الرئيسيةس .و .جبحـثالتسجيلدخول
شاطر | 
 

  واللهِ ياترامب ما قلنا "ليكم تسلحنا"!! قلنا "بيكم تمسحنا" دي فيها حاجة ؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين

avatar


مُساهمةموضوع: واللهِ ياترامب ما قلنا "ليكم تسلحنا"!! قلنا "بيكم تمسحنا" دي فيها حاجة ؟؟    الثلاثاء 11 يوليو 2017 - 17:00




والترجما "مُغرِض"
من الله خلقنا بنتمسح بأولياء الله الصالحين
والترجما ليكم تسلحنا بالغ
او بالع وبهتنا ساااااااااااي !!
شدينا فوق الله والرسول
والله ما حصل
كلام ساي ولا عليك فيهو
ساحات فداء وشنو كدا ما عارف
أيام الخال الرئاسي مدير التلفزيون
هو ذاتو الفاضي منو عشان يتسلح
نحن بنسلح الفلل والعمارات والقصور
وهو ذاتو ياخي طه خلا فينا مروة عشان نتسلح
فترنا من المساككة
نفكو من الناها ينط لينا في أديس
التقول كديس
لمن عمل نفسيات لـ"الرئيس"
نسلح ليكن إنتو ياترامب ؟؟
إنتو ما أهل السلاح وبلد الفلاح
نقول ليك قولة
إتسلحوا لينا إنتو
دمار شامل بتاع شنو
أضربونا وأقرضونا قرض
وهو نحن قاضيين غرض
ما جايبين المرض
والله صحي
يا ترامب ما عليك مدسة
ناس وداد
غرفة نوم عرس بت جيرانن
من ايطاليا القريبة دي ما قدرو يجيبوها
والعروس ما قدرو يرسلوها ستكهولم يجيهوها
كلو بسبب شنو يا ترامب ؟
ما بسبب العقوبات الجائرة
أسمح لينا في الكلمة يعني
وإنتو حاشاكن الجور
المغرضين سمعوا برفع العقوبات
جووا ينقزوا
وكمان جابت ليها "بُهتان"
ما تسمع لي كلام النسوان
بنسودا وبنسامورا
ديل نسوان مطلوقات ساي
واحدة في لاهاي والتانية في جنييف
وكمان الأخيرة دي سوتو أفرش وتخين
وقالت ما بترفع الحظر
إلا بخطاب إعتذار من الوزير شخصيا
بالله عليك يا ترامب دا كلام دا ؟؟
ونحن كان بنعرف الإعتذار قاعدين لي يوم الليلة ؟؟
ههههههههههه
أسي عليك النبي المقعدن هناك شنو
كان ما آخر زمن
حايمات شغلة برا شغلة
ما تسمع ليهن
ممسوخات وكضابات
الكلام دا إن شاء الله كان قلناهو
تخت فينا صاقعة تفرطقنا حتة حتة
معقول نقول ليكم تسلحنا !!
وكما دنا عذابكم ؟؟
معقول يا ترامب ااااااخوي
أها وإن شاء الله البطلع ليهو فيديو لي قيقم
ولا فيديو لي شنان ينقطع منو الطنان
والبجيب سيرة يونس محمود يطير ما يعود
بركة سيد الناقة وستي نفيسة النقناقة
بركة سيد الرايات الخدرا
والسيوف البترا
والله يا ترامب نحن العكاكيز في الحفلات منعناها
بتصدق ؟؟
وعندنا النظام العام
الحفلة كان طهور كان عرس كان تخريج
من تست ون
تست ون
تست ون
تقيف
خلي دا
مصنع اليرموك داكي الليلة لمن ضربو مالك سمعتنا نضمنا
والله قلنا لي ناس الشمارات إسرائيل الشقيقة نبرا من حقها
مافي داعي نحرجا قدام حبايبا
طوالي قلنا إلتماس كهربائي
مالنا نحن مصنع الأسلحة دايرين بيهو شنو ؟؟
وقع ياخي وارفع العقوبات الله يرفع مقامك
ويحسن هندامك
ويكتر منامك
والله عشرين حاوية هديك مجدوعة في قوانزووو
مليانة كريمات تفتيح بشرة
ما قادرين نجيبا من الصين الشقيقة
تياب السهرة مركونة في سويسرا
لمن موضتا إنتهت
العقوبات دي ذاتا في حقكم ما حلوة
أسي ناس العشرين يقولو عليكم شنو
معاقبنا نحن
الناس في الإحتباس الحراري
وإنت مساكك ليك جماعة مشروع حضاري بالحواري ؟؟
عملنا الحوار واطلقنا سراح المعارضين وفكينا الصحف
تاني شنو
وقلنا داعش ما ليها حق في العملتو في الرقة والموصل
بالمناسبة يا ترومبيتا مالك ما سمعت بمخرجات الحوار
وحياتك يا ترامب سنتين نتحاور
والله بدرية ما قصرت مواثيق اللمم المتحدة كلها عملتا لينا في الدستور
وركزت على الحريات خاصة حرية تملك الفلل
وحرية التعدد مثنى وتلات ورباع
غير العرفي والمسيار
تاني نسوو شنو عليك النبي يا ترامب ياخوي
نقع في رقبتنا نكسرا
في ذمتك دي الارهاب ذاتو ما كافحناهو معاكم ؟؟
وكان علي الدقون الملبدة في المزارع أطراف الخرطوم
والله المعبود بالحق ديل خبراء أجانب
من قوالتيمالا وكوستاريكا وجامايكا
لا بعرفو إرهاب ولا سمعو بي داعش
ولا هماهم ولا خساهم
ترا مما جوو ياكلو ويشربو
ومرة مرة بخشو كلزيوم
جنهم أفلام هندية
ومرات بعملوا سنمارات في جامعة وزير الصحة الولائي
دي فيها حاجة يا ترامب ؟؟
ما خلينا حركة ما "جبدناها" ودفسناها في التشكيلة
وعليك النبي يا ترامب لو نحن ما زاهدين في الحكم
بنكون لينا حكومة من تسعين وزير ؟؟
غير وزراء الدولة والولاة وناس المؤتمر الوطني
غايتو لو ما رفعت العقوبات حتى إحنا فراشنا ما بنرفعو
إن شاء الله التفريقة تبقى حول يازول


الرجوع الى أعلى الصفحة اذهب الى الأسفل
 
واللهِ ياترامب ما قلنا "ليكم تسلحنا"!! قلنا "بيكم تمسحنا" دي فيها حاجة ؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: