الرئيسيةس .و .جبحـثالتسجيلدخول
شاطر | 
 

 توزيع شهادات نسب وحسب الكلاب في الخرطوم والله صحي "صور"

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
المحبوب أحمد الأمين

avatar


مُساهمةموضوع: توزيع شهادات نسب وحسب الكلاب في الخرطوم والله صحي "صور"    الأحد 14 يناير 2018 - 12:38








مسابقة تأصيل سلالات الكلاب
"الكلبات يمتنعن"
الفعالية للكلاب "الضكور" فقطاً
تحت رعاية نادي مربي الكلاب السودانية
الفعالية إستمرت يومين كاملين
أفردت لها الميزانيات من جيوب الكلاب
وأصحاب الكلاب
وما شاء الله تبارك الله
كلابنا السودانية رفعت راسنا فوووووق
بقت أحسن من الفريق القومي
فريق قومي لو في فيديو "كليب" يطلع مغلوب
عشان كدة أحسن لينا الكلاب
لا خطب لا رطب
الكلب يجي داخل يتقدل
يصيح المتفرجون "هوا هوا هوا"
صاحب الكلب ماسك الجنزير
الخبير الصربي يقوم يفحص الكلب
عشان يتأكد من سلالتو
وحسبو ونسبو
أمال ايه انتو المشروع الحضاري قايلنو آدمي بس ؟؟
لا وللكلاب منه نصيب
والحمد لله أهي نالت الشهادات
شهادات النسب والحسب
ودي شهادات بمنحها الاتحاد الدولي للكلاب ببلجيكا
"أموت أنا في بروكسل وتبكي علي مونيكا"
"دي أغنية من سلالة السايبري"
المهم يا سيدي الكلابي ليك
الحكم بتاو فيدوفتش من صربيا
أدار "الفعالية" بحكمة وإقتدار
بس شوية كدي ظلم الكلاب السودانية
ظلم الهجن والهجين
رجع لينا مجموعة من الكلاب
قال لا حسب ولا نسب !!
يعني قالوا الكلاب لازم تكون
من السلالات المعروفة عالمياً
"زي الهاسكي" و"السايبري"
و"البيجل" و"الدوبيرمان"
و"الجيرمان لونق هير"
و"الروتفايلر"
و"البوكسر"
و"البولدغ" الفرنسي
والنضاع من النمسا
والشميسات من لكسمبورغ
وعلى فكرة الكلاب دي هناك فري
وممكن تاخد كلبين ويدوك جريو مجانا
"كلبات مافي"
ديك مجتمعات ضكورية بحتة
وحقيقي نحن كلابنا إعلاما ضعيف
أسي سلالة جرقاس دي مالا
والله مرة جرقاس راقد في الحيطة
جاء ضيف
دقة الباب قوم ياجرقاس چر فيهو
لو ماناس البيت بقو سريعين وعملوا "دعم سريع"
وفتحو الباب كان الكلب كان عضعض الضيف
أها الضيف بدا يقلد في ناس البيت
من الخلعة
"إزيكن كيف حالكن كلبين"
قبح الله وجوه العنصريين
وجرقاس ذاتو ما محتاج لي شهادة نسب او نسب
كان من الشيك ولا من البلجيك
تاريخو مليان بالبطولات والملاحم
يسكك نعلاتك إلا كان تفتشا الصباح
ياخي لو چر فيك ساي وهو راقد في محلو انت تتراجع
تاني عندنا سلالة "دينيس" كلب ود ادريس
الكلاب تهوهو وهو ينيص
وعندنا دينيس كلب السرة
ودا كمان متخصص سكارى
البجو يترتحو بالليل ديلك
يچر فيك السكرة تفتش ليها ما تلقاها
مرة "كبس" چر ليهو في سكران "حين غفلة"
الراجل قايد العجلة ومستمتع يغني
صدقني ما بقدر أعيد حنوني ما بقدر أعيد
قصة غرام أحي أنا
الساعة الشب ليك فيهو دينيس كلب السرة
الراجل فك العجلة ووقع من فوق ليها
قام يا الله ويامين
لكن التلاتة كبابي "فص ملح ونبح"
ودينيس ذاتو بقى يعضعض في خاترو واقف  
الراجل قام ورفع العجلة ولمّ ليك في دينيس
يا قليل الأدب يا عديم التربية
يا تافه يا حقير
يالفعلتك
ويالتركتك
ودينيس يهوزز في رقبتو ويلولح في إضني "فاغر فاهو"
وصاحبنا يسب ويلعن موجعاهو "كبابي أم زين دواي"
جاهو راجع تاني والكلام موجه لدينيس كلب السرة
الكلاب في الخرطوم يسووو ليها في الإحتفالات
جايبين ليها المدربين من صربيا
فاتحين ليها القاعات المكندشة والاكل فنادق خمسة نجوم
ما شاء الله تتباهى بي حسبا ونسبا وإنجازاتا
إنت أقعد لي هنا تنبح في "الراجل" و"المتعجل"
الراجل يمشي خطوتين ويجي راجع
يخسي عليك وعلي زوقك يا كلب ياحقير
تنبح فيني أنا
تنبح فيني أنا
ينبحو ورا عنقريبك شحدت ربي عليك
وإنت كان كلب وقلبك محدثك
ما تمش تنبح في ناس كافوري
عشان يا نبحت عمرك كلو يا سكت السكتة اللياها
يا الأروش تربية الكوش
ولله في كلابه شئون ..........................







الرجوع الى أعلى الصفحة اذهب الى الأسفل
 
توزيع شهادات نسب وحسب الكلاب في الخرطوم والله صحي "صور"
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: منتدى الحصاحيصا العام-
انتقل الى: