الرئيسيةس .و .جبحـثالتسجيلدخول
شاطر | 
 

 زملاء موغابي يتهافتون ويدينون تدخل العسكر في الحياء السياسي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين

avatar


مُساهمةموضوع: زملاء موغابي يتهافتون ويدينون تدخل العسكر في الحياء السياسي    الخميس 16 نوفمبر 2017 - 18:28



هراري الجميلة الليلة كيف أصبحتي
مسكوكي من حلقومك وزادو علي وجعتي
بالبكا والدموع مساهرة لا نمتي لاكي غمدتي
الحكم أقسام وسجم البلد البسوق جيوشا حمدتي

 
باقي موغابي اصبح قاعد في البيت
قالوا الانقلابين فرضوا عليهو الاقامة الجبرية
أها من الصباح جرا عنقريبو على الضل
وهدي رقدة ومعاها طنطنة
"إنعل أبو المساككة في الحكم لأبو السكة حديد ذاتو"
الضل باااااارد
باقي شمش هراري هارة هلاص
ومرتو "التانية" غريس يا هليلا
حتها أصبحت في البيت
في عسكري كورك ليها هددا بي فوق الحيطة
"إن جيتي مارقة لي برا علي الطلاق كان أكسر ليك كرعيك"
وقام قال ليها "لا بنعرف سند ولا بنعرف زغبير"
وأضاف "ما تقولي مطقمة فساتين كريستيان ديور بلقطك بلقطك"
المهم نحن بتربطنا بهراري زمالة الحكم
ياحماعة اجتماعات الاتحاد الافريقي
من زمن اسمو منظمة الامم الافريقية
دا غير الايقاد والكوميسا
كلو حاضرنو مع بعض كيسنا وكيسو واحد
الا الرئيس حقهم سبق رئيسنا بي تسعة او عشرة سنوات
لكن الحمد لله لي يوم الليلة ما اتفرقوا
يلزلزوو فيهن مع بعض الله العن ابو الرُكب
المهم نحن عندنا مشروع حضاري
وهن عندهم هراري
بفوزوا في الانتخابات بي 99%
نحن بنفوز بي 99 % ومعاها خجة
كمان نحن بنلعب
نحن رئيسنا عندو مرتين برضو موغابي عندو مرتين
نحن المرأة الثانية "دودي" بقدرة قادر بقت السيدة الأولى
حتهن المرأة الثانية "غريس" بقت الفيرست ليدي أوف زمبابوي  
عندهم شلالات فيكتوريا وكاريبا نحن عندنا جبل مرة
عندنا أحياء كافوري للسكن السياحي الفاخر
هن عندهم بوروديل شيسيبايت وجبل ماونت بليزنت
نحن درجنا العباس موغابي درج نوكومو اليس
اربعين سنةحكم لا كلل ولا ملل
نحن زولنا قال يسلما لعيسى
موغابي قال يسلما غريسي لكن ما دوامة
عموما الدبابات منتشرة في شوارع هراري
واقيمت الحواجز امام دار الاذاعة والبرلمان وهلمجرا
وناس الاتحاد الافريقي ووفود زوما من هراري للبراري
وبمناسبة البراري القلق سيد الموقف  
خايفين علي حياة موغابي
التقول حياة طلسم
ومهما كان فالراجل تجاوز (95) سنة بي سنتين تلاتة
لكن مرتو شديدة ولضيضة وقاعد تساعدو
تاني في شنو ؟؟
لكن الحمد لله البشير طمنا عليهو
خبر عاجل أذاعته قبل شوية وكالة الأنباء الصينية
إتصال هاتفي بثته وكالة شنغهاي هاي هاي
البشير بجلالة قدره هاتف موغابي
وأدان التعدي على الدستور والحريات
وشجب الانتهاك الصريح لمواثيق الأمم المتحدة
ودعا لتفعيل توجيهات الاتحاد الافريقي التي تمنع الانقلابات العسكرية
"ولد دا"
بحتوك حت
وبمرضوك مرض
وديل بدوكا عين يا ود يا قرض
ترم ترم
ترم ترم
ترم ترم
المهم
والله أنا شخصياً إتكيفت من خبر الاتصال  كيف شديد
كيف لا أتكيف .. أو كيف لا أعشق جمالك
وما رأت عيناي مثالك...كيف لا أعشق جمالك
عشرة اربعين سنة حكم عائلي
أهو دا الكلام .. دي الرئاسة ولا بلاش
ما لازم الرئيس البصح بالصح يبرز هيبته وجلالته
ويفقد الرؤساء خاصة كبيري السن
كمان لازم نحرص على الرؤساء المنتخبين ديموقراطيا
انقلابيين مطرطشين وغريسي ما بتسلمن الحكم
البشير ذلاهم ذلة الكلب
وقال ليهم كمان حايمين بالدبابات
ما تبقو رجال وتنزلو  
وحظرن من "مغبة" المساس بأمن وسلامة موغابي
وزوجته التانية وعائلته المجدعين في الوزرات
والمبرطعين في الهيئات الهاك بي هاك
حتى بعتم المقابر
وقال ليهم ما عندكن معاهم شغلة
مالو الكرسي المتحرك عيب ؟؟
الكُبر عيب ولا الخرف هجنقلا ؟؟
قول جاب اخوانو ومرتو التانية غريس دي فيها شنو
ما هدا بوتفليقة قاعد في الكراسي ليهو عشرات السنين
وفي الحكم عشرات السنين
وحتو كمان ما جاب اخوانو السبعة غير حريمو
السألوا منو بس جات علي موغابي المسكين دا
أها غير مرتو واخوانو اللاربعتاشر تاني جاب منو
بالله شوف كلمة "مغبة" دي براها ما بترهب الانقلابيين
وعلي فكرة لو إستعمل الهرشة دي مع ناس "داعش"
كان رقدن حتيتة لا رقة لا دير زور
يعني من "حيسو" لو مسك المكرفون
تيست ون
تيست ون
تيست ون
ونهر الدواعش كان فهموا حاجة
نجي لناس زمبابوي القالوا ما انقلابيين
يعني يات من يعمل  ليهو انقلاب على حكومة منتخبة شرعياً
يقول انا ما انقلابي ولا اخو مسلم
ولمن يصل سنة (28) حكم يقول ولا حركة إسلامية كمان ؟؟
"أمشي القصر عريساً وخلي الشعب يمشي البيت تعيسا"
وعاملين حُرفا
لكن البشير قطعا ليهن في حنانن
وقال ليهن دي قولوها لناس ما عندهم حديدة
ودي ماسورة مشيناها في الناس زمااااان سنة 89  
طوالي هرشن ليك خلاهن يطاقشو
يزازو بين الاذاعة وقصر الرئاسة في هراري المكسرا ضلعنا


الرجوع الى أعلى الصفحة اذهب الى الأسفل
 
زملاء موغابي يتهافتون ويدينون تدخل العسكر في الحياء السياسي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: