ضاقت ولما أستحكمت حلقاتها فرجت
وكنت أظنها لا تفرج
++++++++++++++++++++
لكل بداية نهاية
احمد سهي
سهي احمد
الصبر الصبر ثم الصبر
++++++++++++++++++++

المنظر في السودان
سهي سارحه في لا شي وعمتها تخش وتمرق ذي الرايحه ليها حاجه
بعد قليل إنتبهت سهي لحركة عمتها
فقالت لها :اها ياعمتي الرايح ليك شنو
سعاد:والله يابت أخوي لو جيتي للحقيقة رايحه لي سهي
بت اخوي السمحة العاقله ورزينة سهي نوارة البيت من يوم مادخل أحمد في حياتك وحالك اصبح ما بسر العدو
وياريت كان في فايدة الولد مرتاح في غربتو ولا هم ولا غم وأنتي البسمة فارقت شفايفك،،شكيتو لرب العباد،،سهي ترد بسرعة مقاطعه كلام عمتها لا لا لا عليك الله ماتدعي علي أحمد ،،أحمد داير البدعي ليهو وانا وانتي ماعارفين ظروفو بياكل كيف بنوم كيف ،،لو بتريدي بت أخوك ياسعاد ادعي وقولي
يارب المشارق والمغارب تلم سهي وأحمد ،،
العمه: خلاص يابتي وقفي البكاء ده قطعتي مصاريني هو البكاء بجيب ليك أحمد ،،وانا أسي بقوم اصلي الضحي
وادعو ليك .
وياسهي أنتي تعالي هنا صحباتك وين؟ كان ماوقفن معاك في ظروفك دي بقيفن معاك بتين؟

والله يا عمتي
صحباتي كل واحده فيهن مشغولة بحالها ودايرات البقيف معاهن في ظروووفن كان علي سلمي شغالة وبتربي في أخوانها بعد ما ابوها مات الله يرحمه

وصفوية أهي ماشاءالله عندها بتين وما قاعدة تلقي طريقة تجيني عشان شغالة وبتجي متأخرة انا لما القي فرصة بمش ليها وشذويه عرسوها وساقوها

شندي والله يا عمتي أكان انا الحالي واقف ....

استغفري الله يا بتي انتي حالك ما واقف لكن موقفه ليك الولد الأسمه أحمد ده والله انا زاتي ما عارفة المشبكك فيه شنو يعني خلاص من قلة الرجال

غايتو يا بتي يا سهي الله يعينك ويصبرك علي الموقف ده (أبوك ده سكت لينا كتيروما عارفين البحصل شنو وانا كان علي هدي جيت من مدني وقعدت معاك)

والله ما عارفين البحصل شنو الفيها خير ربنا يسويها يا بنيتي إنتي بس أدعي ...

أها يا سهي أنا ماشة أصلي وأدعي ليك يصلح حالك ويجمعكم إنتي وأحمد

آميييييييييييييييييييييييييين يا عمتي ربنا يتقبل دعوتك

هذا هو حال سهي بين شد وجذب امل وصبر..
اما حال احمد هناك في بلاد الغربه منتظرين الصادق المغربي يكتب ويورينا الحاصل ايه؟؟؟

يالمغربي اظهر وبان عليك الامان
ادينا خيط عن حال احمد خلينا نمسكو ونكتب منو

يا ايمان حمدالله علي السلامة

نورتينا الليلة بطلتك (شوفي لينا المغربي ده وين باقي سهي دي خلاص قربت تجن )

تسلمي ياهنويه ياغاليه
انشغلنا عن احمد وسهي
والله كان استمرينا بي نفس الحماس الاول- كانوا لي هسه اتزوجوا
مافي مشكله هسسسسسسسسسسسسسه ليك علي كان ماحلينا مشكلتهم مابنقيف
ايدك معانا

