محجوب شريف محمد
معلم
متزوج من الاستاذة اميرة الجزولي معلمة تعمل ادارية في جامعة الخرطوم
له بنتين مريم محجوب تخرجت من كلية الاقتصاد والدراسات الاجتماعية
كلية الخرطوم من مواليد 1983م ومي محجوب طالبة بجامعة السودان
كلية الفنون الجميلة من مواليد 1987م0
*اعتقل بعد انقلاب 21يوليو 1971م وتم ايعاده عن الاقسام التي تكتظ بالمعتقلين
حيث وضع في قسم اسمه (المدرسة ) بسجن كوبر مع الشهيد "جوزيف قرنق"
قبل ان يساق بالليل الي "الشجرة" ثم المشنقة.
*في 1972م ابعد ضمن من ابعدوا الي سجن شالا بمدينة الفاشر حيث استبق
الرحيل الي شالا برائعته _ودونا لشالا وعزتنا ما شالا 00_ اعيد مرة اخري
الي سجن كوبر حيث زارته والدته "مريم محمود" تلك الزيارة الهمت محجوبا
رائعته يا والدة يا مريم 0
*في 1977م تم اعتقاله في بورتسودان وحول الي سجنها سيئ الصيت0
*في عهد الانقاذ اعتقل وحول الي سجن سواكن0
المراحل التعليمية
*1956م_1960م#مدرسة المدينة عرب الابتدائية0
*1960_1964م #مدرسة المدينة عرب الوسطي0
*1964م_1968م#معهد التربية مريدي بالخرطوم0
الخبرة العملية
*1968م #معلم بمدرسة الثورة الحارة الثانية_ ام امدرمان 0
*1969م # معلم بمدرسة الثورة الحارة الرابعة - ام درمان0
*1970م#معلم بمدرسة الثورة الحارة السابعة_ ام درمان0
*1971م#معلم بمدرسة ود نوباوي الابتدائية_ام درمان0
*1971م_1978م#مفصول من الخدمة بوزارة التربية والتعليم0
*1978م#مسؤول المناشط التربوية ام درمان0
*1989م#حتي الان مفصول للصالح العام0
*1996م_1998م#جامعة الاحفاد تعليم خاص(الاساس)0
2003م-2005م#جامعة الاحفاد تعليم خاص (زهور الاحفاد الثانوية العليا)0
*2005م#حتي الان بدون عمل0
الانتاج الشعري
*الاطفال والعساكر
*السنبلاية
*نفاج
*اشرطة كاسيت تربوية للاطفال
دواوين تحت الطيع
*مجموعة دواوين شعرية
*مجموعة كتب من ادب الاطفال00000000

روعة احييك ياغسان ...


يا بهلوى؟

يا بهلوي أمسك قوي

أوعك تقع

نكل بمن لا يرعوي

وأرخي السمع

أخد الحذر ثم الحذر من كل شئ

ضلك تحدق فى النظر ما تختشي

لو كشكشت صفقة شجر

روح وانزوي

خلي المشي

يمكن خطر

يا بهلوي

واطلق رصاص على كل شئ

على كل نسمة تمر وما تأخذ إذن

على كلمة بدون جواز

علم عصافير البلد تكتب تقارير الجهاز

علم شبابيك المدن علم فوانيس القرى

وكل عيدان الذرة

خلي النمل يدخل صفوف المخبرين

خلى الرذاذ يكتب تقارير الجهاز

أحسن تعبي الشعب أغلبه فى قزاز

ركز بشدة على الجياع

ركز لو تستطيع أو حتى قدر المستطاع

أخسف بكل الكادحين سابع أرض

أرجم رجم

صادر من الليل النجم

صادر من البحر الجذر

أشطب ولا تقبل عذر

وش الصباح

قصقص جناحين الرياح

جمد شرايين الحياة

وأنفي الأمل

الفى اكتشاف النار

وتقسيم العمل

المحتمل تلقى الملاذ
يا بهلوي

اها لسة في مواسيرك ولا خليتها اوع تكون بقيت نوااام



الشعب حبيبي وشرياني

بطاقه شخصيه

الاسم بالكامل

إنسان

الشعب الطيب والدىّ

الشعب حبيبى وشريانى

أدانى بطاقة شخصيّه

من غيرو الدنيا وقبالو

قدامى جزائر وهميّه

لا لون..

لا طعم

ولا ريحه

وايام مطفيّه مصابيحها

زي نجمه بعيده ومنسيّه

المهنه:

بناضل وبتعلم..

تلميذ فى مدرسة الشعبِ

المدرسة..

فاتحه على الشارع

والشارع فاتح فى القلبِ

والقلب..

مساكن شعبيّه

ودينى محل ما تودينى

شرّد اخواتى واخوانى

فتش أصحابى وجيرانى

خلينى فى سجنك…

وانسانى

في سجنك جُوّه زنازين

أرمينى وكتّف ايدىّ

من أجل الشعب السودانى

وعشان أطفالنا الجايين..

والطالع ماشى الورديّه

وحياه الشعب السودانى

فى وش المدفع

تلقانى

قدام السونكى

حتلقانى

وانا بهتف تحت السكين

الثوره طريقى وايامى

معدوده

وتحيا الحرّيه

محجوب شريف 0000لم تنهار عزيمته ولم يخزل عشاق المستقبل
المتفائلين , احببنا من اجل كلماته الوطن والصمود 0000 ندين بدين
وطنه ونتلمس طريق المحبه للاخرين عبر قلبه0

حنبنيهو
البنحلم بيهو يوماتي
وطن شامخ
وطن عاتي
وطن خيرا ديمقراطي
*****
وطن مالك زمام امرو
ومتوهج لهيب جمرو
وطن غالي
نجومو تلالي في العالي
سيادة
ارادة
حرية
مكان الفرد تتقدم
قيادتنا الجماعية
مكان السجن مستشفي
مكان الاسري وردية
مكان المنفي كلية
مكان الطلقة
عصفورة
تحلق حول نافورة
تمازح شفع الروضة
حنبنيهو
البنحلم بيهو يوماتي

عوافي

فديتك

فديتك يا مديد القامة
يا شعبا سديد الراي
وقلبي معاك يا حجرا حنين دفاي
اقبل وين افوتك وفي حماك حماي
اسيب عزاي اسيبه وكيفن القي عزاي
في وحشتي وسلواي عيونه وبحه الغناي
نخيلك تمره ضو صباي
ونيلك في جواي هامد هميم جراي
وقبضه ايدي مسكه رمحك الرماي
اطالع في صحاري الليل
مطالع صبحك الضواي
فديتك لو بقيت منفاي
فديتك لو بقيت مرساي