار لا ختر
خلا الدموع جريانين
شال غيمي المطر
وحزني الكتر
قولولو فراقك لا متين
اللوري القاقا
السوا عجاجا
حِلو القرين كبايتين
القعدين ديل فراجه
"عرت الحمير كلها اتطورت انت ماشي لي وراء "



الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الثلاثاء 29 مارس 2016 - 16:52






تيست ون تيست ون تيست ون
تيست ون تيست ون تيست ون
طيفور من سمع تيست ون تيست ون قعد يلهله
ياخوانا ما تجيبو العشا
عليكن النبي بتسو ليهو في شنو ؟
وعشان نسكتو قلنا ليهو الرغيف ما جا  
بي طشتو ديك واللسان خلاس بطاريتو دقت الدلجة
"خلاس أدوني لحمة النصبر بيها قبال ما ما يجي الرغيف"
مرّ من الألف واللام والعين بالهوبة
ولمن وصل اليا والشين البطارية إنطفت إلا من "وميض" لميض
بقى زي الصندوق الاسود بتاع الماليزية الوقعت في الكنار قريب لي كبري بخيت  
كل مرة يرسل إشارة "يا جماعة ما تدوني لحمة "
ولمن يسمع تيست ون تيست ون تيست ون يسال "الرغيف جا ؟؟"
كلنا بصوت واحد عشان نسكتو "آآآآآي جا ولقاك نائم تشخر قفا ودور وأخد اللفة "
"يا سمار عاد إنسترو خلاس أدوني لحمة"
فجأة جاتو "صحية" قال "صحي هيلاري فاتت مع العروس الكوفير"
ولمن غلبتنا المجااااوبة قال "أسي كان عزمتو بيل كلنتون جا إتونس معانا ما كان أخير ؟؟"
الراجل قطعتو قلبو باللقيمات والشعيرية والشاي بي باللبن  
الجنيد قال ليهو "إتونس معاك بالفي راسك ولا في كراسك"
قال ليهو "هويا آآلجنيد إن علي الراسُ تراكا شايفو مصلح صلاح السرور"
"وإن علي الكراسُ فنحن ناسُ"
"النبي كان ما أديتوني كأسُ بهذه المناسبةِ السعيدة الله ؟؟"
كشحو وخت الكباية وقعد يدق في التربيزة يغني
" شموس عفة وبدور دورن
بهي الدنيا وزهي خدورن
حليلن لامتي ازورن....
وفك حسو الطاعم في الهوا ونحن نشيل بي ورا
حليل الدر حليل حورن
سحر هاروت سكن حورن
فؤادي الضلّ مسحورن
لابسات روحي في نحورن...... حليلن لامتي ازورن
السيوف طرفك
سلامي الزاكي زي عرفك
يقبل راحتي كفك ... حليلن لامتي ازورن
ود الصاوي قعد يتنهف والدموع زي العيش
خلينا طيفور وغناهو الطاعم وبقينا في ود الصاوي "الغلب السكات"  
يبكي وينجخ والدماع شوووووووووووووووو
يا ود الصاوي ما تستغفر مالك جنيت ولا وشك عليهو ؟؟
أخد ليهو صنه وقال "أدوني ما تفطوني"
طيفور قال ليهو يديك الشقى وعدم اللقى شيل الابريق دا غسل وشك في الأول
بعد غسل وشو قال لي طيفور "لكن ماهردت علي كبدتي وفشفاشي"
طيفور صحصح قال ليهو والله أكان لقيت كاس تاني إلا أقطعك حته حته
ود الصاوي حلف قال يمين كان تدووو
رجع طيفور يردد
طريت بانات تميس راحلة
تميل بي ردوف واحلة
صدور عالية وخصور ناحلة
خدود زاهية و عيون كاحلة... حليلن لامتي ازورن
والجماعة المعاهن كملت والسكوت بقى سيد الموقف إلا من لغلغة من هنا وهناك
حكمت معاهو فجاة قام قال "ياكافي البلا زول يشيل الصلاة علي الرسول مافي ؟؟"
تيست ون تيست ون تيست ون
