أخي الرشيد حبيب الله

السلام عليكم ورحمة الله

لك التحية

تمنيت دوما ان أكون في مقاعد المتفرجين ولكني اليوم ادخل ملعبك وخوفي من تمرير الكرات الصعبة فأنا لست ممن لديها خبرة

في هذا المجال

واشكر لك استضافتي في هذا البوست واتمني ان تكون استضافتي خفيفة عليكم

اهلي العزاز سلام من حنايا القلب
زهرات المنتدي ايناس وهبوية يسعدني تواجدي معكم
بسم الله نبدأ
الإسم : هناء خلف الله البشير
الميلاد : في عروس النيل أحب المدن الي قلبي اعز مكان الحصاحيصا
النشأة :نشأت وترعرعت في مدينة الحصاحيصا في اجمل احيائها (الحي الشرقي ) نشأت بين أسرتي واحمدالله ان انعم علينا بالراحة والهدؤ العائلي بين أبي وأمي وإخوتي حفظهم الله جميعا ورعاهم ...
اعتبر نفسي محظوظة لأني نشأت في الحي الشرقي فأنا اتمتع جدا وأكون في راحة نفسية تامة عندما استمتع بمنظر البحر والخضرة الخلابة التي كان يتمتع بها الحي الشرقي ليتني ارجع واعيد تلك الأيام ولكن ......
السيرة الذاتية الأكاديمية و العملية:
درست الإبتدائية في مدرسة المروة بنات (مدرسة الشرقية )وكان لي فيها اجمل الذكريات وكانت الأستاذة عائشة عبدالقادر مديرة المدرسة انذاك وانا في الصف الأول الإبتدائ كنت محبة جدا للطبيعة ودائما ما اذهب بخيالي بعيدا عن الفصل واسرح (يعني رواشة شديدة )المهم لما ظهرت النتيجة كانت سيئة شديد ابوي ربنا يديه الصحة والعافية أصر جدا انو انا اعيد السنه فجاء المدرسة وقال لأستاذة عايشة البت دي لازم تعيد استاذة عائشة كانت مصرة انو انا مستواي كويس بس المفروض اركز حبتين المهم اتفقت مع ابوي انو هي اللي حا تدرسني كل المواد طبعا جابو لي الكرسي بتاعي والدرج بره تحت الشجرة وقالو لي يلا استمتعي بالطبيعة الخلابة دي واقري سبحان الله كانت النتيجة انو انا مستواي اتحسن شديد والحمدالله ما رجعت السنه.....
كانت اجمل مراحلي الدراسية وانا في مرحلة الإبتدائ فقد كنت استمتع جدا بدراستي وانا بين استاذاتي اللآتي كنت وما زلت اكن لهم اجمل المشاعر فمن بينهم الأستاذة والأم الرؤوم استاذة عالية سعيد التي حببت الي نفسي مادة اللغة الإنجليزية والأستاذة الرائعة دوما استاذة سعاد الخضر- استاذة ليلي يوسف -استاذة جليلة ابو كساوي اسعدهم الله دوما .......
الحديث يطول ويطول عن مدرسة المروة الإبتدائية ولكن لا أحب ان اطيل عليكم
لي عودة ودمتم

وانا في مدرسة المروة تغير السلم التعليمي والغيت مرحلة المتوسط بإضافة سابع وثامن ودراسة اللغة الإنجليزية من خامس ابتدائي وكنا اول دفعة تمتحن من الأساس للثانوي العالي وكان للأستاذة عالية سعيد فضل كبير من بعد الله سبحانه وتعالي في نجاح دفعتنا وكنا من المدارس المتفوقة بين مدارس مرحلة الأساس ....
من المواقف الجميلة التي لا أنساها وانا في مدرسة المروة كنا في الصف الرابع وكان في فيضان ما متزكرة سنة كم بس المهم انو غطي الميدان الفاصل بين الحي الشرقي وحي الموظفين (منتزه الحصاحيصا حاليا )وطبعا نحنا ساكنين في الحي الشرقي والمدرسة في حي الموظفين اتخيلو انو كان في مركب بيقطعو بيها الأطفال الميدان ده للمدرسة .........ايام لا تنسي ..... احلي فترة بالنسبة لي لأني كنت من المشاركات دوما في النشاط الطلابي والجمباز والمسابقات الأكاديمية والغنائية والدورات المدرسية وبالجد عشت اجمل فترة في حياتي وانا في مدرسة المروة الحديث عن مدرسة المروة ما بيخلص بس ما حابة ادوشكم كتير
طبعا انتقلنا من مدرسة المروة وامتحنا من الأساس وكانت مرحلة الثانوي العالي بالجد دي كانت مرحلة صعبة شديد وكانت ايام مدرسة الرحمة الثانوية بنات...
ونحنا بنكون ماشين في الشارع اي زول بيقول عليك الله شوف الشفع ديل متين دخلو العالي بعدين طبعا كان في كمية من المشاحنات بينا وبين ناس المتوسط لأنو نحنا اختصرو لينا سنه وامتحنا معاهم للعالي في نفس السنه يعني كان في دفعتين دفعة ثالثة متوسط ودفعة ثامنة ودي براها كانت قصص.....
مرحلة الثانوي العالي بالنسبة لي كانت مملة وما جميلة لأنها كانت اكاديمية بحته ما شاركت فيها بأي نشاط .......امتحنت من مدرسة الرحمة الثانوية

