بعض من مقال خالد عزالدين بصحيفة الصدى ......
قالو الجماعة حرموهم من الهواء في (النفق المظلم)!!
والله أنا بتابع في نشرة الأخبار .. جابو ليك جماعة محبوسين تحت (الواطة) أنا قلت ديل ناس المريخ في عطبرة!! طلعوا عمال محبوسين في منجم تحت الأرض في أمريكا الجنوبية!!
جنوبية.. جنوبية.. ترررم!
إتخيلوا ناس المريخ ديل اتحبسوا في عطبرة .. كم دولة حتطالب بسرعة التدخل لإنقاذهم .. تونس ورواندا وفلسطين ومالي ونيجيريا!!
فريق فيهو سبعة أجانب!!
القوات المشتركة ما زيكم!!
وناس جريدة (الزعيم) قالو ليك الجماعة ركبوهم في بص صغييير.. اللاعبين لما وصلوا (معسمين) ما الفلس حاصل لكن ما ظاهر!!
ما في لاعب شجاع زي هيثم مصطفي بقول (الحالة صعبة)!!
لكن ناس الزعيم طلعوا شجعان خالص .. كتبوا .. من جمال مشى الفلس حصل .. مجلس المريخ يفشل في إيجار بص كبير يحمل كل البعثة!!
وناس الهلال سافروا بورتسودان بطائرة خاصة ونزلوا في الهيلتون!!
إنتو ما كان تركبوا القطر.. على الأقل كنا نغني ليكم..
قطار الشوق .. متين ترحل!!
يكونوا منعوكم عشان (الحمام) ممنوع يركب في القطارات!!
ما في مشكلة .. برضو بنغني ليكم!!
حمام الوادي يا راحل..!
وأحمد محمد أحمد قال ( وارغو ) لازم يرحل هسة!!
المشكلة يا أحمد بقت في التذكرة!!
كمان وارغو ده عايزين ترجعوا بي بصكم الصغير ده؟!
زمان كان بتفتشوا في نادي يستعيروا..
هسة عايزينو يسافر وما في زول بقطع تذاكر!!
أنا عندي واحد صاحبي مغترب عندو نفس المشكلة..
عايز يجي السودان إجازة وما قادر.. عندو (سبعة) أطفال .. حق التذاكر مشكلة!!
والله مشكلتكم كبيرة يا أحمد!!
يعني (الحمام) ده لو فكيتو ما بطير؟؟..
ما بنطير برانا كراسي تطير ما معانا..
والله الجيش النيجري ده ضرانا..
الأربعة كانت أحلى فيكم!!
على الأقل رمزي صالح نزور شبكتو قبل ما يرجع!!
ونكرم ضيافة ود ضيف الله .. قالو كان (ضيف شرف) اسم على مسمى!!
في زول بجيب ليهو (ضيف) يلعب كورة يا صديق علي صالح؟؟!!
حتى الماكينة الألمانية تعطلت..
واحد ثقيل قال لي .. أول مرة أشوف لي مكنة ألمانية استعمال مرة واحدة !!
غلبت مرة واحدة ووقفت !!!
زي مكنة الحلاقة!!
قالو شداد جاب صفر!!
شداد جاب الفيفا .. الصفر جابو المريخ !!
موضوع: بدون حجاب ....... 
الثلاثاء أغسطس 31, 2010 10:41 pm
