وأنا مصوب نظري تجاه ذات اللهيج السكري ، قطع علي باراك اوباما حبل نظراتي حينما قال لي " هويا المِقهي دا إت بتعاين في البت دي مشبها ولا شنو ؟؟.. ولا بتعمل ليـها في إسكاننق؟؟ " ، فإنتابني خجل مشوب بخوف يسير ، وأجبته بجرأة الواثق من حسن زوقه ، الشاكر لنعمة الخالق ، الحامد لتصويره " والله شكلـها دا ما غريب علي ، لكن شفتـها وين ما عارف " وإتجهت ناحيتـها مرة أخرى ، وتسآلت في براءة لا تنسجم مع نظراتي المتوثبة ، " اللخت من واشنطون هيني ولا من اللقاليم " " أيهي .. أيهي ..لا أنا من واشنطون .. أصلي مولودة في فلوريدا في إحدى ضواحي ميامي .. حِلة بقولوا ليـها الشريف برونتي .." أطرقت لبرهة كمن يحاول أن يتذكر شيئاً بالفعل ، وبدهشة حسيرة أضفت " الشريف برونتي !! ... إلحقنا ويفزعنا .. والله كان رجل صالح وإيدو لاحقة ... ووالله لمن زرنا أمريكا الصيف الفات ، واحدة من بنات بروكلين صاحبة بِتي الكانت ممتحنة الشهادة السودانية ، وكانت دايرة ليـها فقير مكرب ، بت بروكلين قالت لي بتي أمشي ميامي ، وأسألي من موقف مواصلات الشريف برونتي ، الموقف جنب ملجة ميامي ، أقطعي التذكرة وإتوكلي ، أها بتي ــ يا حليلة ــ مشت طوالي ولقت حفيد برونتي الماسك الخلافة ، والله أداها بخرات وجركانة محاية ، وحلف بالتقطعوا مايشيل قِرش ، والحمد لله بتي امتحنت ، وجابت 47% وقبلوها في جامعة علوم الزمان كلية الدراسات التطبيقية ...علا قبول خاس".
فجأة ومن غير سابق إنذار صاحت مس كلنتون " سجم خشمي ..ما ذكرتوني ..الليلة ما أهل عريس بتي جايين " ، وقد أفزعتني صيحتـها وهبـتـها غير المتوقعة ، وسألتـها " يا مره قولي بسم الله .. ما سمعت ليك بي بت قبال دا ... إت نعست ولا شنو" ، وأخذت تجمع في متعلقاتـها بسرعة وقالت " أجي يا ود أمي ... بتي الويحيدة تشلسي ما بتعرفااااا ... إتخرجت من جامعة ستانفورد .. وإشتغلت في مصنع الدقيق .. في إيوا .. أها لاقاها شاب حلاتو إسمو مارك مفنسكي .. أها قام جكسا وقبال كم يوم جانا أبوه النائب إيد لاحق مفنسكي ، باقي رشحه الحزب الاتحادي الديمقراطي في الإنتخابات الولائية في إيوا ، والله راجل طيب خلاس ، وعاد شكر ولدو جنس شوكر ، قال شغال موظف إستثمار ، لا بسف صعوط ، ولا بدخن سجاير ، بس إلا علبتين ولا تلاتة علب الليلات فوستر ولا هونِكان بشربن كل يوم وبنوم ".
وبصراحة فإن كل ما ذكرته مس كلنتون عن الخطيب قد كان طيباً ، ولم أتحمس كثيراً لطبيعة وظيفة خطيب تشلسي ، وقطعت عليـها حبل شكرها الممزوج بالبوبار الرئاسدبلوماسي " عاد النحدثك ... إتِ مره فاضلة .. وبتك ويحيدة ومشيحيدة ..مالك يختي مدياها لبتاع سوق المواسير دا ؟؟ مالن الرجال من قلتن ولا من عدمن ... حدثيني ؟؟ ... إياهو ما خاتي ... إستفاد من منصب أبوه .. ودور في سوق المواسير ... اسمعي يا مدام ... أنا ترا حظرتك ... وأخديـها مني نصيحة لوجه الله .... أي واحد أبوه برلماني ، إن شاء الله نائب ألفا ، مما يقول ليك شغال في مجال الإستثمار والصيرفة ...أعرفيهو طوالي بتاع مواسير ... أها وحاتك إتي دي المابحلف بيك بالكضب ...مفنسكي دا داخل علي طمع ... ".