بعد ذلك رجعت الي احمد وكلي فرحه وناديته
المغربي: احمد ياااااااااااحمد البشاره
احمد: خير في شنو يالمغربي؟
المغربي: لا- البشاره اول
احمد : بشارة شنو يالمغربي هي الدنيا دي فيها بشاره ولا انا عندي ليك حق البشاره؟عليك الله خلينا ساكتين
الصادق: ياراجل ربك مابينسي ذول ومادام قلبتها لي دراما كدا انا ذااااااااااااتي البشاره ماعاوزه منك -المهم انا كنت عاوز اقول ليك انا لقيت ليك شغل
احمد (وهو ينتبه بعد شرود):شغل؟ انت بتتكلم جد؟
الصادق ضاحكا: اأأأأأأي شغل -ماقلنا نوبه -هسه ماعامل فيها عاوز تموت عدييييييل كدا
احمد يقفز فرحا: عليك الله قول لي وخلينا من حركاتك دي-شغل لي انا؟ لقيتو وين دا؟
المغربي: اااااااااااااي شغل ليك انت ولقيتو عند واحد حبيبنا ومن الكاملين كمان يعني ود عمنا ومابعيد مننا
احمد (باكيأ فرحأ): يعني الله اخيرأ كتب لي الفرج ؟ احمدك يارب-بعد كدا ممكن اتصل علي سهي واطمئنه علي واوعده ان انا جاييها وباقي عليها واسكت السنة كل الاتكلموا عني وحاولوا يفرقوا بيني وبينه-بس ماقلت لي الشغل دا طبيعتو شنو؟
المغربي (بصوت خافض): سواق
احمد(بأندهاش وخيبه):سواق ؟ سواق يالمغربي؟ انت عارفني انا خريج شنو؟معقوله تعبي كللللللللللو في قرايتي يروح هدر؟
المغربي: يااحمد يااخوي كدي انت ماتستعجل واسمع وجهة نظري
اها يالمغربي اقنع احمد بالشغل الانت جايبو ليهو

: احمد ياخوى هنا احنا فى غربة . مافى شئ اسمو انا خريج كده وكلية كدة .
بعدين ياحمد ده شغل اى زول بتمناه شغل مع العقيد (؟) قريب عمك داك
تشتغل معاهم فترة ثم ابحث عن العمل اللى انت عايزو
:لكن يا مغربى
: احمد اتحمل واصبر وما تستعجل بالحكم
: طيب يا مغربى
: بكرة حنمشى للعقيد (؟) انا وانت وصاحبنا (ديكور ) ونشوف
طبيعة العمل والمرتب والسكن
: ان شاءالله
.......................
ونواصل
المغربى

يا المغربي يا أخوي والله انا عارف انك تعبت شديد عشان تفتش لي الشغل ده وما قصرت معاي أبدا وربنا يقدرني وارد ليك كل العملته معاااي

بس إنت عارف إنو أنا محكوم بحاجات وعندي التزامات لازم أقوم بيها وذي ما انت عارف موضوعي مع سهي لسة معلق ونفسي أضرب ليها

وأقول ليها إني لقيت شغل وأفرحها لكن حاسي إني ما قادر عشان طبيعة الشغل وكده .....والشغل ما عيب يا المغربي لكن الواحد كان مؤمل إنه

يلغي شغل يوفر ليه دخل كويس وذي ما إنت عارف الشغل ده يا دوب يغطي إحتياجاتي انا بس .......

يأمن احتياجاتك انت شنو يااحمد ياخي؟
انت شكلك مافاهم انت حاتشتغل مع منو -اقول ليك ديل ناس ليهم وزنهم في البلد دي وماسكينها بي كماشه وصدقني البيشتغل معاهم امو داعيه ليهو -ولو عجبو شغلك صدقني حاترتاح وترطب ترطيبه شديده
ماتستعجل ياخي وخلينا لمن نقابل الراجل دا وتعرف منو الموضوع كلو

خلاص يا أخوي انا والله من الأول ما عندي مشكلة

لكن نقول شنو نفسي الأيااام دي تمر وتعدي بسرعة وارجع لسهي وانا راسي مرفوعة

وأقدر أمش لأهلها واقول ليهم انا داير سهي .....اصبر علي يا أخوي والله عارف روحي كترتها عليك

لكن انت الوحيد القدرت تتحملني وتشيل معاااي همومي .......