دكتورة ايمو
الذين يستمعون الى سيد خليفة ليس أناس عاديون !!!!
فهؤلاء العمالقة لايمكن أن يطرب ويستمع اليهم إلا اصحاب الذوق العالي
والحس المرهف
والخيال الخصب
كلمات وأصوات تسري في الأعماق
تزيل الصداع والآلام الحادة
وتجعلك تتنفس بعمق
أغاني تقهر كل الأوجاع المستوطنة في أعماقنا دون مناظير
ودون تدخل جراحي !!!
شكراً لك لأنك تعيدنا للزمن الجميل
وكم جميل أن تضيفي اسم الشاعر لكل أغنية
حتى تعرف الأجيال القادمة كم أن هناك مبدعون بحجم الوطن
وحتى نرتاح قليلاً من نهى جركانة
وعوضية عضلات
وتهاني برميل
ونجاة زمبة
وستونا شاكوش
بالله هل نحن نستمع الى أغاني أم نشاهد مبارة في المصارعة الحرة ؟؟؟؟
وحتى المبارة ياليتها لو على حلبة مصارعة
بل كأنها في وسط المنطقة الصناعية !!!

الفارس الجحجاح
شدوا ليك ركب فوق مُهرك الجماح
ضرغام الرجال الفارس الجحجاح
تمساح الدميره الما بيكتلو سلاح

السم النقوع الفي البدن نتاح
يا عُصار المفازه اللعيون كتاح
المال مابيهمك إن كتر وإن راح

بطناً جابتك والله ما بتندم
يا اسد الكُداد الفي خلاك رزم
يا رعد الخريف الفي سماك دمدم

بابك ما أنقفل نارك تجيب اللم
مابتعزم تقول غيرإستريح حرّم
أبواتك جبير بيحلو للعوجات

مطمورتك تكيل للخاله والعمات
في الجود والكرم إيديك دوام بارزات
يا أب قلباً حديد في الحوبه ما بتنفات

عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق للفارغه ما بتحوم

لا بتنلام ولا بتعرف تجيب اللوم
ود ناساً عُزاز جمعوا المكارم كوم
تفخر بيك بنات الباديه والخرطوم




النهاية
يوم في يوم غريب
فيهو الشمس لمت غروبها وسافرت
بانت نجوم متفرقه زي الدموع

فى خد حبيب ودع حبيبتو السافرت
والليل ضفاير حزنو مداها الألم
زي التقول عارف النهاية القاربت

والكون حزين خايف الهجير
شايف الربيع غابت شهورو وهاجرت
شفت الفريق ضامي الفرح

فى دار حبيب ضميتو في قلبي الحنين
ماتت خطاي ... ضاع الأمل
واحترت في خوفي الدفين

عاينت لقيت الحبيب في عرشو
في تاجو الحزين
حولوا العيون فيها الفرح

بس الفرح في عيونو ماقادر يبين
والدمعة في عيني بتودع طيف حبيب
خلاهو لي قدر السنين

واشتقت لي طيف الدموع
ومشيت طريق اسمو المصير
ودعت زهرات الأماني

ورجعت لي ألمي الكبير
حسيت شعور الراهب السار السنين
مشتاق يفتش ليهو دير

لمن تعب سالت دموعو علي الدرب
خاف الأمل كره المسير
يا حبي عيش

كلمات خطاب من الحبيب كان النهاية
حرفو الدموع سطرو النحيب
والحسرة كانت فيهو غاية

خلاني اغرق في المصير
وانا لسه عايش في البداية

أندم علي الحلم اللي راح
واطفي الشموع وابكي