وقف علي حيلو "حرم أمش أتعشى مع العريس "
وقبل ما يمش قال "أسي كان أديتوني كباية ثبتّ بيها بلال الله داير يحاسبكن ؟؟"
صاح فيهو الجنيد "كدي ألبس نعلاتك وأمش غير هِدومك دي وتاني أمش ناس بلال "
قعد في الجابرة يعاين تحت العنقريب يفتش لي فردة الشبشب
وما نسى يرد على الجنيد
"مالا هدومي دي والله أسي أمش أحضر بيها حفلة في فندق هيلرنتون "
"كدي زح لي كراعك دي النشوف فردة الشبشب دي طيرتوها لي وين "
أنا بصراحة زهجت قلت ليهو "تاني يا طيفور ما تجينا ياخي جننتنا شيل نعالك أمش"
زعل وقف التفتيش وإتلفت علي :
"مالي ما بي حقي والله أجي وأخلف ساق فوق ساق"
"وكمان أدوبي أنحنا بنلعب ؟؟"
واللهلهة الكتيرة أحكمت شدّ وثاقه وقعد يدوبي
انحنا ان دُرنا القعاد والله ما بنتجارا
وانحنا ان دورنا الشراب فأباريق ودنِ وتيبارا
وانحنا ان شدينا الحلل بنسبكا والصلصة ليها نضارا
وانحنا ان شوينا  المزز والله ما بنحتارا
انحنا حللنا عضام كاسيا والدِمع أنهراً وبحارا
شبّ ليهو الجنيد "طيب اللهلة في اللحم دي طيارة عين ؟؟"
قال ليهو لا لوفتهانزا
بهناك الحفلة بدأت ونسمع ليك
ﺍﻟﺮﺷﻴﻢ ﺍﻷﺧﻀﺮ
ﻓﻲ ﺍﻟﺨﺪﻳﺪ ﺍﻷﻧﻀﺮ
ﻫﻢ ﺳـــﺒﺐ ﺁﻻﻣﻲ   ييييييييييييييييي
ﺳـــﺒﺐ ﺁﻻﻣﻲ
وما تقول طيفور المعولق داك
لقيناهو لابس ديك يا الجلابية وجادعلو شال في كتفو
مِستلم الحفلة علي حسابو
لا وكمان عامل مدير  خدمات
"تعالي يا بسمات أقعدي بي جاي "
"إنتي يا تهاني مالك سغيلة كدا "
"ما تزحي ليها شوية التخت كرسيها حِداك"
من بعيد كحل هيلاري كلنتون والصريا جن داخلات
وقعد يردد "الليلة يومنا زي الطين"
هيلاري جات وقفت قريب ليهو قام ترا وقال ليها "كان أي هيلب يو مدام ؟؟"
"واو تيفور وحات السيدي الحسن ماني قايلاك بتعرف لغة تانية"
شبت ليها الصريا "إبقى ليهو بي نار غير اللغلغة ما سمعنا منو شي"
شب للصريا "أها أكان مراة وقلبك محدثك ترجمي الكلام دا "
"عشان نشيلك طب العاصب نوديك أسي دي المستشفى"
هيلاري قالت ليهو " ويتش سي دي يو آر توكنق أباوت تيفور ؟؟"
وصوت الساوند قطع عليهن الحِوار الديقتال  
تيست ون تيست ون تيست ون "والآن سيداتي آنساتي سادتي"
"نعود بكم مرة أخرى إلى عالم الطرب مع الفنان صديق سرحان"
"والفاصل دا يا خوانا لي العرسان بلال وعروستو مفيدة "
وقبل ما ندي المايك لفناننا نحب نرحب بضيوفنا الكرام
الأخ بيل كلنتون الرئيس الأسبق للولايات المتحدة وحرمه المصون "أم شيلسي"
الذين تكبدوا المشاق "جزاهم الله خير"
وقبلوا بتمديد الزيارة لمشاركتنا الفرحة بابننا بلال وبنتنا مفيدة
وقالت كدي الخلوق جضت
وبتاعين الايقاعات
كِري رِج  
كِري رِج  
كِري رِج  
كِرررررررررررررررررررررررررررررررر
المو بانيك و لا صارف عليك موجود
كلامو الفيك زى خنق الحبل للعود
الارزاق مقسمة و العمر محدود
و الهواء عند كريما بابو مو مسدود
كِري رِج  
كِري رِج  
كِري رِج  
كِرررررررررررررررررررررررررررررررر





الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: "هيلاري كلنتون" إن شاء الله في "حجتك" ...   الثلاثاء 29 مارس 2016 - 20:31

ياخى كلام ولا فى الأحلام
منتهى الامتاع
الرجوع الى أعلى الصفحة اذهب الى الأسفل
عثمان فارس




مُساهمةموضوع: رد: "هيلاري كلنتون" إن شاء الله في "حجتك" ...   الأربعاء 30 مارس 2016 - 23:05

يا المحبوب سلااام وكل ناس المنتدي
والله الشوق بخر لكن مشغوليات سااااي الخلتنا نبعد من المنتدي
لكن من اوجاي بنواصل كان الله وفقنا والمسألة كلها توفيق
قصة المسألة توفيق دي بخليها ليك انت بتعرف تقعد القصص مالاي
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الخميس 31 مارس 2016 - 15:01





الفارس عثمان الف تحية وسلام يغشاك كيفما كان الحال
وما تنضم في الشوق تب
لانو الدموع قريبات وقاعدات علي الهبشة
اها انت تم الباقي









الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الأحد 10 أبريل 2016 - 17:44




يا دكتور كنت عايز أجيك بالرواقة ولكن
المهم طمنا عليك وعلى الناس المعاك
وأريتكم تبقوا طيبن ونحن البينا هين زي ما قال جدنا النعام آدم عليه الرحمة


الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الأحد 10 أبريل 2016 - 18:02