اولا اود ان اشكر الانسان الفنان الجميل .. الرشيد ود الحبيب .. لان جمع الايناس ووهبه الهناء ... ماذا نريد اكثر من ذلك .. يا للروعه .. مرحب ايناس ست الناس .. مرحب ... هبه .. هبه الحصاحيصا .. مرحب .. هناء .. جالبه الهناء ... الغريق لقدام ..

قدمت للجامعه وتم قبولي في جامعة سنار كلية الهندسة الزراعية وهنا كانت المأساة غربة ،وبعد عن الأسرة ،واحساس بالوحدة وانا في عمر احسبه صغيرا وما كنت

متعوده علي البعد عن الأهل ذهبت لجامعة سنار وانا في قمة الخوف سافر معاي الوالد ربنا يمتعه بالصحة والعافية ودخلت في المعمعة

جامعة سنار كانت نقطة تحول بالنسبة لي واعتبرها غيرت في حياتي وخلقت مني شخصية غير .....

درست في جامعة سنار سنه واحدة و ما واصلت فيها لأني تعبت من الغربة وبعد الأهل بالأضافة لأنو سنار تتمتع بجو خريفي طول السنه كان الخريف بالنسبة لي

مشكلة مع اني بحب الخريف والمطر جدا بس المشكلة انو الخريف كان بيصطحب معاه نوع من الحشرات كان سبب في اني لم اتمكن من مواصلة الدراسة في

جامعة سنار (لو بتزكرو كان في سنه جاء فيها خريف وكان في نوع معين من الحشرات تسببت في قتل كثير من الناس )كان هذا سبب بعدي عن جامعة سنار وعدم

مواصلتي دراسة الهندسة الزراعية ولو اتيحت لي الفرصة مرة ثانية فسوف ارجع لمواصلة دراستي هناك ....

جامعة سنار كان لي فيها اجمل واروع الذكريات والكثيير الكثير من الآلام والمآسي ولكن احببت تلك الفترة جدا وما زالت تلك المدينه راسخة في ذاكرتي حتي

الآن وتمنيت زيارتها مجددا ولكن لم تتاح لي الفرصة حتي الآن .........

رجعت من مدينة سنارعلي أمل العودة اليها مجددا ولكن ظروفي الصحية حالت دون ذلك .....تمكنت بعد ذلك من التقديم لجامعة امدرمان الإسلامية وتم قبولي في

كلية الإقتصاد والعلوم السياسية واكملت دراستني فيها .........

تخرجت من الجامعة وانا كلي أمل بدخولي في الحياة العملية سريعا ولكن خاب أملي عندما مكثت في الحصاحيصا 3 سنوات دون الحصول علي وظيفة وباءت كل

محاولاتي بالفشل في سبيل ذلك ولكن في هذه الثلاث سنوات تمكنت من عمل دبلوم في اللغة الإنجليزية بالإضافة الي دبلوم في علوم الكمبيوتر تمكنت ايضا من عمل

فترة تدريبية في البنك الإسلامي السوداني فرع الحصاحيصا وكانت فترة عملية جميلة ..........

تمكنت من الحصول علي وظيفة في نهاية 2007 وكانت في المجلس الأعلي للجودة الشاملة والإمتياز وهي مؤسسة حكومية تتبع لرئاسة الجمهورية تهتم بتدريب

وعمل دورات تدريبية للمؤسسات والشركات العامة والخاصة عن ماهية الجودة والكثير من الدورات المتخصصة في هذا المجال ولازلت اعمل بها حتي الآن

واملي كبير في الله في الحصول علي وظيفة في أحد البنوك لأني احببت هذا المجال......