بلال شدة الكباية ما أثرت فيهو لمن بقى يعرض في الفاصل
وباقي الضريرة محتحتة في اكاتفينو زي الخُريم حمرا معجونة بي صفار
ومفيدة تتكشم زي نار القصب تغمد وتفتح والبوقوجي مكوم في صنقورا معسِما
في الفاصل طيفور تور ليهو شافعة مغوبشة من الكرسي في التبادي أبت تقوم ليهو
لمن الشافعة قامت قعد يكورك "هويا هيلاري .. هيلاري تعالي بي هِنا"
وخت ليها الكرسي قدام "قعدت والفرح في عينيها تتامل في العطرابة دي"
وطيفور عملا شغلا كل مرة يجيها بي فن
"هيلاري إتعشيتي ولا نعشيك مع أهل بلال ديل ؟؟"
وظاهر عليها كانت مهوية قالت ليهو ما بقدر أقوم أحشي سندوتشي يا تيفور
وقال كدي راسو ضرب"وحلات التا في خشيما الله إنعل أبو الطا ظاطو"
"سندوتشي شنو ..الفوتاريتا دي كان صنقرت في الصينية علي حيلا ما فضلاً من الله"
ناغمتو قالتلو شنو يا تيفور جاها قريب قال ليها " احشي دي ما معانا"
"إلا كان أعجن ليك بي أم رِقيقا ولا قاوِرما ولا كان بي بامية مقمعة ؟"
من أمة لا اله إلا الله دي كلها كان فرزت قاورما
ولكنها أحالت القاف لشين "لشيء في نفس الهيلاهوب"
سألتو "الشاورما دي جكن ولا بيف" وقعد يجقلب لمن سنية ترجمت ليهو
"قالت ليك الشاورما لحم جًداد ولا بقري "
طوالي هرش ليك سنية " أسكتي إتي إن خبرك بالإنجليزي"
"أسي الجاب طاري الشاورما منو ؟؟"
"يشرم رويسك المعمعم زي راس المُترار دا"
سنية قالت ليهو "حقيرة حقيرة في الحيطة القصيرة "
قام قال "الخواجية دي لاطشه ولا شنو أنا قلت ليها قاوِرما تقول شاورما "
قامت سنية ورتا "سوري مدام هي دِدنت سي شاورما "
وهيلاري بلحيل زعلت من سنية وقالت ليها
"سمعتو بي أضاني دي البياكلا التراب والدود في ود اللحد كمان دايرة تغالطيني"
هنا طيفور إنتبه قال لسنية
"هي هي يا بت خلاس كلميها قولي ليها القاوِرما بصلا دُقدُق وصغار حلات الدنيا عليو"
"الشاورما إبقى لينا بي نار "
وفي الساعة ديك صديق جا وبدا بتاعين الايقاعات في وزن الدربُكة والبونقز
وهيلاري يا حليلا لا لمت في عجنة الشاورما ولا جابو ليها سندوتشي القاورما
وصديق سرحان بدأ بي :
"ليلة كنا تائهين في سمر بين الزهـور أنا وأنت والنيل والقمـر"
انا يا جميل بي صوت ضميري المستتر
من شعري كـــم أسمعتك ألحــان في وتر
شفت النجوم تنظرنا بي نظـــرة شذر
لما القمــر في إفقه بغيابه إعتــــذر
صافين عفاف يا حبيب خالين من قدر
في هوانا لا واشي ولا مراقب حــــذر
وحقيقي غناها بي طريقة "كتير مهضومة" ودي بمناسبة القاورما والبامية المقمعة
الناس دي كلها قعدت تقنت نسوان علي رجال
والسرح سرح والطشه طشه نان هو غنا نصاح
"سمر وزهور وشجر .. سكر وأنفاس وخُمر ... وقمر ودموع وخمِرِ"
كــم قلبــي بالأنفــاس لأنفاسك غمـــر
الجـــو سِكـــر من ريك إتعطر خمـــــر
أنا بي غرامــك يا حبيب دمعي إنفجر
أنـــا بى غناك أيقظت سكــــــان الشجر
قبـــال أراك أنا كنت في حيره وضجر
اليوم حظيت بلقــــاك يا ظبي الحجر
ناس تعرض وناس تهز الارض تحت تبتا
واحد اظنو من ناس الحلال المجاورة جا قريب للمكرفون
وقال بصوت مفجوع "نان لكن ما بالغت فوقا يا سرحان"
عمك جلكين واقف جنبنا من بعيد قال ليهو :
"تسرح بي غنم إبليس شحدت ربي عليك"
والساعة القام سرحان الخلفا بي "رقاصة رقاصة يا أسماء زي البانة والبانة منقسما"
الخلوق ضاقت بيها الوسيعة والعطرابة دي حدها السما
وبلال أخد ليهو خفسة برا الحفلة وجا راجع يتلولح مع إنو مرق كويس
لقى كمال ود زهرا في رجا
مد ليهو السوط وركز قال ليهو كان تجلدني  
مسكو السوط في يدو قام كمال ملص العراقي وبقى بالسروال طويل
ربط العراقي في نصو والعيون زي الشرار من "الابيض ضميرك" قال أكان ينجلد
والزغاريت قجت وبتاعين الايقاعات زادو من شدة الايقاع و خفت كثافة الخلوق
طق أطق
أطق طق أطق
طق أطق طق
وانزلي في الرقيص يا اسماء
رقيصك حديث يا اسماء
فاض بينا العذاب يا اسماء
الشيب والشباب يا اسماء
طق أطق
أطق طق أطق
طق أطق طق
الحاجب مقرون يا اسماء
قومي ورينا الفنون يا اسماء
من سنين مجنون يا اسماء
هالكاني العيون يا اسماء
طق أطق
أطق طق أطق
طق أطق طق
قومي وشرفينا يا اسماء
رقيصك الزينه يا اسماء
قومي وغازلينا يا اسماء
وما تخافي الله فينا يا اسماء
ويات من هِي قالت أنا "أسماء"
"والرقاب تعانق العطرابة المعلقة في السما"
ومن بين الجموع تسلل شافع مِدحِش وقف جنب هيلاي قال ليها
"خالتو خالتو جدي بيل كلنتون دا قاعد برا مع ناس الجنيد قال ليك تعالي"
وبسرعة قالت "كدي يا تيفور تُر لي النشوف الراجل دا وأجي"
ومرقت جري
لقتقو ليك ( في عينيهو عالم تاني إن شاء الله ما تشوفوهو يا "إخواني")
واقف لمبة وبصعوبة قال ليها " ود يو لايك تو هاف صم درنك ؟؟"
واتلفت علي الجنيد باقي عامل "إستيف" وماسك الإدارة المركزية والتوزيع
"بليز قِف ها ون قلاس جنود .. "
"أوه ماي قود .. ات از أأديليشص آند أميزنق درنك "
الجنيد بالفي راسو قال ليهو " أنا الجنيد يا بلبل ؟؟"
"علي الطلاق أديها واحد من دا كان تخش الحفلة وتملص جلابيتا وتركز تنجلد"
"بعدين أنا يا غرامي إسمي الجنيد مالك مصنع السكر الليل القصب ما سمعت بيهو ؟؟"
"والنزيدك من الشعر بيت فالجنود ديل بلبسو كاكي وأنا ملاكي "
أها الجنيد ما قدر يستحمل وهيلاري حننتو أداها من أبو سكسك كشحتو وفريري الحفلة
يمين رقصت رقبة زي العجب أوصف شنو ؟؟
القديم ولا الخشيم ولا الديس السادل
تيفور قال أكان يشيل منها شبال
عبد العزيز الأشول بي طشتو مرقا ورقة أم خمسين قال أكان يختها ليها في جبهتا
وقعدنا نلاوي لمن الفاصل بدأ
وفي الفاصل اللخير .....نواصل



الرجوع الى أعلى الصفحة اذهب الى الأسفل
بكرى عثمان حمد




مُساهمةموضوع: رد: "هيلاري كلنتون" إن شاء الله في "حجتك" ...   الأحد 10 أبريل 2016 - 19:48

هوي يا المحبوب لا تجينى بي رواقة ولا حاجتين ..
بس عليك الله كان تزيدها تانى فاصلين ثلاثة .. اهو انا خصمتك بالنبى ..
وبعدين ما عافى ليك كان ما سقتا هليرى وراجلها ووديتهم على المايقوما تخليهم يسلموا على الحاجه قالت بالحيل عايزة تشوفهم .. وبالمرة تغشيهم انداية مكه وحداديه الجنب المايقوما ...
الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الخميس 28 أبريل 2016 - 16:22





النبي عزيز ومكرم
مكة وحدادية يا دكتور
الا كان داير تجيب لينا الهواء
المهم خليك قريب
وربنا كريم




الرجوع الى أعلى الصفحة اذهب الى الأسفل
المحبوب أحمد الأمين




مُساهمةموضوع: رد: "هيلاري كلنتون" إن شاء الله في "حجتك" ...   الخميس 28 أبريل 2016 - 16:35





سيداتي آنساتي سادتي
أسعد الله مساآآكن
نرحب ترحيباً حاراً بضيوفنا الكرام
ونخص بالذكر مولانا بيل كلنتون
وحرمه المصون هيلاري
وتهئنتنا الحارة جمر بس للعريس بلال
ولعروسته الأمورة العسولة مفيدة
والشكر موصول لرابطة تبكي بس بالفيس
وجماعة وحي إلهامي بالواتس
وقروب يا عسل بالإنستجرام
وناس شبابيك الحبيب بالتويتر
نشكرهم جميعاً على مشاركاتهم الألكترونية
ونتمنى أن نفرح معهم في مواقعهم بكل جديد ومفرح
جنبي طيفور قال لي الناس الذاعوهن ديل مالن ياخوي ؟؟
قلت ليهو أبدا ديل ما ناس التواصل اللجتماعي
شكروهن علي مشاركتن الالكترونية في العرس
وبي طريقتو ديك قام سالني تاني "يعني شنو كدي وقع لي الكلام دا"
قلت ليهو عملوا كروت تهنية
وقدمو باقات زهور وورود وهاشتاقات للعرسان
زهور وورود وتهاني وأماني دا كل ال الله قدرن عليهو
نحن هنا ندقدق في حديد الصيوان وندقق في عيش الكسرة
نساكك في عجل الضبيحة نقرب نرسل وراهو طيارة برا طيار
دا غير نقل العيش وملاواة ألواح التلج ودرديق البراميل
وشيل الخدار وفرم اللحمة وكبكبي الطعمية
ومساككة ستات الدكوة لي سلطة الأسود
وغير نهز السواندسيستمات والعجب كان الفنان معاهو فرقة وشيالين
تلقى الحلة كلها تلوس يجيبو داك يفوت دا يجيبو دا تلقى الصبح جا
وروحنا تطلع علبال ما نجيب دفتر الماذون من بيت رئيس اللجنة الشعبية
سكت شوية قال لي كدي خليني من الكلام الكبار كبار دا
"أها ناسك بتاعين المواصلات ديل ياربي دفعوا في الكشف كم ؟؟"
قلت ليهو "إنتا ما نصيح كشف شنو يكشف حالك"
قال لي كيف يعني هشتق بشتق ساي ؟؟
"ياخي هاشتاقات ما هشتق بشتق"
ديل إسمن ناس مواقع التواصل الإجتماعي ومنتديات صوالين الدردشة
أفهم ياخي أفهم
قال لي كان توريني ليهن ساعة الغدا عشان كنت أدشرن ليهو
قام قال لي عليك النبي كان ما دخلت الحفلة وريتني ليهن
وقبال ما يقوم جدع ليهو واحد مكرب وقعد يتوحوح
ونحن في خشم الباب نسمع ليك
بعد ان استمتعنا بأغاني الحقيبة وصورها البديعة
يمتد بنا الفرح بحارا وأنهرا
ترسو  على ضفافها أشرعة الهيام بُعدا
وتلتقي على رمالها قلوب العاشقين وجدا
تتعانق فيها همسات الشوق بنسمات ليل الوالهين صبا وغُلبا
سيداتي سادتي
تتواصل شلالات الغناء واللحن الشجي الطروب
والليل ما زال يحبو في الكي جي ون
وأترككم مع المطرب هشام جرجرة في فاصل من الطرب "الحنون"
ونشوف ليك الاورقن يكنتك أنوارو يوجن
وأنا الله الله قايلو تركرك كان ماسي ولا  فيرجسون