لي عودة
ودمتم

بلابل دوت كوم يا احلى بلابل نورتونا
[ندعوك للتسجيل في المنتدى أو التعريف بنفسك لمعاينة هذا الرابط] src="[ندعوك للتسجيل في المنتدى أو التعريف بنفسك لمعاينة هذا الرابط] width="425" height="350" type="application/x-shockwave-flash" wmode="transparent" quality="high" scale="exactfit">

شكرا يا رشيد لاستضافتك لبلابل الحصاحيصا كوم ومزيدا من الاشراقات وتحياتي اليهم ايناس وهبة الحصاحيصا وهناء الحي الشرقي وما ادراكم الحي الشرقي او الحلة التحت

علاقتي بالحصاحيصا علاقة الأم بأولادها فالحصاحيصا في دمي واتمني ان لا انقطع من زيارتها ابدا ولكن ظروف العمل دوما تمنعني من زيارتها

ما احبه في الحصاحيصا ..... احبها كلها علي بعضها احب ترابها ومرور النيل بيها وخضرتها وطبيعتها الحلوة .... ما حتصدقوني لو قلت ليكم حتي بقايا حريق

القصب بتاع الجنيد بحبه عشان بزكرني بالحصاحيصا .....صوت الشاحنات الكبيرة الجاية من الخرطوم لبورتسودان بالليل ...صوت القطر وحركته في السكة

حديد ..... حتي صوت حركة تجار رفاعة لما يجو بالبنطون لسوق الحصاحيصا (طبعا ده قبل افتتاح الكبري ) صوت الطيور وهي بتتحرك في شجر الخور

بحب جيرانا وبنات جيرانا ....هواها الطبيعي ......فيضان النيل في فصل الخريف وموية البحر جنب باب البيت ......الحصاحيصا في دمي

بهواك طيوف منسلة من وجع الحروف
معطونه بطين الجروفـــــــــــــــــــــــــ
بهواك وقوف سلوي وعزوفــــــــــــــــ
لهفة وكسوف دمعة ودفوــــــــــــــــــــ
هالة وخسوفــــــــــــــــــــــــــــــــــــــ
بهواك كيان قاسي وولوفــــــــــــــــــــ
جافي وعطوف احساس وشوفــــــــــــ
بهواك في كل الظروفـــــــــــــــــــــــ

ما اكرهه وانتقده في الحصاحيصا ....... ما في حاجة ممكن الواحد يقول انو بكرها في الحصاحيصا عدا عدم معرفة الناس ببعضها (انا عن نفسي في ناس كمية عرفتهم من المنتدي )وياريت الناس تعرف بعض اكتر

هؤلاء هم اصحابي الكتب فأنا مغرمة بقراءة الكتب والروايات والقصص الرومانسية حتي قصص الأطفال بحبها ...........الشعر(بحب اقرأ لنزار قباني وفاروق جويدة)........وبحب التلفزيون شديد.... بحب البحر.... المطبخ .....من صديقاتي في مرحلة الأساس ولازالت تربطني ببعض منهم علاقات طيبه (اضواء الطيب -نسرين عبدالعظيم -اريج احمد قسم السيد -هبة صالح -سلوي نصرالدين علي اردب )

هؤلاء هم أعدائي.....الكذب ... التملق... اكره جدا الإحساس بالفشل

علاقتي بالدين و الإنشاد الديني و المتصوفة......كانت علاقتي بالإنشاد الديني والمتصوفة علاقة عادية بس كنت بحب اسمع دوما عن المتصوفين واقرأ ليهم مع العلم بأن

جدي لأمي حاج عبدالقادر خرومي كان برهاني ... بس حقيقي كل الطرق الصوفية جميلة وانا بحب الطرق الصوفية جدا

علاقتي بالسياسة و الرياضه و الفن..علاقتي بالسياسة محدودة جدا يعني ملمه بأخبار السياسة ونفسي السودان ينعم بالإستقرار دوماً .... علاقتي بالرياضة عادية

بس انا مريخابية علي السكين وبموت في المريخ ......علاقتي بالفن جميلة جداوبحب اي حاجة ليها علاقة بالفن (بحب... استمع لأغاني حمد الريح وسيد خليفة واغاني الكاشف البيغنيها عصام محمد نور وبموت في فرفور .....)