واقف وراهو واحد يلكلك فيهو بأصابعينو العشرة
وجا وقف جنبو جرجرة شايل مايك قالو مايكرويف
قلت الحمد لله ننجم شوية من رقاصة رقاصة يا أسما
زي البانة والبانة منقسا
عججتنا وكندكت عينينا بالتراب  
دا غير السوط الألهبو بيهو ضهور المتجودعين
وبدأ جرجرة في الغناء "الحنون"
كما قال مذيع قناة "أنا والأشواق في بعدك" الثقافية
وبصراحة الاورقن دا ايقاعاتو لذيذة خلاس
وأنا بصراحة بتكيف لي صولاتو ومرات مرات لأمباشاتو
المهم
البداية كانت بي إيقاعات التم تم الما بتغباني
ناس طالعين في الكراسي
الكرسي علي هلهلتو تلاتة واربعة
والحيط مليان
وروسين البيوت تقنت
إلا الساحة كانت شوية فاضية إلا من شفع مدهشن الاورقن
يا حليلن فاتحين خشيماتن يتفرجوا قبال الجموع ما تحتشد
وهو كان بلقو طريقة مع العتاولة البعزلو في الشبالات ديل
مع البداية وقبال جرجرة ما يفتح خشمو
قالوا كدي ناس إسكرت وبلوزة ملو ليك الساحة
وناس "أسما" قعدن في رفوفن
لا جايبات خبر ولا في زول بشوفن
وتعال شوف الجيرك أها أها أها أها أها أها
مجموعات مجموعات وقروبات قروبات
مرة تطش ومرات مقالدة عديل
والغنية كان سمعتها في نهار رمضان تجرح صيامك
ماشه معاك عسل
انا ليك كيفن اصل
ماشة معاك عسل
على راى المثل
دى ماشة معاك باسطه
والدنيا ليك باسطه
داير انا قربك وما لقيت ليا واسطه
دى ماشة معاك حلاوة
وعليها زايد غلاوه
قربك ليا جنه وبعدك لى قساوة
دى ماشة معاك بسبوسه
فاهم الدنيا و دروسه
الريد تجيك جايه واحنا وراك نكوسا
ماشة معاك طحنية
ودنياك حلوة وهنية
وانت ما شاعر بية
الريد مساهر بية والسجم والرماد علية
ماشة معاك قشطة
رويان وأنا عطشت
وشنو كدي ما عارف وعامل لي طِرِشت
ومن بين الجموع إنسل لينا سليمان ود ام مريوم
جر السوط من يد العريس وقعد يهز بيهو
ومشى بي مهل علي بلال بشر فيهو وقالدو زين
ومد طرف أصابعي لي مفيدة
"مبروك إن شاء الله يغلبك بالمال وتغلبي بالعيال"
ومشى علي جرجرة وجرجرة في عديلو
"ماشة معاك قشطة"
وأنا في أول التبادي قلت سليمان عجبتو الغنية
وبهز وببشر فوق الفنان وبرجع
وجرجرة شغال ساي "وماشة معاك قشطة
رويان وانا عطشت"
سليمان ملا يدو كويس وتاخ في قفا جرجرة
وتسمع ليك وااااااااااااااااااااااك "ياخواني أنا أنقشطة "
جدع المايك وقعد ينكرش بي يدي وكرعي
والحكاية جاطت
ناس اسكرت وبلوزة ما رضن وإتأثرن شديييييييييييييييييييد كِدا
لي شنو يعني القسوة دي
لييي ياعمو ضاربو
إضربك بتاع أمجاد يكسرك ويرقدوك في مشفى الفؤاد
يا بت أبعدي مني كدي بعدا إلا من فؤاد ترعاهو العناية المركزة
يقول عادة
دي عادة دي
عادة شنو البتخليك تضربو بالشكل دا
وناس تبكي وناس توصف
آآآي يا جرجرة وحياة الله ما بتستاهل
ساعة نحن نفكفك في الارتباط بين جيوش المؤيدين ومليشيات اسكرت وبلوزة
القال بكشف حالنا في الفيس
والقال بعمل هاشتاق أسي دي في التويتر
المهم قريب الصبح طيفور جاني مرقنا برا ساقني ناس حبوبتي زهرا
قال لي الحمد لله قدرت أمرق هيلاري قلت ما يقومو يدوها "قشطة"
في التزاحم داك طفرتها بي فوق الحيطة وقعدتها عناس حبوبتي زهرا
هي لكن زهرا فارزا شنو تقعدا معاها
والله من دخلتها عليها سألتني
طيفور دي مني دي الجبتها لي دي
قلت ليها  ياحبوبة ما تروقي ساي
"رزقاً تكوسو وهيلاري تكوس ليك"
دي مي هيلاري كلنتون
والله طوالي ترت ليها العنقريب من تحت الراكوبة وقالت لي
خليها التخت صفحتا الفجر قرب يطلع
وقامت سالتني "عِلا مالكن جيتو من الحفلة"
ومشت علي النور ولعت اللمبة
ولمن تأكدت من هيلاري وشافت الحال والجيهة الكبكبة بدت
ووب علي ياهيلاري الناس ديل ما ساهرو بيكي
مالك آآحبوبة في شنو
أنا ماني قايلاها هيلاري كت مرقت ليها اللحاف
قسمت بي الله ما برقدا في الحبل ساي
وشوية شوية الجماعة إتلملمو
حبوبتي زهرا قعدت في بطن العنقريب
تشهد وتستغفر "والله يا طيفور قايلاها هيلاري كلنتون"
العديلة الرايقة الماها ضايقة
طيفور قال ليها خلاس يا حبوبة
خليها الترتاح أمشي غيري قرقابك المِكودب دا
عليك النبي أسي راقدة بيهو كيف
وهي ولا هنا البال بقى كُتُر
كر علي يا هيلاري يابتي
وقامت جات عليها وسالمتا إن شاء الجيتي منهن كيويسين
والله سمعت بي شمار جيتك وعملت ليك لايك في الفيس
لكن مسعولة من الخير
صحي  كونداليسا رايس شالوها في الصالح العام
وهيلاري تتلفت وتتبسم ما فارزة التكتح
لكن يتخيل لي عجبا القرقاب
وصدير حبوبتي العاري الملدل مدرع بالمفاحض والحجبات
كان ما بتعرفا تقول أحزمة ناسفة
وواصلت
وان شاء الله لقت ليها ود حلال
النبي كان عرست رئيس مالي الكان دايرا داك مالا
ما اخير ليس من اللواسة في الحلـــلال برا شغلة
إتلفتت علي قالت لي صحي الحفلة الفرتقا شنو سامعة الكواريك
سرحان ما شاء الله عليهو
النبي كان ختما بالسراي ما كان اخير
قلت ليها نان سليمان بريحنا
تصدقي قشط الفنان
ياتو نعل ما سرحان
قلت لا العمل الفاصل الأخير دا
قالت لي بركة القشطو إن شاء الله غنا الياباني
وفي قعدتنا ديك قدام راكوبة ناس حبوبتي
جاتنا داخلة الرتينة أم العروس
ناغمت هيلاري سلام هولاري الحفلة إن شاء الله عجبتك
كويسة لكن الجلد دا مثير للإشمئزاز
ويا الله ويامين وبعد إهتزاز حتى قدرنا نترجم "إشمئزاز" دي  
وبصراحة حقو تلتزمو شوية بالمواثيق الدولية وحقوق الإنسان
ومافي داعي للعقوبات البتسبب الأذي الجسيم دية  
ولو سمع بيكن بان كي مون بدخلكن بالبند السابع
طيفور قال ليها دي عاداتنا
وهو ذاتو بي عويناتو الزي قدود الجلد بقدر يجي
الجماعة ما قاطعنو معاهو ناشف
وبيني وبينك أنا دايرو يجي  
إن شاء الله يدخلنا بأحسن التوالت
قالت الحيرني الفنان دا ذنبو شنو
قامت الرتينة قالت ليها بركة اللبعو
يعني ما لقى ليهو غنية غير الباسطة والطحنية والبسبوسة والقشطة
مالو يا يا هيلاري يا بت أمي
قالو ليهو نحن عشينا السيرة بي طحنية
حدثيني  
منعول اسم ابوي الماحقتو النعيلة عشيناهن صُفر
وضان مو بقر
لي الجداد دا ختيناهو ليهن في الصينية
وقسم الضلعة قدر التبروقة بي يديك الاتنين ما ترفعيها  
طيفور قال ليها خلاس حقو  كان يدخل في اغنيتو دي  
ماشة معاك ضلعة
وديك رومي ابو صلعة
قلت ليهو الحلة كلها صِلع كان رمو فيهو حجر طاحونة
طيفور قال لي والله كان أخف ليهو من السوط دا
أذن االآذان
حبوبتي زهرا جابت اللبريق ملتو من الزير ناولتو لي هيلاري
ولفحت ليها توب جدعتو ليها وقالت ليها قومي يا حبيبتي صلي ليك ركعتين
وإن دايرة تقطعي الجمار آختي أعقبي علي ضهر البيت دا بي ورااا
وكوركت لي طيفور قوم علي حيلك
جيب ليها البطارية من عثمان راقد بيها في حوش الديوان  
جيبا ليها التقطع بيها الجُمار ماتقرص الامريكان يجو يقيمو فينا الدين


الرجوع الى أعلى الصفحة اذهب الى الأسفل
 
"هيلاري كلنتون" إن شاء الله في "حجتك" ...
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: